Read Yucateco Salmos 119 Bible Online

Salmos 119 - Yucateco bible

Salmos 119

¹Qui' yóolo'ob le máaxo'ob cu yutzil cuxtalo'obo' yéetel cu xíimbalo'ob je'ebix u ca'ansaj Yuumtzil

²Qui' yóolo'ob le máaxo'ob cu táan óoltico'ob u ya'almaj t'aan Yuumtzil, cu caxtico'ob xan yéetel tuláacal pucsi'ikal;

³le máaxo'ob ma'a tech u beetico'ob mix baal kaas, le máaxo'ob cu bino'ob tu bejil Yuumtzil.

⁴Teche' a wa'almaj ca dzo'ocbesa'ac a wa'almaj t'aano'ob jacht u beel.

⁵¡Quexi'i ca jach jéedzquen ti' u yu'ubaj t'aanil a wa'almaj t'aano'obe'!

⁶Ma' tu yantal ba'ax o'olal in sublactal le quéen in táan óolt tuláacal a tzolbe'en t'aano'obi'.

⁷Yaan in qui'iqui' t'antiquech yéetel jaaj óol pucsi'ikal le quéen dzo'ococ in canic a ma'alob a'almaj t'aano'obe'.

⁸¡In káat in dzo'ocbes a wa'almaj t'aano'ob! ¡Ma' a xúump'attiquen!

⁹¿Bix je'el u páajtal u bisic le táanquelem xi'ipal jun p'éel utzil cuxtale'? ¡Chéen ca cuxlac táan u dzo'ocbesic a wa'almaj t'aan!

¹⁰Tene' quin caxtiquech yéetel tuláacal in pucsi'ikal; ma' cha'ic in tzeliquinbáa ti' a wa'almaj t'aano'ob.

¹¹Dzo'oc in ta'aquic a t'aano'ob tin pucsi'ikal u ti'al ma' in kuchul j kebantal ta táan.

¹²¡Qui'iqui' t'antbilech Yuumtzil! ¡Ca'anbes ti' teen a wa'almaj t'aano'ob!

¹³Yéetel in chi' bíin in tzicbalt tuláacal le tzolbe'en t'aano'ob ca bin a wa'alo'.

¹⁴Yaan u qui'imactal in wóol ti' u beelil a wa'almaj t'aano'ob, asab ti' tuláacal ayikalilo'ob.

¹⁵Yaan in tuclic a tzolbe'en t'aano'ob yaan xan in táan óoltic a bejilo'ob.

¹⁶Yaan u qui'imactal in wóol yéetel a wa'almaj t'aano'ob ma' xan bíin tu'ubuc teen a t'aani'.

¹⁷¡Dzáa cuxtal ti' le a paalila'! ¡Yaan in dzo'ocbesic ba'ax ca wa'alic!

¹⁸P'il in wich u ti'al ca in pact u jak óolalo'ob a ca'anbesaj.

¹⁹Tene' j táanxel lu'umilen ti' le lu'uma'; ma' a ta'aquic ti' teen a wa'almaj t'aano'ob.

²⁰Quin wu'uyic naat'al in pucsi'ikal tu yo'olal u dzíibolalil in kaj óoltic a wa'almaj t'aano'ob.

²¹Teche' ca keyic le j ma' subtalo'ob bey le j loolob t'anta'ano'ob cu náachtalo'ob ti' a wa'almaj t'aano'obo'.

²²Náachcunten ti' u pooch'ilo'ob yéetel ti' u kex óolalo'ob, tumen dzo'oc in ti'alintic a tzol t'aano'ob.

²³Quex j páajtalil máaco'ob ca u tuculto'ob u beetico'ob teen kaase', le a paalila' yaan u dzáic u tuucul ti' a wa'almaj t'aano'ob.

²⁴Tene, cu qui'imactal in wóol ti' a wa'almaj t'aano'ob; leti'obe' in j tzol xiquino'ob.

²⁵Ta'itac in quíimil; ¡dzáaten cuxtal je'el bix a dzaa t'antmaile'!

²⁶Dzo'oc in wa'alic teech bix in cuxtal, teech túune' dzo'oc a núuquiquen. ¡Ca'anbes teen a wa'almaj t'aano'ob!

