Read Yucateco Job 39 Bible Online

Job 39 - Yucateco bible

Job 39

¹¿A wojel wa ba'ax kiin cu síijsajo'ob le x pu'uquil x yuuco'obo'? ¿Dzo'oc wa a wilic u síijsaj le x ch'upul quéejo'obo'?

²¿A wojel wa tu jay p'éel winal cu síijsajo'ob?

³Le quéen kuchuc u kiinil u síijsajo'obe', cu p'u'usicubaob u ti'al u síijsico'ob u mejnilo'ob.

⁴Cu dzo'ocole', le mejen ba'alche'obo', cu mu'uka'anchajalo'ob, cu nuuctalo'ob te j káaxo', cu dzo'ocole' cu náachtalo'ob ti' u na'ob.

⁵¿Máax cha'akabt u burroil le káaxo'? ¿Máax cha'a u máan jáalkab?

⁶Teen j e'es ti' tu'ux u najmal u cajtal, te x tocoy lu'umo' yéetel ti' ch'óoch'och' chakano'ob.

⁷U p'eec u yu'ubic u juumo'ob le caajo', ma' tu táan óoltic u yawat le arriero.

⁸Cu máan tu yóokol u jo'ol le pu'uco'ob u ti'al u caxtic janalbe'en xíiwo'ob, cu caxtic je'el ba'ax ya'ax xíiwil u ti'al u jaante'.

⁹¿Ca tucultic je'el u yóoltic u meyajtech le j káaxil wacaxo' yéetel ca u máans áakab tu najil a wacaxo'ob?

¹⁰¿Ca tucultic je'el u páajtal a kaxic tu caal u che'il pot lu'ume' wa ca cóol u ni' u ti'al j oxo'om ta coole'?

¹¹¿Je'el wa a láaj p'atic u beetic a meyaj chéen tumen mu'uka'ane'?

¹²¿Ca tucultic je'el u meyaj u ti'al u mol a jooch yéetel u ti'al u mulquint u yicho'ob a coole'?

¹³Je'el le avestruzo': qui'imac u yóol u popoc xiik óoli' bey yaan u xiik yéetel u kukmel pocboc ti'e',

¹⁴cu p'ajtic u ye'elo'ob ich sa'am lu'um u ti'al ca tóop'oc yéetel u yooxow kiin.

¹⁵Ma' tu tucultic wa je'el u pa'abal u ye'el tumen wa máaxe', mix tu tucultic wa je'el u pe'echakta'al tumen wa ba'ax ba'alche'ile'.

¹⁶Jach kasa'an tu yéetel u mejenilo'ob, bey ma' u ti'alo'obe', ba'ax u káaj ti' wa ma' tu tóop'ol u mejenil.

¹⁷Tumen tene' ma' tin dzáa u na'ati'; ma' tin dzáa nu'uca'an tuucul ti'i'.

¹⁸Ba'ale', le quéen líikic u ti'al ca lacchajac u yáalcabe', cu ch'actic u yáalcab Tzíimino'ob yéetel aj nat' tzíimino'ob.

¹⁹¿Teech wa j dzáa u muuk le tzíimino'obo', máax jadzutzquint u caal yéetel u tzuuc?

²⁰¿Teech wa beetic u síit' bey u síit' sáake', yéetel le u xóob u ni' cu dzáic sajaquilo'?

²¹Cu panpankab tu yéetel tuláacal u muuk te j táax kóomo', x ma' sajaquil cu chokicubáa ichil le ba'atelo'.

²²Ba'ax u káaj ti' le sajbe'enilo', ma' xan tu ja'akal u yóol, ma' tu lúubul u yóol tu táan le máascabo',

²³quex buca'aj u juum u nu'ucul u cuchmail u x julubo'ob le j nat' tzíimin quex xan ca jóokoc u káakil u x lóonte'ob yéetel u x julte'obo'.

²⁴Séeba'an u yáalcabtic chowac bejo'ob; le quéen jóopsa'ac u paaxil le ba'atelo', ma' tu páajtal chéen jedzecbal.

²⁵Yéetel u yaawate' cu núuquic u juum paaxil le ba'atelo'; quex asab náach yanile' cu yu'ubic u booc le ba'atelo', cu yu'ubic u ya'ala'al ca chúunuc le ba'atelo', bey xan cu yu'ubic le awato'obo'.

²⁶¿Jach ya'ab ba'ax a wojel cu páajtal tac a ca'anbesic u xiknal xooch' ca páatac u xiknal tac j noojolo'?

²⁷¿Teech wa a'almail ti' le j cóot ca u beet u ku' tu ca'analil u p'íich jo'olil le witzo'obo'?

²⁸Leti'e' ti' caja'an mantadz yóokol u nucuch tuunichilo'ob le witzo'obo', cu beetic u cajtalil tu p'íich jo'olil le witzo'.

²⁹Te tu ca'analilo', cu ch'úuctic ba'ax bíin u dzoone'.

³⁰U mejnilo'obe', cu tzéenticuba'ob tu yéetel ki'ik, tu'ux yaan quimeno'obe' ti' cu yila'ali'.