Read Yucateco Salmos 104 Bible Online

Salmos 104 - Yucateco bible

Salmos 104

¹¡Yaan in qui'iqui' t'antic Yuumtzil yéetel tuláacal in wóol! ¡Buca'aj nojochilech Yuumtzil in Ku! Dzo'oc a búucbesicabáa yéetel nojbe'enil bey xan yéetel qui'ichquelemil;

²dzo'oc a búucbesicabáa yéetel sáasilil. Teech ta jayaj, bey jun p'éel bóoch, le ca'ano'.

³¡Teech ta jedzcuntaj tu yóokol le ja'o' u ocom tuunilo'ob a wotoch yaan te j ca'analo'! Ca sutbesic bolanil le múuyalo'obo'; ¡ca bin j xíimbal tu yóokol u xiik iik!

⁴Le iiko'obo', leti'obe' a j bisaj t'aano'ob, u tóoch'bal káake' leti' a j meeyjulo'ob.

⁵Le lu'uma' ta dzaj yóokol u chuunpakilo'ob u ti'al mix bikin ca péecnac tu cúuchil.

⁶Le taamcach ka'anabo' cu pixic ca'ach le lu'uma' bey je'el bix jun p'éel búuque'; Le ja'o', bey jun p'éen teep'e', cu pixic ca'ach le pu'uco'obo'.

⁷Ba'ale' le ca ta keyaje' j bini; le ca tu yu'ubaj a t'aane' j púudz bey u quíilbal cháaque'.

⁸J na'ac tu yóokol le pu'uco'obo', éem ti' le cabal lu'umo'obo', ca j bin ti' le cúuchil a we'esmaj ti'o'.

⁹te tu xuul tu'ux ta wa'alaj ti' ma' u ch'actico' u ti'al ma' u pixic le lu'um tu ca'a téeno'.

¹⁰Teech túuxtic u ja'il le nucuch sayabo'obo', ti' le áalcab ja'obo' cu yáalcabo'obo ti' le pu'uco'obo'.

¹¹Ti' le ja' cu yu'ukul tumen u ba'alche'ilo'ob káax; yéetele' cu máansic xan u yukajilo'ob u tzíiminilo'obpu'uc.

¹²Tu jáal le áalcab ja'obo' cu ku'ilanquil uch'íich'ilo'ob ca'an; ¡ti' cu kaayo'ob ichil u kabo'ob le che'obo'!

¹³Likbal ta wotoch te j ca'ano', ca jóoyabtic lepu'uco'obo'; yéetel u ya'abcach tuul ja'il le ca'ano', ca lukesic u yukajil le lu'uma'.

¹⁴Ca beetic u nuuctal xíiwo'ob u ti'al u jaant le ba'alche'obo', bey xan le paakalo'ob cu meyajtic le wíinic u ti'al u jóoksic u yo'och waaj ti' le lu'umo',

¹⁵u ti'al xan u jóoksic le vino qui'imaccunsic u yóolo', bey xan le aceite beetic u léembal le u yicho', yéetel le janal beetic u yantal u muuko'.

¹⁶Cu jáawsic u yukajil le che'obo', u kulche'ilo'ob Líbano pa'aka'an tumen Yuumtzilo'.

¹⁷Te'elo' cu ku'ilanquil le mejen ch'íich'o'obo', le cigüeñaobo' ti' caja'ano'ob ti' le ca'anal che'obo'.

¹⁸Le ca'anal pu'uco'obo' u ti'al le káaxil j yuuco'obo', ti' le nucuch tuunicho'obo' cu ta'acbesicuba'ob le j chi'ico'obo'.

¹⁹Ta beetaj le ujo' u ti'al u p'is le winalo'obo'; le kiino' u yoojel bikix u báalal.

²⁰Ca jayic u box nookil le áakabo', cu jóokol túun u ba'alche'ilo'ob le káaxo'.

²¹J chacmo'olo'obe' cu jéemcalo'ob tu yo'olal le ba'ax cubin u quiims u jaanto'obo'; cu káatico'ob ti' Ku ca dzabac u yo'ocho'ob.

²²Ba'ale' le quéen jóokoc le kiino' cu bino'ob chital tu áactuno'ob.

²³Wíinic túune' cu jóokol u ti'al j meyaj, cu meyaj tac le quéen ococ áakab.

²⁴¡Buca'aj ba'alo'ob u beetmaj, Yuumtzil! Tuláacal ta beetaj yéetel na'at; ¡a meyaje' tuláacal tu'ux cu yila'al!

²⁵Te'elo' ti' yaan le ka'anabo', chowac yéetel cóoch, tu'ux sen yaano'ob, u mina'an xooquil ba'alche'ob, mejentaco'ob yéetel nuuctaco'ob;

²⁶te cu báabo'ob le cheemo'obo', ti' yaan xan Leviatáni', le nojoch ba'alche' ta beetaj u ti'al báaxal te'elo'.

²⁷Tuláacalo'obe' cu pa'atajo'ob ti' teech ca dzáic u yo'ocho'ob je'ebix u najmale'.

²⁸Teche' ca dzáic ti'ob, leti'obe' cu molico'ob; ca je'ic a kabe' cu na'ajtalo'ob yéetel u ma'alobil;

²⁹wa ca ta'aquic a wiche', cu ja'akal u yóolo'ob; wa ca luksic u yiiko'obe', cu quíimilo'ob, cu suuto'ob ma'ay lu'umil.

³⁰Ba'ale' wa ca dzáic a wiik ti'obe', cu yantal cuxtalti'ob; beyo' ca túumbencunsic u táan yich le lu'uma'.

³¹¡U nojbe'enil Yuumtzile' mina'an u xuul! ¡Yuumtzile' cu qui'imactal u yóol ti' ba'ax u beetmaj!

³²Le lu'uma' cu quiquilanquil quéen pacta'ac tumen leti'; le pu'uco'obo' cu tulico'ob buudz le quéen ma'achac tumen leti'.

³³Ca'aliquil yaan teen cuxtale' bíin in kay kaayo'ob ti' Yuumtzil, in Ku.

³⁴Ca qui'imacchajac u yóol Yuumtzil ti' ba'axo'ob quintuclic, tumen chéen ti' leti' cu yantal teen qui'imac óolal.

³⁵¡Le j kebano'obo' ca samkajaco'ob ti' le lu'uma'! ¡Quíimic le j loolob wíinico'obo'! ¡Yaan in quiiqui' t'antic Yuumtzil yéetel tuláacal in wóol! ¡Qui'iqui' t'anta'ac le Yuumtzilo'!