Read Yucateco Job 41 Bible Online

Job 41 - Yucateco bible

Job 41

¹Le j Leviatano', ¿Je'el wa a chuquic yéetel u lu'utzubil u chu'ucul caye? ¿Je'el u wa u páajtal a kaxic u yaak yéetel jun p'éel suume'?

²¿Je'el wa páajtal a julic jun p'éel suum tu jool u ni'e' wa a potic u cama'ach yéetel jun p'éel x lúutzube'?

³¿Ca tuclic bíin u sen káat óolte ti' teech ca a ch'a'a óotzilil ti', ca káat óolnac ti' téec yéetel muumun t'aano'ob?

⁴¿Bíin wa a beet u jalach t'antic u beeticubáa a palitzil tuláacal u kiinilo'ob u cuxtal?

⁵¿Bíin báaxalnaquech tu yéetel je'el bix a báaxal tu yéetel jun túul chan ch'íich'e'? ¿Bíin a kax u caal bey u báaxal a x ch'upul paalalo'obe'?

⁶¿Bíin yanac máaxo'ob sibil manic bey ti' jun p'éel kíiwique'? ¿Wa u p'e'esa'ac u ti'al ca co'onoc u bakel?

⁷¿Je'el wa u páajtal a potic u kéewelel jun p'éel julube' wa a jolic u pool yéetel jun p'éel u julubil u chu'ucul caye'?

⁸Wa ca kuchuquech a líikes a kab tu yóokole', bíin u sen dzáa ba'ax a beete, mix bikin bíin suunaquech a ca'a beete.

⁹Je'el máaxac ca u yil le Leviatano', cu sac quíimil

¹⁰Wa cu yáantal máax p'u'ujsique', cu dzíiquil; mix máac cu páajtal u wa'atal j ba'atel tu yéetele'.

¹¹¿Máax ichil le cu wa'atalo'ob j ba'atel tu yéetel cu bin utzil ti'? ¡Mix jun túul ichil u cajnáalilo'ob u yóokolcaab!

¹²Ma' bíin jáawac in wa'alic bix u yooco'ob yéetel bix sen yanil u muuki'.

¹³¿Máax je'el u páajtal u dzíilic u kéewelel tu yóokol, wa u potic u sóol u yoot'el, sen chich bey fierroe'?

¹⁴¿Máax je'el u páajtal u japic u chi', chuup yéetel u nucuch sajbe'en cojo'obe'?

¹⁵U t'o'olol u pu'uche' beyo'ob u tzoolol chimalo'ob u chichich nupmajuba'ob beyo'ob tuunicho'obe'.

¹⁶Sen cocojquil yanilo'ob, mix iik tu píit máansico'ob.

¹⁷Tu yo'olal ma'alob kaaxlilo'obe', mix máac cu páajtal u jun páaycutico'ob.

¹⁸U je'esíime', bey u léembal cháaque'; u yicho'obe' cu juulo'ob bey u juul kiin táan u taal sáastale'.

¹⁹Tu chi'e' cu tuul káaki' cu tip'li'ix xan u káakil.

²⁰Tu ni'e' cu tuul buudzi', bey u jóokol u yooxow ja' cu looque'.

²¹U yooxow u chi'e' cu t'abic le chúuco' tu chi'e' cu tóoch'bal káaki'.

²²Sen mu'uka'an u che'il u caal, tuláacal wíinic cu sen sajactal tu táan.

²³Tac u bakel u wíinclile', seten dzu'uy bey yibbil fierroe' ma' tu páajtal u jo'olol.

²⁴U pucsi'ikale', dzu'uy bey tzekele', dzu'uy bey u ca'il juuch'e'.

²⁵Le quéen wa'alaque', le jach j xiixib máaco'obo' cu ja'akal u yóolo'ob, tu yo'olal sajaquilo'obe' cu yáalcabo'ob tu táan.

²⁶Ma' tu páajtal u ba'atelta'al yéetel x julubo'ob, mix tu yéetel lóomte'ob, mix ba'al yaan u ti'al ca páatac u ba'atelta'al.

²⁷Mix ba'al u biilal le fierro tu táano', bey chéen sojol u yilique', le bronceo' bey che' yaan u kamasile'.

²⁸Ma' tu yáalcabansa'al yéetel x julubo'ob; u ch'i'inil tu yéetel tuuniche', bey u ch'i'inil yéetel sojol u yilique'.

²⁹U ko'olol jun p'éel x bajab máascabe', u ti'al leti'e' bey u p'u'uchul jun p'éel sakabe'; cu che'ejtic u yu'ubic u kaay u yiikal le x lóonte'obo'.

³⁰Le quéen u jíilticubáe', cu t'altal u beelil te j lu'umo' bey je'el bix u je'ebel yéetel u nu'ucul u bukla'al lu'ume'.

³¹Cu beetic u looc le ka'anabo', bey u looc u ja'il jun p'éel cuume'; bey u cuumil u xa'akta'al qui'iboc ba'alo'obe'.

³²Cu bin u p'atic tu yóokol le ja'o', jun t'o'ol u yóom sacjope'en bey jun tzúuc tzo'otz dzo'oc sactale'.

³³Mina'an mix ba'al yóokolcaab wa chica'an ti', leti'e' j beeta'ab u ti'al ma' u ch'a'ic sajaquil ti' mix ba'al.

³⁴Cu wa'atal j ba'atel tac yéetel le asab dzíidzic ba'alo'obo', leti'e' ajaw tuláacal dzíidzic ba'alche'ob.