Read Yucateco Job 38 Bible Online

Job 38 - Yucateco bible

Job 38

¹Yuumtzil túune' tu t'anaj Job tu chúumuc jun p'éel chac iikale', ca tu ya'alaj ti':

²¿Teche' máaxech u ti'al ma' a wocsaj óoltic ba'axo'ob quin beetic iquil a we'esic xan a j ma' na'at t'aano'obo'?

³Bejela'e', in káat in wila' wa jach j xiibech, tumen bin a ca'aj a núuc dze'edzec in káat chi'ob.

⁴¿Tu'ux yanech le ca tin wedzcuntaj le lu'umo'? ¡Wa tumen jaaj sen yaan a ojéelaje', a'al ti' teen!

⁵¿A wojel wa máax tucult buca'aj nojochil unaj u beeta'al yéetel máax nojoch pakbalil j beete?

⁶¿Yóokol ti' ba'ax jeedzel u chuun pakilo'ob? ¿Máax dzáa u yáax tuunichil u chuun pakil,

⁷ca'aliquil táan u núup kaayo'ob u eekilo'ob u píik sáastal yéetel u sen qui'imac óolal in palitzilo'ob yano'ob tin ca'anile'?

⁸¿Le ca j tóop' le ka'anab tu chúumuc le lu'umo', máax dzáa u jáal u ti'al kalic u beel?

⁹Tene' tin dzaj jun p'éel múuyal u ti'al u búucbes, tin dzáa xan le ye'eb u ti'al u teep'intej.

¹⁰Tene', tin p'isaj tu'ux bíin xu'uluc le ka'anabo', tin kataj u beele', ca tin ch'otaj u jool.

¹¹Tin wa'alaj ti': Chéen way bíin kuchuqueche', ma' bíin ch'aacatnaquech waye'; way bíin xi'ixi'icpajac a nucuuch cuclilo'obe'.

¹²Ti' u kiinilo'ob a cuxtale', ¿a wa'almaj ti' le ja'atzcab ca sáasac wa ti' le kiin ca tíip'ico'?

¹³¿Yéetel ca ki'itpajac le sáasil ti' tuláacal yóokolcaab u ti'al a beetic u bin u ta'acbescuba'ob le loolob máaco'obo'?

¹⁴Cu chíicpajal túun tuláacal u calapilo'ob le lu'umo' Cu jadzutz bóonol bey jun p'éel búuque';

¹⁵ma' tu yóolta'al u dza'abal sáasil ti' le loolob máaco'ob', beyo' cu xu'ulsa'al u sajbesico'ob wíinic.

¹⁶¿A xíimbaltmaj u yéekjoch'e'enil u taamil le lu'um le tu'ux yaan u sayabilo'ob le nojoch ka'anabo'?

¹⁷¿A wilmaj tu'ux yaan u jool najilo'ob u táaj éekjoch'e'enil u ajawil le quíimilo'?

¹⁸¿A wojel wa buca'aj cóochil le lu'umo'? ¡A'al ti' teen wa a wojel jach buca'aj u cóochil!

¹⁹¿Tu'ux cu ta'acbesicuba'ob le sáasil bey le éekjoch'e'enilo'obo'?

²⁰¿A wojel wa a beet u kuchulo'ob tac tu xuul u yóokolcaab yéetel a beet u suuto'ob tu cúuchilo'ob tu ca'a téen?

²¹¡Unaj a wojéeltic, tumen teche', sen úuchbenech, míin dzo'oquili' a síijil ca j beeta'abo'obe'!

²²¿Dzo'oc wa a bin a xíimbalt tu'ux in kalmaj le ye'eb bey le bato'

²³u ti'al a túuchi'ito'ob tu kiinilo'ob loob yajil, yéetel tu kiinilo'ob ba'atel?

²⁴¿Ba'ax bejil cu bisic le sáasil u ti'al u ki'itbesicuba'ob? ¿Bix u bin u jáayal u yiikal j lakin tu yóokolcaab?

²⁵¿Máax je'ic u beel le ja' cu káaxal u ti'al u ye'esic tu'ux bíin xi'ic le chac iikalo',

²⁶u ti'al ca káaxac ja' x tocoy lu'um, tu'ux mix máac cajacbali',

²⁷u ti'al u jóoyabt le tiquin lu'um u ti'al u beetic u tóop'ol le xíiwo'obo'?

²⁸¿Máax u taata le ja' cu káaxal máax xan u taata le p'uul ja'o'?

²⁹¿Máax u maama le bat yéetel u p'uul ja'il u sáastalo'?

³⁰¿Máax dzu'uyquintic le ja' bey tuunich u ti'al u táaj síiscuntic u ja'il le nojoch ka'anabo'?

³¹¿Teech wa beetic u múuch'ul le mejen eeko'ob u t'it'icubáa u eekilo'ob Orión?

³²¿Teech wa beetic u jóokol u eekil u sáastal? ¿Teech wa e'esic u beel eekilo'ob le noj Chimal eek yéetel le Chimal eeko'?

³³¿A wojel wa bix u meyaj tuláacal ba'axo'ob yano'ob te j ca'ano'? ¿Teech wa beetic u yúuchul j lu'um tuláacal ba'ax cu yúuchul te j ca'ano?

³⁴¿Je'el wa u páajtal a wa'alic ti' le múuyalo'ob ca u bulecho'ob yéetel le u káaxal ja'o'?

³⁵Wa ca a túuchi'it le jaadz cháac ca xi'ic wa tu'uxo', ¿cu núuquic wa ti' teech: Je'elena', bíin in beet ba'ax ca wa'alic ti' teen?

³⁶¿Máax dzáa na'at ti' le ch'í'ich'o'ob je'el bix le ibis yéetel le j t'eelo'?

³⁷¿Máax sen yaan u na'at u ti'al u yojéeltic jay p'éel múuyalo'ob yaan? ¿Máax láalico'ob u ti'al ca káaxac le ja',

³⁸u ti'al u su'utic katil le ma'ay lu'um u ti'al u takláant u xéexet'al le p'úulo'obo'?

³⁹¿Teech wa caxtic ba'ax bíin u dzon le x leóno'ob u ti'al u tzéentico'ob u mejenilo'ob u ti'al ca na'achajaco'ob

⁴⁰le quéen u ta'acbesubáa ichil u sajcab wa j ch'úuc ichil le xíiwo'obo'?

⁴¹¿Máax tzéentic le j ch'oomo'ob, le quéen jóokoc u mejnilo'ob u caxanto'ob ba'ax u jaanto'ob? táan xan u yóokolo'ob ca in dzáa ba'ax u jaanto'ob.