Read Yucateco Salmos 116 Bible Online

Salmos 116 - Yucateco bible

Salmos 116

¹In yaabiltmaj Junab Ku, tumen dzo'oc u yu'ubic in káat óolalo'ob,

²tumen tu ch'en xiquinten. ¡Tuláacal u kiinil in cuxtal yaan in t'anic tu kaaba'!

³Le quíimilo' tu bakalkaxten ti' u léecho'ob, u yaj óolalil mucnale' tu chucpachtajen, tu kalajen sajquil bey xan ki'inamil.

⁴Tin t'aanaj túun u kaaba' Yuumtzil, ca tin káataj ti', ca u toc in cuxtal.

⁵Yuumtzile' utz, cu ch'a'ic xan óotzilil; c Kue' leti'e' tuláacal yaacunaj.

⁶Yuumtzile' cu canantic le máaxo'ob cabal u yóolo'obo'. Le ca j p'áat mina'an in muuke' tu tocajen.

⁷Bejela'e' je'el u páajtal in wu'uyiquinbáa jeedzel in wanile', tumen Yuumtzile' utz tin wéetel;

⁸tumen tu tocajen ti' quíimil, tumen tu tocajen ti' okol yéetel ti' lúubul.

⁹Yaan in xíimbal tu táan Yuumtzil te tu lu'umil lemáaxo'ob cuxa'ano'obo'.

¹⁰Tene' yaan in wocsaj óolal, quex ca in wa'al: Jach nojoch in mukyaj.

¹¹Ichil in yaayamile', tin wa'alaj tuláacal wíinique' j tuus.

¹²¿Bix je'el u páajtal in bo'otic ti' Yuumtzil, tuláacal le utz u beetmaj teno'?

¹³¡Yaan in we'esic u qui' óolalil in tocsajil yaan xan in ch'a'achi'itic u kaaba'!

¹⁴Yaan in dzo'ocbesic in dzaa t'aano'ob ti' Yuumtzil tu táan tuláacal u caajal.

¹⁵Cu sen yaatal tu yóol Yuumtzil u yilic u quíimil le máaxo'ob yaabiltmailo'.

¹⁶¡Yuumtzil tene' a palitzilen! ¡Tene' u paalen a x palitzil! Teche' dzo'oc a cotzic le léecho'ob u kaxmajeno'ob ca'acho'.

¹⁷Iquil in dzáic teech nib óolale', quin kubic ti' teche' quíimsbil ti'ibil óolalo'ob, quin ch'a'a chi'itic xan a kaaba' Yuumtzil.

¹⁸Yaan in dzo'ocbesic in dzaa t'aano'ob ti' Yuumtzil, tu táan tuláacal u caajal,

¹⁹tu sujuy táancabilo'ob u kulnaj Yuumtzil, ¡chúumuc ti' teech Jerusalén! ¡Qui'iqui' t'anta'ac Yuumtzil!