²⁷Dzáa teen na'at u ti'al ca in dzo'ocbes a tzool t'ano'ob, tumen in káat tuucul ti' a jak óol meyajo'ob.

²⁸Buulul in wanil ti' u ya'alilo'ob ich, ti' ki'inamil, ¡Dzáen ti' jejedzquil je'ebix a dzaa t'antmaile'!

²⁹Náachcunsen ti' u bejil tuus, beet teen utz yéetel ca'anbesaj.

³⁰Dzo'oc in yéeyic u bejil le jaajo' yéetel quin dzíiboltic u tzool t'aano'ob.

³¹Yuumtzil dzo'oc in takiquinbáa ti' a wa'almaj t'aano'ob; ¡ma' a chupiquen yéetel subtalil!

³²Quin seba'ancuntic in dzo'ocbes a wa'almaj t'aano'ob, tumen ca chupic yéetel qui'imac óolal in pucsi'ikal.

³³Yuumtzil, e'es teen u bejil a wa'almaj t'aano'ob, tumen in káat in xíimbalt tac tu xuul.

³⁴Dzáa teen na'at u ti'al in dzo'ocbesic a ca'ansaj, ¡in káat in wu'uyaj t'ant yéetel tuláacal pucsi'ikal!

³⁵Bisen ti' u bejil a wa'almaj t'aano'ob, tumen ti' leti' yaan in qui'imac óolal.

³⁶Beet ca u táanilcunt in pucsi'ikal a wa'almaj t'aano'ob, ma' le náajalo'ob kaas u caxta'alo'obo'.

³⁷Ma' a cha'ic in dzáic in paacat ti' u ma' jaajil kuob; ¡dzáaten cuxtal u ti'al in xíimbalt a beel!

³⁸Ca a jedzcunt ti' a paalila' le dzaa t'aano'ob ca a beetic ti' le máaxo'ob tziquiquecho'.

³⁹Náachcunt ti' teen, a'alaj ba'al cu sajaccuntiquen, tumen a wa'almaj t'aano'obe' ma'alobtaco'ob.

⁴⁰Tene' táan in dzíiboltic a tzolbe'en t'aano'ob; ¡dzáaten cuxtal tumen teche' utzech!

⁴¹E'es teen a yaabilaj yéetel a tocsajil Yuumtzil, je'el bix ta dzaj u t'aanile'.

⁴²Bey túuno' je'el u páajtal in núuctic ti' le máax cu bin u poch'eno, tumen in woquesmaj in wóol ti' a t'aan.

⁴³Ma' a luksic tin chi' u jaajil t'aan, tumen táan in pa'ataj ti' a wa'almaj t'aano'ob.

⁴⁴¡In káat mantadz in dzo'ocbes a ca'anbesajo'ob, tac u ti'al kiino'ob mina'an u xuul!

⁴⁵Beyo' je'el u páajtal in cuxtal ti' jáalkabile', tumen tin dzo'ocbesaj a ca'anbesajo'ob.

⁴⁶Yaan in tzicbaltic a wa'almaj t'aano'ob tu táan ajawo'ob ma' xan bíin in ch'a'a subtali'.

⁴⁷Tumen in yaacuntmaj a wa'almaj t'aano'ob quin wu'uyic qui'imac in wóol tu yéetelo'ob.

⁴⁸In yaacuntmaj yéetel quin dzíiboltic a wa'almajt'aano'ob, yéetel quin sen tucultic a ca'anbesajo'ob.

⁴⁹Ka'ajac teech le t'aan ta dzaj ti' le a paalila'; ti' leti'e' ta beetaj in dzáic in pa'atalil.

⁵⁰Lela' leti' in qui'imac óolal ichil okom óolal: tumen yéetel a dzaa t'aano'obe' ca dzáic teen cuxtal.

⁵¹Le j ma' subtalo'obo', mantadz cu ya'alico'ob teen ba'al, ba'ale' ma' tin tzeliquinbáa ti' a ca'anbesaji'.

⁵²Quin ka'ajsic a tzol t'aano'ob ti' le kiino'ob máanja'ano'obo', Yuumtzil ti' leti'ob túune' cu yantal teen qui'imac óolal.

⁵³Le j loolob máaco'ob cu xúump'attico'ob a ca'anbesajo' cu chupiqueno'ob yéetel kuuxilil.

