Read Yucateco Salmos 106 Bible Online

Salmos 106 - Yucateco bible

Salmos 106

¹Qui'iqui' t'anta'ac Yuumtzil. Dza'ex nib óolal ti' Yuumtzil tumen leti'e' utz, yéetel u yaacunje' mina'an xu'ulul ti'

²¿Máax je'el u páajtal u tzicbatic u nucuch meyajo'ob Yuumtzile'? ¿Máax je'el u páajtal u qui' t'antic Yuumtzil je'ebix u najmale'?

³Qui' u yóolo'ob le máaxo'ob toj u cuxtalo'obo' mantadz xan cu beetico'ob ba'ax tu beelil.

⁴Yuumtzil, ka'ajaquen ti' teech, le quéen a beet utz ti' a caajal; ca yanaquen ta tuucul le quéen talaquech tocsajo',

⁵u ti'al ca in wil u qui' óolal le máaxo'ob a yéeymajo', u ti'al ca qui'imacchajac in wóol yéetel ca ca'analchajac in wich yéetel le caaj a ti'alintmajo'.

⁶Dzo'oc c kebanchajal je'el bix kebanchajic c taataobe'; dzo'oc u kéechel c cuxtal; dzo'oc c beetic ba'ax kaas.

⁷C taataob te Egiptoo' tu cúulpachcuntajo'ob a nucuch meyajo'ob; tu tu'ubsajo'ob a nojoch yaacunaj, te tu jáal le chac ka'anab tu ma' u'uyaj t'antecho'ob.

⁸Ba'ale' to'oco'ob tumen Ku, beyo' tu dzaj kaj óoltbil u páajtalil, táan u dzáic tziiquil ti' u kaaba'.

⁹Tu keyaj le chac ka'anabo' ca tu p'ataj tiquin; Ca tu beetaj u máano'ob tu taamil le ka'anabo' bey ti' jun p'éel x tocoy lu'ume'.

¹⁰Bey úuchic u toquico'ob ti' u aj p'eeco'obo', ti' u páajtalil le máaxo'ob p'ecmajilo'obo'.

¹¹Pi'ix tumen ja' u aj p'eeco'ob mix jun túul ti'ob p'áat cuxa'ani'.

¹²Bey túuno' tu yocsaj óolto'ob u dzaa t'aan Yuum Ku ca tu kayo'ob ti'e' qui'iqui' t'aano'ob.

¹³Ba'ale' jach tu séeblaquil tu tu'ubsajilo'ob le ba'axo'ob tu beetaj Kuo', ma' xan tu pa'atajo'ob u yojéeltico'ob ba'axo'ob unaj ubeetic leti'.

¹⁴Te x tocoy lu'umo'; tu dzajo'ob Ku ti' túuntajil, táan u káatico'ob ti' ca dzo'ocbesa'ac u dzíibolalo'ob.

¹⁵Ku túune' tu dzaj ti'obe' le ba'ax tu káatajo'obo', ba'ale' tu túuxtaj ti'obe' jun p'éel koja'anil cu quíimsaj.

¹⁶Ichil le péet caajo' tu saawinajto'ob bix cuxlic Moisés, bey xan bix cuxlic Aarón, le máax jun páaycunta'an tumen Yuumtzil u ti'al meyajtico'.

¹⁷Je'epaj túun le lu'umo' ca tu lukaj Datán, bey xan tu mucaj Abirán yéetel u múuch' loobil máaco'ob.

¹⁸¡Le káako'j eel tu yóokolo'ob! ¡Tu tóocaj le j loolob máaco'obo'!

¹⁹Tu pu'uquil Horebe' tu yiljo'ob oroe' ca tu beetajo'ob jun túul chan wacax, cu dzo'ocole' ca tu kultajo'ob;

²⁰¡tu kexajo'ob le nojbe'en Kuo' yéetel u yoochel jun túul wacax cu jaantic xíiw!

²¹Tu tu'ubsajo'ob Junab Ku u aj tocsajo'ob, máax tu beetaj nucuch ba'alo'ob Egitoe';

²²tu beetaj xan jak óol ba'alo'ob tu lu'umil Cam yéetel tu beetaj jak óol ba'alo'ob te chac ka'anabo'.

²³Kue' tu ya'alaj u xu'ulsico'ob; ba'ale' Moisés máax yéeya'an tumen Yuumtzile', t'aanaj tu yo'olalo'ob ca tu beetaj u jáawal p'uja'anil Yuum Ku; beyo' ma' xu'ulsa'abo'obi'.

²⁴Cu dzo'ocole' tu kex óolto'ob jun p'éel jadzutz lu'um, tumen ma' tu yocsaj óolto'ob u dzaa t'aan Yuum Kui';

²⁵ichil u paselo'obe' t'aanajo'ob kaas tu yo'olal Yuumtzil, ma' xan tu yu'ubaj t'anto'obi'.

