Read Yucateco Job 7 Bible Online

Job 7 - Yucateco bible

Job 7

¹U cuxtal jun túul máac way yóokolcaabe', bey u cuxtal jun túul aj ba'atel cu beetic u meyaje',

²bey jun túul palitzil cu yaayamtic bo'oye', bey jun túul aj meyaj cu pa'atic yéetel yaayamil u bo'ota'ale'.

³Tin cuxtale' in wilminbáa ichil ya'abcach tuuso'ob, bey mukyajil, áakab ca'a tac áakab.

⁴Le quéen chilaquene' le áakabo', bey mina'an xu'ulul ti'e'; quin ca'anal in sen bakliquimbáa tac in pa'atic u sáastal, quin tucultic: ¿Ba'axten ma' tu sáastal u ti'al ca líikiquen?

⁵Chuup in wíinclil yéetel x nookolo'ob bey xan yéetel u yooxelo'ob, cu ja'ilanquilo'ob u yajilo'ob in woot'el,

⁶Jach séeba'an u bin u xu'ulul in kiinilo'ob, ba'ax u láak ba'al, séeba'an bey u ju'ulul u x cay che'il u sacalta'al nooke',

⁷In Ku, ka'ajac ti' teech in cuxtale' bey jun p'éel múus iike', mix bikin bíin ca'a yanac ti' teen qui'imac óolal.

⁸Mix máac bíin u ca'a ilen; le quéen a pactene', cu xu'ulul in cuxtal.

⁹Je'el bix u samkajal le múuyal cu máano', bey le wíinic cu yéemsa'al te j mucnalo': mix bikin bíin ca'a jóokoqui', ma' bíin ila'ac tu ca'a téen tumen u láaktzilo'obi'.

¹¹Let o'olal ma' tu páajtal in maquic in chi'. Ichil in mukyaj yéetel yaj óole', bin in ca'aj in láaj a'al ba'ax quin mukyajtic.

¹²¿U ba'aba'alilen wa le ka'anab u ti'al ca a ch'úucten?

¹³Le quéen in tucult tin kaan bíin yanac ti' teen je'elele' le wenel bíin u lukes in yaj óolalo',

¹⁴ca chupiquen yéetel sajbe'entzil náayo'ob; ¡ca ja'akesic in wóol yéetel kaakas wayako'ob!

¹⁵Asab ma'alob ca a bidz in caal; quin yéeyic le quíimil, ma' le cuxtala'.

¹⁶Dzo'oc in ca'anal ma' in káat le cuxtala'. Cha'a in quíimil, tumen in cuxtale', bey jun p'éel múus ike'.

¹⁷¿Ba'ax u biilal ti' teech le wíinico'? ¿Ba'axten ca sen tucultic?

¹⁸¿Ba'axten ca ch'úuctic sáamsamal, u ti'al a túuntic mantadz?

¹⁹¿Ba'axten ma' ta lukesic a paacat ti' teen, u ti'al ca cha'ic in lukic quex chéen in túub?

²⁰wa quin kebanchajale', ¿ba'ax kaasil quin beetic ti' teech, u aj canan le wíinico'obo'? ¿Ba'axten ca júul pulic a x julubo'ob tin tojil? ¿Nojoch cuuchen wa a ti'al?

²¹¿Ma' wa tu páajtal a sa'atsic in keban? ¿Ma' wa tu páajtal a sa'atsic le kaas in beetmajo? Séeba'an bíin chilaquen te j lu'umo', le quéen a wóolt a caxtene', dzo'oc in quíimil.