Read Yucateco Salmos 109 Bible Online

Salmos 109 - Yucateco bible

Salmos 109

¹Ku ma' u p'áatal x ma' a núuquic in payalchi',

²tumen chi'ob cu tuuso'ob yéetel kasa'ano'obe' cu t'aano'ob kaas tin wo'olal, ba'ale' chéen tuusil le ba'ax cu ya'alico'obo'.

³U p'eequilo'ob t'aano'obe' cu súut pachtiqueno'ob, ¡tio'olal mix ba'ale' cu taalo'ob u beeto'ob teen loob!

⁴Tu yo'olal in yaacunaje' cu taalo'ob tin wóokol. ba'ale' tene' quin payalchi'

⁵Tu sutajo'ob teen kaas tu yo'olal utz, tu sutajo'ob teen p'eequil tu yo'olal in yaacunaj.

⁶Dzáa jun túul j kasa'an j p'is óol ti' ca xotkinta'ac tumen le máax cu t'aan utz tu yo'olale';

⁷ca a'ala'ac si'ipa'an ichil le p'is óolo'; ca xotkinta'ac tumen máax toquic.

⁸¡Ca cuxlac chéen jun p'íit kiin ca ti'alinta'ac yich u meyaj tumen yaanal máac!

⁹¡Ca p'áatac j ma' yuum u paalal yéetel x ma' íichamil u yatan!

¹⁰¡Ca p'áatac chéen máanel u ca'aj u paalal, táan u káat máatano'ob! ¡Ca tojolch'inta'aco'ob tu juutul pakilo'ob u yotoch!

¹¹Ca bisa'ac tuláacal le ba'ax u ti'al tumen le j majan taakino'. Ca luksa'ac ti' tumen yaanal máaco'ob u yich u meyajo'.

¹²Ma' u yantal máax ch'a'ic óotzilil ti', mix ti' u j ma' yuum paalal.

¹³Ca xu'uluc u ch'i'ibalo'ob, ca tu'upuc u kaaba' u ti'al mix bikin.

¹⁴Ca ka'ajac ti' Yuumtzil u kasa'anil u taata le máaca', yéetel mix bikin ca u tup u keban u maama;

¹⁵ca ka'ajsa'ac mantadz u keban tumen Yuumtzil, ca u tup u ka'asajilo'ob tu yóokol le lu'umo'.

¹⁶Mix jun téen tu tuclaj u ch'a'ic óotzilil ti' le óotzilo'obo' mix ti' le j cabal óolo'obo' mix ti' le cu mukyajo'obo'. Tu ch'a'apachtajo'ob tac ca tu quiimsajo'ob.

¹⁷Bey tumen tu yéeyaj le loolob t'aano', ¡loolob t'anta'ac! Ma' tu yóoltaj qui' t'aani', ¡ma' u qui' t'anta'al!

¹⁸Ca pi'ixic tumen loolob t'aan bey yéetel jun p'éel búuque'; ca ococ tu jobnel yéetel tu baaquelo'ob bey ja'e' wa bey aceitee';

¹⁹¡ca pi'ixic bey yéetel jun p'éel búuque'! yéetel ca ye'edzec bey yéetel jun p'éel kaxnake'.

²⁰¡Bey ca bo'ota'ac in aj p'eeco'ob tumen Yuumtzile', bey xan le máaxo'ob cu t'aano'ob kaas tin wo'olalo'!

²¹Ba'ale' teche' Yuumtzil dzáa tziiquil ti' a kaaba' yéetel beet utz ti' teen. ¡Toquen tu yo'olal u yutzil a yaacunaj!

²²Jach óotzilen yéetel yaj in wóol; in pucsi'ikale' ucha'an loob ti'.

²³táan u bin u sa'atal bey jun p'éel bo'oye', ¡le iiko' cu jíiltiquen bey jun túul sáake'!

²⁴Iquil ma' tin janale' cu quiquilaanquil in píixo'ob; táan in dzo'oyol tumen mina'an ba'al in jaante.

²⁵¡Le máaco'obo' cu che'ejtiqueno'ob! ¡Le quéen u yileno'obe', cu p'a'astiqueno'ob táan u yúuntico'ob u poolo'ob!

²⁶Yuumtzil in Ku, áanteni', ¡toquen tu yo'olal a yaacunaj!

²⁷Yuumtzil, ca u yojéelto'obe', teche' lela' ta beetaj yéetel a kab.

²⁸Mix ba'al ti' ca loolob t'anta'aquen wa teech ca qui' t'antiquen. Leti'obe' ca u ch'a'ob subtal, ca'aliquil a paalile' táan u qui'imactal u yóol.

²⁹¡Ca chu'upuco'ob yéetel subtalil in aj p'eeco'ob! ¡Ca pi'ixico'ob tumen sublaquil bey yéetel jun p'éel nooke'!

³⁰Yéetel in chi'e' ma' tu bin xu'ulul u dzáic nib óolal ti' Yuumtzil; ¡yaan in qui'iqui' t'antic chúumuc ti' ya'abcach máaco'ob!

³¹Tumen leti'e' cu t'aan tu yo'olal óotzil yéetel cu jun páaycuntic ti' máaxo'ob xotkiintic.