Read Yucateco Salmos 105 Bible Online

Salmos 105 - Yucateco bible

Salmos 105

¹¡Dza'ex nib óolal ti' Yuumtzil! ¡Ka'ayte'ex u kaaba'! Tzicbate'ex ti' le caajo'obo' ba'axo'ob cu beetic.

²Kaye'ex kaayo'ob ti' u tzicbe'enil. ¡Tzicbate'ex u nucuch meyajo'ob!

³Ca'analchajac a wiche'ex tu yo'olal u quili'ich kaaba'. ¡Qui'imacchajac u yóol u pucsi'ikal le máaxo'ob caxtic le Yuumtzilo'!

⁴Nadzaba'ex ti' Yuumtzil, nadzaba'ex ti' u páajtalil; nadzaba'ex ti' Yuumtzil sáamsamal.

⁵Ka'ajse'ex u nucuch jak óol meyajo'ob, bey xan le u ya'almaj t'aano'ob dzo'oc u ya'alico',

⁶te'ex u ch'i'ilancabile'ex Abraham, u paliltzil Yuumtzil; te'ex u paalale'ex Jacob, te'ex u yéeyaje'ex.

⁷Yuumtzile' leti' c Junab Ku; ¡leti' ajawtic tuláacal le lu'uma'!

⁸Quex ca máanac mil ch'i'ilancabilo'obe', ma' bíin tu'ubuc ti' u dzaa t'aanilo'ob u nup t'aan,

⁹leti'e' nup t'aan tu beetaj yéetel Abrahame', ti' le dzaa t'aan tu beetaj ti' Isaaque',

¹⁰tu jedzaj bey a'almaj t'aan u ti'al Jacobe', bey nup t'aan mina'an u xuul u ti'al Israele',

¹¹le ca tu ya'alaje': Bin in ca'aj in dzáa teech u lu'umil Canaán a ti'alinte.

¹²Quex tumen leti'obe' jun p'íito'ob ca'achi, chéen wa jay túul táanxel lu'umilo'ob ti' le lu'uma',

¹³cu bino'ob ca'ach ti' cajal caajo'ob, cu bino'ob xan ca'ach ti' jejeláas ajawilo'ob,

¹⁴Kue' ma' tu cha'aj u loobilta'alo'ob tumen mix máaqui'; bey xan tu ya'aljilac ti' le ajawo'oba':

¹⁵Ma' a dzáique'ex a kabe'ex tu yóokol in aj yéeyajo'ob, mix a beetique'ex loob ti' in aj bóobato'ob.

¹⁶Tu beetaj u taal wi'ijil ti' le lu'umo', tu lukesaj xan tuláacal janal ti'ob.

¹⁷Ba'ale' tu túuxtaj José táanil ti'ob, le máax tu conajo'ob bey palitzile'.

¹⁸Tu beetajo'ob loob ti' u yooco'ob yéetel cadenaob; ¡tu kalajo'ob u caal yéetel fierro!

¹⁹U t'aan Yuumtzile', tu dzaj José ti' túuntajil, tac ca j kuch u kiinil u béeytal le ba'ax u ya'almaj José.

²⁰Le ajaw, le máax méektáantic ca'ach ya'abcach máaque', tu ya'alaj ca jáalkabta'ac José;

²¹ca tu dzaj dzuulil yéetel u nojchil u yotoch tu dzaj xan u beet u nojchil tu yóokol tuláacal ba'ax yaanti',

²²u ti'al ca u ca'anbes yéetel u beet aj ojéelajo'ob ti' u nuuquilo'ob bey xan ti' u nuxibilo'obo'.

²³Cu dzo'ocole' j taal Israel, lela' Jacob, ca cajlaj Egipto tu lu'umil Cam, bey jun túul táanxel lu'umile',

²⁴Yuum Kue' tu beetaj u ya'abtal u caajal, asab mu'ukano'ob, ti' le j egipciobo'.

²⁵Ba'ale' tu beetaj ca p'ecta'ac u caajal tumen le egiptoilo'obo', yéetel ca tu'usuco'ob u palitzilo'ob Ku.

²⁶Ku túune' tu túuxtaj Moisés u palitzil yéetel Aarón le máax u yéeymaje';

²⁷leti'obe' tu beetajo'ob u chíiculo'ob Ku te x tocoy lu'umo', ¡nucuch jak óol meyajo'ob tu lu'umil Cam!

²⁸Kue' tu túuxtaj jun p'éel éekjoche'enil, lela' tu pixaj tuláacal; ba'ale' le egipciobo' ma' tu yu'ubaj t'antaj u t'aano'obi'.

²⁹Tu sutaj ki'ikil u ja'il le áalcab ja'obo', ca tu quíimsaj u cayilo'ob;

³⁰tu chupaj yéetel muucho'ob le múuch' caajo'obo' tac xan tu'ux cu wenel le ajawo'.

³¹T'aanaj Kue' ca j chu'up u lu'umil Egiptoe' yéetel ya'abcach áacach bey xan yéetel uko'ob.

³²Ma' tu túuxtaj ja'i' ba'ale' tu túuxtaj bat yéetel u tóoch'bal káak tu yóokol le múuch' caajo'obo'.

³³Tu kascuntaj tu'ux paka'an uva yéetel tu'ux paka'an higo; tu kascuntaj u paka'an che'ilo'ob Egipto.

³⁴T'aanaj Kue' ca j kuch le sáako'obo'; ¡sen ya'abo'ob mix tu páajtal u xo'ocolo'ob!

³⁵¡Tu lukajo'ob u xíiwilo'ob le káaxo' yéetel tuláacal ba'ax tu dzaj ca'ach le lu'umo'!

³⁶¡Te Egiptoo' tu loobiltaj u ti'al quíimile' u yáax paal tuláacal u najilo'ob le j egipciobo'!

³⁷Cu dzo'ocole', Kue', tu jóokesaj u caajal chuupo'obyéetel oro yéetel plata, mix máac ichil le ch'i'ibalo'ob, j t'óochpaji.

³⁸Le egipciobo' qui'imacchaj u yóolo'ob le ca tu yilajo'ob táan u bino'ob le israelitaobo', tumen sajaco'ob ti'ob.

³⁹Kue' tu jayaj jun p'éel múuyal u ti'al u pixico'ob, yéetel jun p'éel káak u ti'al u sáasilcuuntico'ob yéetel áakab.

⁴⁰Tu káatajo'ob janale', ca túuxta'ab beecho'ob ti'ob, yéetel u waajil ca'ane' tu na'ajcunsajuba'ob.

⁴¹Tu xicaj le nojoch tuunicho', ca jóok ja'i', ca áalcabnaj ti' le x tocoy lu'umo' bey jun p'éel áalcab ja'e'.

⁴²Tumen ka'aj ti' u quili'ich dzaa t'aan, le tu beetaj ti' Abraham u palitzile'.

⁴³Bey bix úuchic u jóokesic Yuum Ku le u caajal uyéeymajo' ichil u yaawtil qui'imac óolal,

⁴⁴ca tu dzaj ti'ob u lu'umo'ob le máaxo'ob kultic beetbil kuobo' yéetel le u yich u meyaj le u láak caajo'obo',

⁴⁵tu beetaj u ti'al ca u tzico'ob yéetel ca utáanilcunto'ob u ya'almaj t'aano'ob yéetel u ca'anbesajo'ob Yuumtzil. Qui'iqui' t'anta'ac Yuumtzil.