Read Yucateco Salmos 107 Bible Online

Salmos 107 - Yucateco bible

Salmos 107

¹Dza'ex nib óolal ti' Yuumtzil, tumen leti'e' utz, tumen u yaacunaje' mina'an u xuul.

²A'ala'ac tumen le máaxo'ob to'oco'ob tumen le Yuumtzilo', le máaxo'ob tu tocaj ti' u páajtalil le aj p'eeco',

³le máaxo'ob tu much'quintaj ichil le caajo'obo' j xamanilo'ob yéetel j noojolilo'ob, j lakinilo'ob yéetel j chikinilo'ob.

⁴Saatal u máano'ob ca'ach te x tocoy lu'umo', ta j bejo' ma' tu nuptáanto'ob jun p'éel caaj u ti'al u cajtalo'obi';

⁵ukajo'ob, wi'ijo'ob, ¡ta'itac ca'ach u quíimilo'ob!

⁶Ba'ale' ichil u yaayaj óolalo'obe' ka'am t'aanajo'ob ti' Yuumtzil, leti'e' tu tocajo'ob ti' u mukyajo'ob.

⁷Cu dzo'ocole' tu dzajo'ob ti' u tojil bej u ti'al u bimbalo'ob ti' jun p'éel caaj, tu'ux u cajtalo'ob.

⁸Dza'ex nib óolal ti' Yuumtzil, tu yo'olal u yaacunaj, ¡tu yo'olal le utz cu beetic ti' le máaco'obo'!

⁹Tumen leti' luksic u yukajil máax ukaj yéetel cu dzáic ya'abcach janal ti' máax wi'ij.

¹⁰Ti' caja'ano'ob ca'ach ichil seten éekjoche'enile', kaalalo'ob ti' okom óolal, kaxa'ano'ob yéetel cadenaobo',

¹¹tu yo'olal ko'oxchajico'ob ti' u túuchi' t'aano'ob Yuumtzil, tu yo'olal tu kex óolto'ob cu tuclic beet le Aj Sen Ca'analo'.

¹²Dzaabo'ob tumen Ku ti' talam meyajo'ob; cu tóoch'pajalo'obe' mix máac áantico'ob.

¹³Ba'ale' ichil u yaayaj óolalo'obe' ka'am t'aanajo'ob ti' Yuumtzil, leti'e' tu tocajo'ob ti' u mukyajo'ob;

¹⁴tu jóokesajo'ob ti' le seten éekjoche'enile', yéetel tu tocajo'ob ti' le cadenaobo'.

¹⁵Dza'ex nib óolal ti' Yuumtzil tu yo'olal u yaacunaj, ¡tu yo'olal le utz cu beetic ti' le máaco'obo'!

¹⁶¡Leti'e' tu ca'acachaj le jool najo'ob beeta'ano'ob yéetel bronce! ¡Leti'e' tu xe'exe'et'aj le x kalabo'obo'!

¹⁷Le máaxo'ob kojano'ob yéetel yaj u yóolo'ob tu yo'olal u kasa'anilo'ob yéetel u kebano'obe',

¹⁸tu p'ectajo'ob tuláacal janal ¡ca j kucho'ob tu chi' quíimil!

¹⁹Ba'ale' ichil u yaayaj óolalo'obe' ka'am t'aanajo'ob ti' Yuumtzil; leti'e' tu tocajo'ob ti' u mukyajo'ob;

²⁰tu túuxtaj u t'aane', ca tu dzacajo'ob; ¡tu tocajo'ob ti' le mucnalo'!

²¹Dza'ex nib óolal ti' Yuumtzil tu yo'olal u yaacunaj, ¡tu yo'olal le utz cu beetic ti' le máaco'obo'!

²²Dza'ex nib óolal ti' tu yo'olal u siibalil qui'iqui't'aan; t'ane'ex yéetel qui'imac óolal, tu yo'olal le ba'axo'ob cu beetico'.

²³Jóok u binbalo'ob tu ka'anabil j coonolo'ob, táan u ch'actico'ob le ja'ob yéetel u cheemo'ob,

²⁴te'elo' tu taamilo'ob le ka'anabo' tu yilajo'ob u jak óol meyajo'ob Yuumtzil.

²⁵Le ca j t'aanaj Yuumtzile' j líik jun p'éel chac ikal cu líikesic nucuch cuclilo'ob;

²⁶cu na'acsa'alo'ob tac ca'an yéetel cu yéensa'alo'ob tactu taamil le ka'anabo'; ¡sa'at u j xiixib máaquilo'ob tu táan le sajquilo'!

²⁷Cu tacchalanquilo'ob beyo'ob cala'ane'; ¡mix ba'al meyajnajic ti'ob u na'ato'ob!

²⁸Ba'ale' ichil u yaayaj óolalo'ob káatnajo'ob ti'Yuumtzil; leti'e' tu tocajo'ob ti' u mukyajo'ob.

²⁹Tu sutaj salat iikil le chac ikalo', le cuclilo'ob túuno' jedzlajo'ob.

³⁰Le ca tu yilajo'ob jeedzel yanil le cuclilo'obo' qui'imacchaj u yóolo'ob ca j bisa'abo'ob tumen Kue' tu cúuchil tu'ux cu dzíiboltic u bino'obo'.

³¹Dza'ex nib óolal ti' Yuumtzil tu yo'olal u yaacunaj, ¡tu yo'olal le utz cu beetic ti' le máaco'obo'!

³²¡Ca'analcunte'ex u kaaba' tu táan u múuch'cabil caajo'! ¡Qui'iqui' t'ante'ex tu táan u múuch'cabil u nuuquilo'ob caaj!

³³Le Yuumtzilo' cu sutic le áalcab ja'ob yéetel le sayabo'obo' x tocoy yéetel tiquin lu'umo'ob;

³⁴le cáacab lu'umo' cu sutic sac ch'óoch'och lu'um tu yo'olal u kasa'anilo'ob u cajnáalilo'ob;

³⁵cu sutic le x tocoy lu'umo' u cúuchilo'ob ja', le tiquin lu'umo' cu sutic sayabilo'ob;

³⁶te'elo' ti' cu cajcuntic le máaxo'ob wi'ijo'obo', leti'ob túune' cu beetico'ob u caajalo'obi.

³⁷Cu colico'ob le káaxo'ob u ti'al u paakalo'ob, cu molico'ob túune' ya'abcach yich u meyajo'ob.

³⁸Leti'e' cu dzáic ba'ax kabéet ti'ob yéetel cu beetic u ya'abtalo'ob; cu beetic xan u ya'abtal u wacaxo'ob.

³⁹Ba'ale'; cu quíimilo'ob wa cu jun p'íittalo'ob tumen cu yeedzelo'ob, tu yo'olal le kaas yéetel le yajilo',

⁴⁰Kue' cu cúulpachcuntic le j yeeyedz máaco'obo' yéetel cu beetic u sa'atalo'ob ti' x tocoyo'ob x ma' bejil.

⁴¹Leti'e' cu jóokesic le óotzilo'ob ti' okom óolalo'ob; cu beetic u ya'abtal u láaktzilo'ob bey múuch' tamano'obe'.

⁴²Le quéen u yilo'ob le tziiquil máaco'ob lela' cu qui'imactal u yóolo'ob; le kaakas máaco'ob túuno' cu maquic u chi'ob.

⁴³Le máax yaan u na'ate', ma' u tu'ubsic lela' yéetel cu ch'a'a nu'uctic u yaacunaj Yuumtzil.