Read Yucateco Job 36 Bible Online

Job 36 - Yucateco bible

Job 36

¹Eliue', tu ya'alaj xan: Ch'en xiquinten jun súutuque', ca in ca'anbesech, tumen yaan u láak t'aano'ob kabéet in wa'alic ti' teech tu yo'olal Ku.

³Bin in ca'aj in láaj jóokes tin pool ba'axo'ob in wojel, u ti'al ca in we'es ti' teech, tu beel ba'ax cu beetic Junab Ku.

⁴Ma' bíin in wa'al ti' teech, ba'al ma' jaaji'; ti' yaan ta táane' jun túul ma'alob aj ojéelaj.

⁵Junab Kue' sen yaan u páajtalil yéetel sen yaan u na'at, Ma' tu sutic u paach ti' máax mina'an u si'ipil.

⁶Ma' tu p'atic x ma' jaadzil le j loolob wíinico' ba'ale' cu beetic ba'ax utz ti' le óotzilo'obo';

⁷mantadz cu canantic le máaxo'ob toj u cuxtalo'obo'; cu jedzic tu jalach káanche'ob le ajawo'obo', cu beetic ma' lúubulo'ob.

⁸Ba'ale' wa kaxa'ano'ob yéetel cadenaob cu beeta'al xan u mukyajo'obe',

⁹Kue' cu beetic u yicho'ob le loob tu beetajo'obo' yéetel bix tu beetilaco'ob tu yo'olal u x ca'anal ichilo'ob.

¹⁰Cu nu'uc t'antico'ob u ti'al ca u tojquinto'ob u cuxtalo'ob, cu ya'alic ti'ob ca u p'ato'ob u loolob óolalo'ob.

¹¹Wa cu yu'ubico'ob yéetel cu éejemtico'obe', cu bin utzil ti'ob yéetel cu yáantal qui'imac óolal ti' tuláacal u kiinilo'ob u cuxtalo'ob.

¹²Ba'ale', wa ma' tu chíinpoltico'obe', cu quíimilo'ob ma'ili' u yojéelticobe'.

¹³Le loolob máaco'obo' cu sen p'u'ujulo'ob, ba'ale' quex kala'ano'obe' ma' tu káatico'ob áantaj.

¹⁴Cu quíimilo'ob tu táanquelemilo'ob, ich subtalil cu xu'ulul u cuxtalo'ob.

¹⁵Yéetel mukyajil, Kue' cu toquic le máax cu mukyajo'; yéetel ki'inamil cu cu ka'ajbesa'al u yiik.

¹⁶Teech xane', tu tocajech tu chi' quíimil, tu dzaj ti' teech ayikalil yéetel cóococh jáalkabil; tu chupaj a x táas che' yéetel qui'iqui' janalo'ob.

¹⁷Ba'ale' ta wóokole' cu lúubul u xot kiin le loolob wíinico'obo', ma' tu páajtal a jechic a p'is óolta'al yéetel a xot kinta'al.

¹⁸Canantabáa ma' a bo'ol u ti'al tuusil, canant xan ma' a tu'usul yéetel sen taakin.

¹⁹Tumen tu kiinil a mukyaje' lelo' mina'an u tojol, mix ba'al u biilal a waawat mix a páajtalil.

²⁰Ma' a yaayantic kuchul le áakabo', tumen yéetel áakab cu sa'atal le caajo'obo'.

²¹Canant ma' a suut cuxtal ichil le kaaso', tumen teche' a túuntmaj le mukyajo'.

²²Ilawil ma'alob u nojoch páajtalil Junab Ku. mina'an mix jun túul aj ca'anbesaj cu páajtal u que'etel tu yéetel;

²³mix máac cu páajtal u ya'alic ti' ba'ax bíin u beete, mix ca pa'ajac u subtal tu yo'olal ba'al kaas u beetmaj.

²⁴Tuláacal u yóokolcaab qui'iqui' t'antic u meyajo'ob; ka'ajac ti' teech xan a qui'iqui' t'antic.

²⁵Tuláacal wíinic cu páajtal u yilic quex náach yanil.

²⁶Kue' sen nojoch, ma' tu páajtal c ch'a'a nu'uctic; mix tu páajtal c xoquic u ja'abilo'ob.

²⁷Leti'e' cu much'quintic jun p'éelili' tu'ux u ch'a'ach'a'ajalo'ob le ja'obo', cu dzo'ocole', cu sutic cháaquil.

²⁸Le cháaco' cu tuul ti' le múuyalo'obo', cu káaxal tu yóokol le wíinico'ob.

²⁹¿Máax ojéeltmail ba'axten cu yáalcab le múuyalo'obo' wa ba'axten ka'am u juum u quíilbal le cháac te j ca'ano'?

³⁰Junab Kue', cu jayic u léembal u cháaco'ob tu yóokol le ka'anabo', cu balic u taamil le ka'anabo'

³¹Leti'e' cu dzáic u janal le caajo'obo', cu dzáic ya'abcach janal ti'ob.

³²Cu lap'ic tu kabil u jaadz le cháaco', cu beetic u jaadz le tu'ux u káato'.

³³U juum le cháaco' cu ya'alic yaan Junab Ku, Le ka'amcach ja'o' cu ka'aytic u p'uja'anil.