Read Yucateco Job 42 Bible Online

Job 42 - Yucateco bible

Job 42

¹Jobe' tu núucaj u t'aan Yuumtzile', ca tu ya'alaj: Tene' in wojel cu páajtal a beetic tuláacal ba'al. Tuláacal ba'ax cu páajtal a beetic.

³¿Tene' máaxen u ti'al ma' wocsaj óoltic tuláacal ba'ax ca beetic u ti'al in chíicbesic in ma' na'atil? Tene' táan ca'ach in wa'alic ba'axo'ob ma' tu páajtal in na'atic, ba'axo'ob talamtac ma' tu páajtal in kaj óoltic.

⁴Teche' ta wa'alaj ti' teen: Qui' u'uyeni' in káat in t'anech; núuc teen le káat chi'oba'.

⁵Tac walquila', chéen in kaj óoltmaech ca'ach yéetel in xiquin, ba'ale' bejela'e' quin wiliquech tin wichil.

⁶Let o'olal bejela'e', quin wa'alic ma' jaaj ba'axo'ob tin wa'alaji', quin kexic in tuucul quin cutal ichil ma'ay lu'um yéetel ichil ta'anil káak.

⁷Cu dzo'ocol u láaj a'alic Yuumtzil le t'aano'ob ti' Joba', tu ya'alaj xan ti' Elifas: Sen p'uja'anen ta wéetel bey xan tu yéetel a wéet bisajba'ob, tumen ma' ta wa'alaje'ex ba'al jaaj tin wo'olali', je'el bix t'aanajilac Job in palitzile'.

⁸Bejela'e' ch'a'ex siete wacaxo'ob yéetel siete j tamano'obe', ca xi'ique'ex a wile'ex Job in palitzil, u ti'al a kubique'ex láaj tóocbil ta wo'olale'ex. In palitzil Job bíin payalchi'ina'ac ta wo'olale'ex, teen xane' bíin in wu'uy u payalchi', beyo' ma' bíin in jadze'exi' quex tumen ca najmatique'exe', tumen ma' ta wa'alaje'ex ba'axo'ob jaajtaqui' tin wo'olal je'el bix tu ya'alajilac Job in palitzile'.

⁹Elifaz, Bildad tu yéetel Zofare', j bino'ob u beeto'ob ba'ax tu ya'alaj Yuumtzil, Yuumtzil túune' tu yu'ubaj u payalchi' Job.

¹⁰Cu dzo'ocol u payalchi' Job tu yo'olal u yéet bisajba'obe', j su'ut u ayikalil tu ca'a téen tumen Ku, j dzaab ca'a máal u ya'abil ti' u úuchben ayikalil.

¹¹J bin túun xíimbaltbil tumen u sucu'uno'ob u yíidzino'ob, u quiico'ob yéetel u x yíidzino'ob, u yéet óolo'ob yéetel u yúuchben káaj óolalo'obe', ca tu beetajo'ob jun p'éel noj janal tu yotoch. Tu ya'alajo'ob ti' sen yaj tu yóolo'ob ba'ax úuch ti', tu qui'imaccunto'ob u yóol tu yo'olal ba'ax túuchi'ita'ab tu cuxtal tumen Yuumtzil, cu dzo'ocole' tu jujun túulilo'obe' tu dzajo'ob ti' jun jaatz taakin yéetel jun p'éel dzipit kab oro u ca'aj.

¹²Junab Kue' tu asab qui' t'antaj u dzooc u ja'abilo'ob Job ti' le yáaxo'obo'. Yanchaj catorce mil u j tamano'ob, seis mil u camello'ob, mil u dzáanal u bueyilo'ob u péecsa'al lu'um yéetel mil x burraob.

¹³Yanchaj xan catorce[5] u j xibil paalal yéetel óox túul u x ch'upul paalal.

¹⁴U nojochil u x ch'upul paale', tu dzáa x Jemima u kaaba'inte, u ca'a túule' x Cesia, u yóox túule' x Keren-japuc.

¹⁵Mina'an ca'ach tu yóokolcaab co'olelo'ob sen qui'ichpamo'ob je'el bix u x ch'upul paalalo'ob Jobe'. J dzaab u kanbáalba'ilo'ob ichil u kanbáalba'ilo'ob u sucu'uno'ob.

¹⁶Cu dzo'ocol lela', j cuxlaj Job ciento cuarenta ja'abo'ob, sen nuxib ca j quíimi, j kuch u yila'a u paalal, u yáabilo'ob, u ca'a áabilo'ob yéetel u yóox áabilo'ob.