Read Yucateco Salmos 115 Bible Online

Salmos 115 - Yucateco bible

Salmos 115

¹Yuumtzil, teche' nojbe'encuntabáa, ma' anojbe'encuntico'on; nojbe'encuntabáa tu yo'olal a yaacunaj yéetel tu yo'olal a jaajil.

²¿Ba'axten cu káat chi'itico'ob le j ma' ocsaj óolo'ob tu'ux yaan c Junab Kuo'?

³C Kue' ti' yaan te j ca'ano'; tu beetaj tuláacal ba'ax tu yóoltaj.

⁴U kuob le máaxo'ob kultico'ob beetbil kuobo' oro yéetel plata beeta'anilo'ob, ba'alo'ob beeta'ano'ob tumen máac yéetel u kabo'ob:

⁵yaan u chi'ob ba'ale' ma' tu páajtal u t'aano'ob; yaan u yicho'ob ba'ale' ma' tu páajtal u paacato'ob;

⁶yaan u xiquino'ob ba'ale' ma' tu páajtal u yu'ubajo'ob; yaan u ni'ob ba'ale' ma' tu páajtal u yúudzbeno'ob;

⁷yaan u kabo'ob ba'ale' ma' tu páajtal u maacho'ob yaan u yooco'ob ba'ale' ma' tu páajtal u xíimbalo'ob; ¡mix jun p'éel juum cu jóokol tu caalo'ob!

⁸Lajqueto'ob le ti' le kuob, le máaxo'ob beetico'obo', bey xan le máaxo'ob cu yocsic u yóol ti'obo'.

⁹Israelitaex, ¡alab óolte'ex Yuumtzil! Leti'e' cu yáantico'on yéetel cu canantico'on.

¹⁰AJ kiine'ex alab óolte'ex Yuumtzil. Leti'e' cu yáantico'on yéetel cu canantico'on.

¹¹Te'ex ca alab óoltique'ex Yuumtzil, ¡kub a wóole'ex ti'! Leti'e' cu yáantico'on yéetel cu canantico'on.

¹²¡Dzo'oc c ka'ajal ti' Yuumtzil, yaan u qui'iqui' t'antico'on! Yaan u qui'iqui' t'antic le j israelitaobo', yaan u qui'iqui' t'antic le j kiino'obo',

¹³yaan u qui'iqui' t'antic le máaxo'ob tziquico'obo', le máaxo'ob nuuctaco'ob bey xan le mejentaco'obo'.

¹⁴¡Ca ya'abcunsa'ac a ch'i'ibale'ex tumen le Yuumtzil bey xan u ch'i'ibalo'ob a paalale'ex!

¹⁵¡Yuumtzil máax beet ca'an bey xan le lu'uma' ca u dzáa ti' te'ex u qui' t'aanil!

¹⁶Le ca'ano' u ti'al Yuumtzil, ti' wíinic tu dzaj le lu'uma'.

¹⁷Le quimeno'obo' ma' tu qui'iqui' t'antico'ob Yuumtzil, mix le máaxo'ob cu yéemelo'ob tu cúuchil ch'ench'enquil.

¹⁸Ba'ale' to'one', bejela', yaan c qui'iqui' t'antic tac u ti'al kiino'ob mina'an u xuul. Qui'iqui' t'anta'ac Yuumtzil.