⁵⁴Te táanxel lu'um tu'ux yaneno', a wa'almaj t'aano'obe' in kaayo'ob.

⁵⁵Yuumtzil, ti' áakabo'obe' quin ka'asiquech; ¡in káat in dzo'ocbes a ca'anbesaj!

⁵⁶Ba'ax unaj in beetique' leti'ela': in wu'uyaj t'antic a tzolbe'en t'aano'ob.

⁵⁷Yuumtzil chéen ti' teech, tuláacal ba'ax yaan teen; dzo'oc in dzáic tin wóol in dzo'ocbesic a t'aano'ob.

⁵⁸Yéetel tuláacal pucsi'ikal tin táanilcuntaj in qui'imaccunsic a wóol; beet utz ti' teen je'el bix ta dzaj u t'aanile'.

⁵⁹Tin dzajinbáa in tucult ma' ma'alob cuxliqueni', ca suunajen in dzocbes a wa'almaj t'aano'ob.

⁶⁰Tin séebcunsajinbáa, ma' j xaanchajen in dzo'ocbes a wa'almaj t'aano'obi'.

⁶¹Le j loolob máaco'obo' dzo'oc dzáico'ob léecho'ob tin bakpach, ba'ale' tene' ma' tin tu'ubsaj a ca'anbesaji'.

⁶²Chúumuc áakabe' quin líikil in dzáa teech nib óolal tu yo'olal u tojil a tzool t'aano'ob.

⁶³Tene' u yéet óolen le máaxo'ob tziquiquecho', bey xan le máaxo'ob dzo'ocbesic a ca'anbesajo'.

⁶⁴Yuumtzil le lu'umo' chuup tu yéetel a yaacunaj; ¡ca'anbes teen a wa'almaj t'aano'ob!

⁶⁵Yuumtzil teche' ta beetaj utz ti' le a paalila', je'ebix ta dzajilac u t'aanile'.

⁶⁶Ca'anbesten ma'alob tuucul yéetel ca yanac teen kaj óolalil, tumen quin alab óoltic a wa'almaj t'ano'ob.

⁶⁷Ma'ili' cabalcunsa'ac in wóole' tin beetaj ya'abcach ba'alo'ob ma' nu'uca'ani', ba'ale' bejela'e' in dzaamaj in wóol ti' a t'aan.

⁶⁸Teche' utzech yéetel ca beetic utz; ¡ca'anbes teen a wa'almaj t'aano'ob!

⁶⁹Le j ma' subtalo'obo' cu taquico'ob in pool tu yo'olalba'ax ma' jaaji', ba'ale' tene' quin dzo'ocbesic a tzool t'aano'ob yéetel tuláacal in pucsi'ikal.

⁷⁰Leti'obe' kaalal u tuuculo'ob, ba'ale' tene' cu qui'imactal in wóol yéetel a ca'anbesaj.

⁷¹Tu beetaj teen utz úuchic u cabalcunsa'al in wóol, tumen beyo' tin canaj a wa'almaj t'aano'ob.

⁷²In ti'al tene' asab co'oj u tojol u ca'anbesaj a chi' ma' ti' ya'abcach taakin beeta'an yéetel oro wa yéetelplata.

⁷³Teech ta beetajen yéetel ta dzaj teen wíinclil; dzáaten na'at u ti'al in canic a wa'almaj t'aano'ob.

⁷⁴Le máaxo'ob tziquiquecho' yaan u qui'imactal u yóolo'oble quéen u yileno'ob, tumen ti' a t'aan in dzaamaj in pa'atajil.

⁷⁵Yuumtzil tene' in wojel a wa'almaj t'aano'obe', utzo'ob, yéetel ma'alob tuucul ca beetic in mukyaj.

⁷⁶¡A yaacunaje' meyajnac teen u ti'al qui'imac óolal, je'ebix le dzaa t'aan ta beetaj tene'!

⁷⁷E'es teen a muumun yaacunaj, beet in cuxtal, tumen ti' a ca'ansaje' yaan teen qui'imac óolal.

⁷⁸Sublaccunsa'aco'ob le máaxo'ob cu ya'alico'ob ba'alo', tumen tu yo'olal mix ba'ale' cu dzico'ob teen yaayaj cuxtal; tene' in káat tuucul ti' a wa'almaj t'aano'ob.

