Read Yucateco Job 5 Bible Online

Job 5 - Yucateco bible

Job 5

¹Job awat t'aanen, u'uy wa yaan máax núuquic a t'aan. ¿Ti' máax ángelil bíin wa'al a t'aan?

²Tumen u kubicubáa máac ti' sut meyaj loobe', jun p'éel ma' na'at tuucul cu bisic wíinic ti' quíimil.

³In wilmaj u chu'unpajal u ayikalchajal j ma' na'at wíinic, ba'ale' u yotoche' séeb bíin xu'ulsa'ac.

⁴Mix máax yaan áantic u paalal; tu cúuchilo'ob tacpoole' ma' tu beel ba'ax cu beeta'al ti'obi', mina'an máax j t'aan tu yo'olalo'ob.

⁵U joocho'obe', cu jaanta'al tumen máaxo'ob wi'ijo'ob ich ki'ixo'ob cu jóoya'al ti'ob, le yáax kiino' leti' j xu'uls u ayikalilo'ob.

⁶Le loobilo' ma' j lu'um cu xíitili', le num yajilo', ma' j lu'um cu tóop'oli'.

⁷leti' le wíinic beetic u taal le num yajo', bey je'el bix le xiquin káak cu ca'antal u tip'li'ise'.

⁸Wa ti' teen ca úuchuque' je'el in suut ti' Ku, u ti'al in dzáic tu kab ba'ax cu yúuchul ti' tene';

⁹¡leti'e' cu beetic sen ya'ab nucuch máactzilo'ob, ba'alo'ob ma' tu páajtal u na'ata'al tumen mix máac!

¹⁰Leti' beetic u káaxal ja' tu yóokol lu'um, yéetele' cu láaj jóoyabtic u coolilo'ob;

¹¹cu líiksic le óotzilo'obo' cu dzáic xan ma'alob anil ti' le máaxo'ob yaj u yóolo'obo'

¹²leti' kascuntic le ba'ax cu kaakas tucultic u beetico'ob le aj na'ato'obo' u ti'al ca jóokoc kaasil ti'ob.

¹³Leti' chuquic ti' u kaakas tuucul le aj na'ato', cu beetic ma' u béeytal le ba'alo'ob cu kaakas tucultico'

¹⁴¡T'at'al kabil u máano'ob quex ma'alob sáasilil kiin, ich éekjoch'e'enil yano'ob, bey yéetel áakabe'!

¹⁵Kue' cu toquic le óotzil cu beeta'al u yaayaj meyaj tumen le loolob máaco'obo';

¹⁶leti' u alab óolal le j ma' muuko'obo', ¡leti' maquic u chi' le máaco'ob kasa'ano'obo'!

¹⁷Qui' u yóol le j xiib cu ke'eyel tumen Kue'; ma' a kéex óoltic u keyaj le máax yaan tuláacal páajtalil ti'.

¹⁸Tumen leti'e' cu dzáic u dzaaquil le loob cu beetico'; u kabe' cu jaadz yéetel cu dzaacanquil.

¹⁹Cu toquiquech tu chi' quíimil je'el jay téen kabéete', ma' tu cha'ic u náadzal le kaas ti' techo'.

²⁰Tu kiinil wi'ije' bíin u toquech ti' u quíimilil, tu kiinil ba'atele', bíin u toquech ti' u yej máascab.

²¹Bíin u canan teech ti' máaxo'ob cu ya'alaj ba'alo'ob, ma' bíin a ch'a'a' sajaquil le quéen kuchuc le báan quíimilo'.

²²Bíin che'ejnaquech tu kiinilo'ob wi'ijil yéetel tu kiinilo'ob loobilo'ob, ma' bíin a ch'a'a sajaquil ti' u ba'alche'ilo'ob káaxi'.

²³Ma' bíin t'óochpajquech ti' u tuunichilo'ob a cooli', bíin a bisabáa yéetel u dzíidzic ba'alche'ob.

²⁴Bíin xi'ic utzil ti' teech ta wotoch, le quéen a xoc a wacaxe', bíin a wila'aj chuca'an.

²⁵Bíin sen ya'abchajac a ch'i'ibal je'el bix ya'abil u xíiwilo'ob le káaxo'.

²⁶Bíin nuxibchajquech láili' mu'uka'aneche', je'el bix u kaxabilo'ob espigaob yiijo'obe'.

²⁷Lelo' bey c ilmajil u yúuchulo'; ch'en xiquint ma'alob u ti'al ca a cane.