Read Yucateco Salmos 118 Bible Online

Salmos 118 - Yucateco bible

Salmos 118

¹Dza'ex nib óolal ti' Yuumtzil, tumen leti'e' utz; tumen u yaacunaje' mina'an u xuul.

²U ya'alo'ob le israelitaobo': U yaacunaje' mina'an u xuul.

³U ya'alo'ob le aj kiino'obo': U yaacunaje' mina'an u xuul.

⁴U ya'alo'ob le máaxo'ob tziquic Yuumtzilo': U yaacunaje' mina'an u xuul.

⁵Ichil in yaj óolale' tin t'anaj Yuumtzil; leti'e' tu ch'en xiquinten, ca tu dzaj teen jáalkabil.

⁶Yuumtzile' tin wéetel yaan; mina'an teen sajaquilil. ¿Ba'ax je'el u páajtal u beetic teen wíinique'?

⁷Yuumtzile' tin wéetel yaan; leti'e' cu yáantiquen. ¡Bíin in wil u dzáancha'ata'al máaxo'ob u p'ecmajeno'obo'!

⁸Asab ma'alob ca alab óolnac máac ti' Yuumtzil ma' ca u alab óolt yéet wíiniqui'.

⁹Asab ma'alob ca alab óolnac máac ti' Yuumtzil ma' ca alab óolnac ti' nucuch dzuulo'obi'.

¹⁰Tuláacal múuch' caajo'obe' tu bakpachteno'ob, ba'ale' tu kaaba' Yuumtzile' tin dzáancha'atajo'ob.

¹¹Tu bakpachteno'ob ti' tuláacal tzéelilo'ob, ba'ale' tu kaaba' Yuumtzile' tin dzáancha'atajo'ob.

¹²Tu bakpachteno'ob bey xuuxo'obe', ba'ale' u p'uja'anilo'obe' j tu'up bey u káakil sojole', ¡tu kaaba' Yuumtzile' tin dzáancha'atajo'ob!

¹³Tu túulch'intajeno'ob yéetel muuk u ti'al ca lúubuquen, ba'ale' Yuumtzile' j taal u ti'al u yáanten.

¹⁴Tene' quin kaay ti' Yuumtzil, máax cu dzáic teen muuk. Leti'e' in tocsajil.

¹⁵Tu yotocho'ob le máaxo'ob toj u cuxtalo'obo' yaan u qui'imac óol kaayilo'ob dzáancha'atajil: ¡U páajtalil Yuumtzile' tu taasaj dzáancha'atajil!

¹⁶¡U páajtalil Yuumtzile' mina'an u láak beyo'! U páajtalil Yuumtzile' tu taasaj dzáancha'atajil.

¹⁷¡Ma' bíin quíimiqueni'; ba'ale' yaan in cuxtal u ti'al in tzicbalt le ba'ax tu beetaj Yuumtzilo'!

¹⁸Yuumtzile' dzo'oc u chichich jadziquen, ba'ale' ma' tu cha'aj in quíimili'.

¹⁹¡Je'ebec teen u jool najilo'ob kulnaj, tumen in káat ocol in dzáa nib óolal ti' Yuumtzil!

²⁰Lela' leti' u jool najil Yuumtzil; ti' lela' bíin ococ le máaxo'ob ocsaj óolo'obo'.

²¹Yuumtzil, quin dzáic teech nib óolal, tumen dzo'oc a núuquiquen, yéetel tumen teech in tocsajil.

²²Le tuunich p'ecta'ab tumen le j pakbalo'obo' kuch u beet u noj tuunichil le chuunpako'.

²³Lela' beeta'ab tumen Yuumtzil. to'one' c ilic bey jun p'éel jakbe'en ba'ale'.

²⁴Lela' leti' u kiinil meyajnajic Yuumtzil; ¡kaaynaco'on yéetel qui'imacchajac c óol bejela'e'!

²⁵Yuumtzil, beeto'on utz. ¡toquico'oni'! Yuumtzil, ¡beet ca xi'ic to'on utzil!

²⁶¡Qui'iqui' t'anbil le máax cu taal tu kaaba' Yuumtzilo'! ¡tu kulnaj Yuumtzile' c qui'iqui' t'antique'ex!

²⁷Yuumtzil' leti' c Yuum Ku; ¡leti' dzáic to'on sáasil! Cáajac le kiinbesajo', bise'ex u kab che'ob tac tuti'itzilo'ob le u multuunil kultajo.

²⁸Quin dzáic teech nib óolal tumen teech in Ku, yéetel quin qui'iqui' t'antic a nojochil.

²⁹Dza'ex nib óolal ti' Yuumtzil, tumen leti'e' utz; tumen u yaacunaje' mina'an u xuul.