Read Yucateco Job 6 Bible Online

Job 6 - Yucateco bible

Job 6

¹Job túune' tu núucaj: Wa ca páatac u p'i'isil tuláacal in yaj óolalo'ob ti' jun p'éel x ch'uyub p'isibe',

³Je'el u máan u aalil ti' u sa'am lu'umil ka'anabe'. Let o'olal dzo'oc in sen t'aan.

⁴U Junab Kuil tuláacal páajtalil, dzo'oc u ch'iquic ti' teen u x julubo'ob, táan u yáalcab u ki'inamil tin wíinclil. Kue' dzo'oc u sajaccuntiquen yéetel u jaadz.

⁵¿Le burro yaan ba'al u jaanto' cu yawat wa? ¿Cu yawat wa le wacax ti' yaan tu yicnal u yoocho'?

⁶¿Máax jaantic x ma' ta'abil le ba'ax ma' qui'icuntano'? ¿Bix' u yu'uba'al u qui'il jun janal mina'an ta'ab ti'?

⁷Ba'ale' le ba'ax ma' tin wóoltaj in jaant mix jun téene', leti' quin jaantic bejela'e'.

⁸¡Quexi' ca dzáa Ku ti' teen ba'ax quin káatique'; quexi' wa ca u dzáa in dzíibolale'!

⁹¡Quexi'i ca u yóolt u muxene' u ti'al ca u xu'uls in cuxtale'!

¹⁰Quex tumen yaj u jáanpay óolale' lelo' je'el u taasic ti' teen qui'imac óolale', tumen tene' ma'atech in manba'alcuntic u ya'almaj t'aano'ob quili'ich Junab Ku.

¹¹Mina'an in muuk u ti'al in mukyajtic le cuxtala', mina'an ba'ax o'olal ca cuxlaquen.

¹²Ma' dzu'uyen je'el bix le tuunicho', mix dzu'uyen je'el bix le bronceo'.

¹³Ma' tin páajtal in meyajtiquinbáa tin juunal, mina'an máax áantiquen.

¹⁴Le j éet bisajbáil cu mukyaje', cu yaabilta'al, quex ma' chuca'an yóol ti' u Kuil tuláacal páajtali'.

¹⁵Ba'ale', te'exe' in wéet bisajbáile'ex dzo'oc a p'atquene'ex kaasil, beyen le t'o'ol ja'ob cu tijilo'obe'.

¹⁶Le ja'o', pu'ukpaja'an u yéemel, xa'akpajan yéetel bat bey xan yéetel ye'eb;

¹⁷Ba'ale' le quéen dzo'ococ u láaj yíibil le bato', cu tijil le t'o'ol ja'obo', cu taal le yáax kiinilo', cu sa'ap'al le ja'o'.

¹⁸Cu beetic u máan táanxel bejil le j múuch' xíimbalo'obo', cu náachtalo'ob te x tocoy lu'umo', u ti'a' ca quíimico'obi.

¹⁹U múuch' xiimbalilo'ob Tema yéetel Sabáe' cu caxantico'ob yéetel alab óolal le t'o'ol ja'obo',

²⁰Ba'ale' le quéen kuchuco'obe', cu p'áatal ma' jaaj u yicho'obi', cu p'áatal mix ba'al u biilal ti'ob u alab óolo'ob.

²¹Bey ucha'anil ti' teen ta wéetele'exo': cu yocol te'ex sajaquil iquil a wilique'ex u talamil in mukyaj.

²²Ba'ale', tene' ma' tin káatic ti' te'ex mix ba'al, mix tin káatic ti' te'ex taakin u ti'al a wáantiquene'ex,

²³mix ca a toquene'ex ti' in aj p'eec mix ca a bo'olnaque'ex u ti'al ca jáalkabta'aquen tumen le j oocolo'ob.

²⁴Ca'anbesene'exi' beyo' quin maquic in chi' e'ese'ex ti' teen ba'axo'ob quin beetic ma' tu beeli'.

²⁵Mix máac je'el u dzáic jun tzéelil t'aan toje', ba'ale' te'exe', ma' jaaj ba'ax ca wa'alique'ex ti' teni'.

²⁶Te'exe' ca p'a'astiquene'ex tu yo'olal ba'axo'ob quin wa'alic, choco pool t'aano'ob cu bisa'alo'ob tumen iik.

²⁷¡Te'exe', je'el a bisique'ex báaxlil u quíimil jun túul j ma' taatae', je'el xan a conique'ex a wéet bisajbáile'exe'!

²⁸Bejela'e', pactene'ex quetlan ichil; a'ale'ex ti' teen wa táan in tuus.

²⁹A'ale'ex ma' jaaj, le ba'ax dzo'oc a wa'alique'exo', kaj óolte'ex tu beel ba'ax quin wa'alic;

³⁰¿ca tucultique'ex chéen jun túulen j tuus wíiniquen ma' tu táan óoltic ba'ax cu ya'alic?