⁷⁹U much'juba'ob tin wéetel le máaxo'ob tziquiquecho' yéetel le máaxo'ob u kaj óolo'ob xan a tzolbe'ent'aano'obo'.

⁸⁰In pucsi'ikale' cu chuca'anchajal u yóol ti' a wa'almaj t'aano'ob, u ti'al ma' in kuchul in ch'a'a subtal.

⁸¹Yéetel yaayamil quin pa'atic a toquiquen; ¡tumen in dzaamaj in pa'atajil ti' a t'aan!

⁸²In wicho'obe' táan u xu'upulo'ob iquil in pa'atic a dzaa t'aan; quin wa'alique': ¿Ba'ax kiin quéen taalaquech a qui'imaccunsin wóol?

⁸³Quex tumen jun túul nuxiben mix ba'al in biilal yéetel tu'ubsa'anene', ma' in tu'ubes a wa'almaj t'aano'obi'.

⁸⁴¿Tac ba'ax kiin jach yaan in pa'ataj? ¿Tac ba'ax kiin le quéen a p'is óolt le máaxo'ob cu ch'a'apachtiqueno'obo?

⁸⁵Kaakas t'aan máaco'ob máaxo'ob ma' tu dzaa óoltico'ob a ca'anbesaje' dzo'oc u páanico'ob in mucnal.

⁸⁶¡Áanteni', tumen táan in ch'a'apachta'al tu yo'olal mix ba'al! ¡A wa'almaj t'aano'obe' tuláacalo'ob jaajtaco'ob!

⁸⁷Ta'itac in lukesa'al ti' le lu'umo', ba'ale' mantadz tin dzo'ocbesaj a tzol t'aano'ob.

⁸⁸Je'ebix a wojel yaacunaje', dzáa teen cuxtali'; beyo' quin dzo'ocbesic a tzol t'aano'ob.

⁸⁹Yuumtzil a t'aane' mina'an xu'ulul ti'; ¡jejedzqui yanil te j ca'ano'!

⁹⁰A jaaje' jedza'an jeedzel yanil; teech ta utzil jedzcuntaj le lu'uma' bey xan p'áatico'.

⁹¹Tuláacal bey p'aatlil je'el bix a wa'almaj t'antmailo', tumen tuláacalo'obe' ti' yano'ob ta meeyjule'.

⁹²Wa ma' úuchic u taasic teen qui'imac óolal a ca'ansaje', le okon óolalo' bejela'a' dzo'oc u xu'ulsiquene'.

⁹³Mix bikin quin in tu'ubes a wa'almaj t'aano'ob, tumen tu yo'olalo'obe' a dzaamaj teen cuxtal.

⁹⁴¡Toqueni', tumen a ti'alen. In dzo'ocbesmaj a wa'almaj t'aano'ob!

⁹⁵Le loolob máaco'obo' táan u pa'atico'ob u súutuquil uti'al u xu'ulsiqueno', ba'ale' tene' in dzaamaj in xiquin ti' a tzolbe'en t'aano'ob.

⁹⁶In wilmaje', tuláacal ba'alo'ob yaan xu'ulul ti'ob, ba'ale' a wa'almaj t'aano'obe' mina'an xu'ulul ti'ob.

⁹⁷¡Buca'aj in yaacuntmail a ca'ansaj! ¡Bul kiin in dzaamaj in tuucul ti' leti'!

⁹⁸A wa'almaj t'aano'obe' mantadz in ti'alo'ob; dzo'oc u beetiqueno'ob asab ojéelajen, ti' in aj p'eeco'ob.

⁹⁹Quin ch'a'a nu'uct asab ti' tuláacal in aj ca'anbesajo'ob, tumen quin ya'ab tucultic a tzolbe'en t'aano'ob.

¹⁰⁰Quin ch'a'a nu'uc asab ma'alob ti' le nuxibo'obo', tumen quin wu'uyaj t'antic a wa'almaj t'ano'ob.

¹⁰¹Dzo'oc in náachcuntic in wooc ti' tuláacal kaakas bej u ti'al ca in dzo'ocbes a t'aan.

¹⁰²Ma' in tzelinbáa ti' a ca'ansajo'obi', tumen teech máax ca'ansiquen.

