Read Yucateco Job 9 Bible Online

Job 9 - Yucateco bible

Job 9

¹Jobe' j t'aanaje' ca tu ya'alaj: Lelo', ma'alob in wojelil jach bey tu jaajilo', wíinique' ma tu yutztal u ya'alique' ma' si'ipilja'an tu táan Ku.

³Wa yaan máax cu yóoltic ba'atel t'aan tu yéetele', ma' bíin páatchajac u ma' jajcuntic mix jun p'éel u t'aan ti' mil u t'aano'obi'.

⁴Kue', sen nojoch u páajtalil yéetel u na'at, ¿máax bíin káastic u beel ca xi'ic utz ti'?

⁵Junab Kue', ichil p'u'ujule cu péecsic le nucuch witzo'ob; mix máac ojéeltic máax jenico'ob

⁶Leti'e' cu beetic u péec le lu'umo' yéetel cu beetic u quíilbal tu'uxo'ob jedzecbal.

⁷Leti'e' cu ya'alic ti' le kiin ma' u jóokolo', cu ya'alic xan ti' le eeko'ob ma' u jóopbalo'ob.

⁸Ma' j kabéetchaj u yáanta'al u ti'al u sinic le ca'ano' tu dzáanche'etaj xan u ba'aba'alil ka'anabo'.

⁹Leti' j beet u múuch'ulilo'ob u eekilo'ob ca'an; Le nojoch Chimal eek, Orión yéetel Pléyades, bey xan tuláacal u múuch'ilo'ob u eekilo'ob j noojol.

¹⁰¡Leti'e' cu beetic ya'abcach nucuch máactzilo'ob, ba'alo'ob ma' tu páajtal u na'ata'alo'ob tumen mix máac!

¹¹Wa cu máan Ku tin tzéele', ma' bíin páatac in wiliqui', ma' bíin in wojéelt le quéen máanaque'.

¹²Wa cu ch'a'ic wa ba'ax u ti'alinte', ¿máax bíin páatac u tzáic ti'? ¿Máax bíin u keyic tu yo'olal ba'ax cu beetic?

¹³Wa cu p'u'ujul Kue', ma' tu séeb jóomol u yóol; tu ni' u yooc j t'ontalo'ob u aj ba'atelo'ob Rahab.

¹⁴¿Bix bíin in caxant t'ano'ob u ti'al in káat nu'uct ba'ax cu ya'alic Kue'?

¹⁵Quex buca'aj in wu'uyiquinbáe' j ma' si'ipile', leti'e' in aj p'is óol, chéen cu páajtal in káatic ch'a'a óolal ti';

¹⁶Wa ca in t'an u ti'al in káat chi'ite', in tucultique', ma' bíin u táan óolt ba'axo'ob bíin in wa'ali'.

¹⁷Leti'e' je'el u beetic u jadziquen chac ikale', lelo' bíin u beet u ya'abtal in yajilo'ob quex ma' unaji';

¹⁸bíin u sen chupen yéetel yaj óolal, ma' xan bíin u cha'a in ch'a'ic in wóoli'.

¹⁹¿Je'el u taal wa ma' káate'? Leti'e' sen yaan u páajtalil. ¿Wa ca in t'an u ti'al in káat chi'ite'? ¿Máax bíin u beet u taal?

²⁰Quex buca'aj tojil in cuxtal wa quex j ma' si'ipilene', leti'e' bíin u ya'al si'ipilnaja'anen.

²¹Tene' j ma' si'ipilen, lelo' mix ba'al in káat ya'ale'; dzo'oc u náacal in wóol j cuxtal.

²²Láili' bey tuláacalo'. Lela' leti' quin tucultica': Leti' máax cu xu'ulsic le aj kebano'obo' xan u xu'ulsic xan le j ma' si'ipilo'obo'.

²³Wa ti' jun p'éel nojoch loob cu quíimil j ma' si'ipilo'obe', Kue' cu che'ejtic u yaamyamil.

²⁴Cu p'atic le yóokolcaab tu kab loolob máaco'ob, cu pixic u yich le j ilaj ba'atelo'ob. Wa ma' Ku beetic beyo' ¿máax túun beetic?

²⁵In kiinilo'obe', seten séeba'an u yáalcabo'ob, quex ma' yanacten qui'imac óolali'.

²⁶séeba'an u bin je'el bix u bib u báab le cheemo'ob yóokol le ja'o', je'el bix juul le j coot tu yóokol le ba'ax cu chuquic u ti'al u jaanto'.

²⁷Wa quin wóoltic in tu'ubes in yaj óolo'ob, u ti'al ca p'áatac bey qui'imac in wóole',

²⁸in ki'inamilo'obe' cu ca'a ja'asico'ob in wóol, tumen in wojele', Kue' ma' tu ya'alic wa mina'an in si'ipil.

²⁹Wa leti' cu tucultic yaan in si'ipile', mix ba'al u biilal in p'isiquinbáa ca in wa'al mina'an.

³⁰Quex ca in p'o'o' in kab yéetel jabón yéetel ca in babal p'o'o' yéetel jo'ol ja'e',

³¹Kue', bíin u bulen ich luuk, tac in nook bíin taacchajac u xej tin wóokol.

³²Tene' ma' tu páajtal in quetlan t'aan ich yéetel Ku je'el bix in quetlan ich yéetel wíinique', mix in wa'alic ti' ca xi'ico'on tu'ux cu yúuchul tacpool.

³³¡Quexi'i ca yanac jun túul aj p'is óol ichilo'on, ca yanac páajtalil t óokol tu ca'a túulalo'on,

³⁴u ti'al ma' u cha'ic u jadziquen Ku, u ti'al xan ca u jáaws u sen sajaccuntiquen!

³⁵Teen túune' je'el in t'anic tu yéetel x ma' sajaquile'. Tumen in tucultique', ma' si'ipilchajaquen ti'i'.