²⁶Bey túuno' leti'e' tu líikesaj u kabe' ca tu ya'alaj, yaan u beetic u quíimilo'ob te x tocoy lu'umo',

²⁷bíin xan u beet u quíimil u ch'i'ibalo'ob yéetel yaan in ki'itbesico'ob ichil táanxel lu'umo'ob.

²⁸Tu beetuba'ob u palitzilo'ob Baalpeor, yéetel tu jaantajo'ob le quíimsbil siibal ku'ub ti' le j ma' kuxtal kuob.

²⁹Yéetel u kaasil u cuxtalo'obe' tu beetajo'ob u p'u'ujul Ku, ca j yanchaj ichilo'obe' jun p'éel báan quíimil.

³⁰Ba'ale' Finese' líike ca tu quíimsaj le máax tu yo'olal taal le kaaso', bey túuno' le báaquíimilo' j ch'éeni.

³¹Kue' ma' tu tu'ubsaj le ba'ax toj tu beetajo' u ti'al ka'ajsajil ichil u ch'i'ibalo'ob u ti'al ja'abo'ob mina'an u xuul.

³²Tu beetajo'ob xan u p'u'ujul Ku tu jáal u ja'il Meriba, yéetel tu yo'olalo'obe' jach kaas binic ti' Moisés,

³³tumen tu beetajo'ob u káajtal u yóole', leti' túune' j t'aanaj mix táan u tucultic ba'ax cu ya'aliqui'.

³⁴Ma' tu ch'éejsajo'ob le caajo'ob tu ya'alaj Yuumtzil ca xu'ulsa'aco'obe'.

³⁵Ba'ale' ba'ax tu beetajo'obe' tu xa'akbesajuba'ob yéetel le máaxo'ob cu kultico'ob beetbil kuobo' yéetel tu quetajo'ob bix u cuxtalo'ob:

³⁶tu kultajo'ob le beetbil kuobo', le o'olale' j lúubo'ob,

³⁷tumen tu kubajo'ob u xibil paalalo'ob yéetel u x ch'upul paalalo'ob bey quíimsbil siibal ti' le kaasil ba'alo'obo'.

³⁸Tu wecajo'ob x ma' si'ipil ki'ik: u ki'ikel u j xibil paalalo'ob yéetel u ki'ikel u x ch'upul paalalo'ob, tu kubajo'ob ti' u beetbil kuilo'ob Canaán. Le lu'umo' j bóon yéetel u ki'ikelo'ob,

³⁹leti'obe' tu kebantuba'ob, tu kascuntaj xan u cuxtalo'ob yéetel tuláacal ba'ax kaas tu beetajo'ob.

⁴⁰Yuumtzile' j kuuxilnaj tu yo'olal u caajal, tu ya'alaj ma' u kaj óolo'ob le máaxo'ob u ti'alo'ob ca'ache';

⁴¹ca tu xúump'attajo'ob tu kab le máaxo'ob cu kultico'ob beetbil kuobo', ca j t'onquinsa'abo'ob tumen u aj p'eeco'ob;

⁴²pe'ech'o'ob tumen u aj p'eeco'ob, ca éemsa'ab u j ca'analil u yicho'ob tu yáanal u páajtalilu aj p'eeco'ob.

⁴³To'oco'ob ya'ab u téenel tumen Ku, ba'ale' leti'obe' tu cúulpachcunto'ob ba'axo'ob tu tucultaj u beetic Yuumtzile' ca tu jach kubjuba'ob ti' u kasa'anilo'ob.

⁴⁴Chéen ba'ale' Kue' le ca tu yilaj yaj u yóolo'obe' yéetel tu yu'ubaj u yáacamo'obe',

⁴⁵ca ka'aj ti'e' le nup t'aan u beetmaj tu yéetelo'obe' ca tu kexaj u tuucul, tumen u yaacunje' jach sen nojoch;

⁴⁶¡Kue' tu beetaj u bisa'alo'ob yéetel utzil tumen máaxo'ob palitziltmailo'ob!

⁴⁷¡Toco'oni', Yuumtzil c Yuum Ku! ¡Molo'on ti' ichil le múuch' caajo'obo' u ti'al ca c qui'iqui' t'ant a quili'ich kaaba', yéetel xan qui'imac óolale' ca c qui'iqui' t'antech!

⁴⁸¡Qui'iqui' t'anta'ac Yuumtzil, u Ku Israel, u ti'al ja'abo'ob mina'an u xuul! ¡Tuláacal máaco'ob ca u ya'alo'ob: Ca béeyac! ¡Qui'iqui' t'anta'ac Yuumtzil!