¹⁰³Asab ch'ujuc ti' in na'aca'an a dzaa t'aan ti' le caab tin chi'i'.

¹⁰⁴Ti' a wa'almaj t'aano'obe' dzo'oc in jóokesic ch'a'a nu'uctajil; le o'olale' quin p'ectic tuláacal u bejil tuus.

¹⁰⁵A t'aane' x t'uchub sáas u ti'alint in wooc, yéetel cu sáasilcuntic in beel.

¹⁰⁶Tin beetaj jun p'éel dzaa t'aan, bin in ca'aj xan in dzo'ocbese; ¡bin in ca'aj xan in dzo'ocbes a ma'alob a'almaj t'aano'ob!

¹⁰⁷Yuumtzil quin wu'uyiquinbáa jach yaj in wóol; ¡dzáaten cuxtal je'el bix a wa'almaje'!

¹⁰⁸Yuumtzil kam u siibalo'ob in chi' yéetel ca'ans teen a wa'almaj t'aano'ob.

¹⁰⁹Mantadz ti' yanen tu chi' quíimile', ba'ale' ma' teech in tu'ubsic a ca'ansaj.

¹¹⁰Cu dzico'ob teen léechel loolob máaco'obo', ba'ale' ma' tin tzeliquinbáa ti' a wa'almaj t'aano'ob.

¹¹¹A wa'almaj t'aano'obe' quin ti'alintic tac mina'an u xuul, tumen leti'obe' cu qui'imaccunsico'ob u yóol in pucsi'ikal.

¹¹²Yéetel tuláacal pucsi'ikal in dzaamajimbáa u ti'al in dzo'ocbes a wa'almaj t'aano'ob, mantadz, tac tu xuul.

¹¹³Quin p'ectic le j ca'a p'éel icho'obo', ba'ale' in yaabiltmaj a ca'anbesaj.

¹¹⁴Teech máax áantiquen yéetel canantiquen; ti' a t'aan in dzaama in pa'atajil.

¹¹⁵¡Náchcuntaba'ex ti' teen loolob máaque'ex, tumen tene', in Ku, in káat in dzo'ocbes u ya'almajt'aano'ob!

¹¹⁶Dzáa teen muuko'ob je'el bix a dzaamaj u t'aanile', ¡beyo' quin p'áatal cuxa'anen!

¹¹⁷Áanteni' beyo' je'el u yantal teen tocsajile'; beyo' mantadz quin in dzáa in wóol ti' a wa'almaj t'aano'ob.

¹¹⁸Teche' ca cúulpachcuntic le máaxo'ob cu tzelicuba'ob ti'a wa'almaj t'aano'obo', tumen u tuuculo'obe' chéen tuusilo'ob.

¹¹⁹U j loolob máaquilo'ob le yóokolcaaba' a ti'al teche' beyo'ob sojole'; le o'olale' tene' in yaacuntmaj a tzol t'aano'ob.

¹²⁰In wíinclile' cu quiquilaanquil ta táan, yo'olalsajaquil; ¡yaan teen tziiquil ti' a p'is óolo'ob!

¹²¹Mix jun téen in p'at in beetic ba'ax toj; ma' a xúump'attiquen tu kab le máaxo'ob pech'iqueno'.

¹²²P'áatac ta kab in ma'alob anil; ma' u beetico'ob teen kaas le a'alaj ba'alo'obo'.

¹²³In wicho'obe' táan u xu'upulo'ob iquil in pa'atic a toquiquen yéetel a jáalkabtiquen, je'ebix a dzaamaj u t'aanile'.

¹²⁴Je'ebix a wojel yaacunaje' beet utz ti' le a paalila'; ¡ca'anbes teen a wa'almaj t'aano'ob!

¹²⁵Tene' a paalilen. Dzáa teen na'ati', tumen in káat in kaj óolt a tzol t'aano'ob.

¹²⁶Yuumtzil, dzo'oc u kuchul u kiinil a beetic wa ba'ax, Tumen dzo'oc a mixba'alcuntico'ob a ca'anbesaj.

¹²⁷Le o'olale' tene' in asab yaacuntmaj a wa'almaj t'aano'ob ti' in yaacuntmail le ma'alob oro'.

¹²⁸Le o'olale' quin cha'ic in bisa'al tumen a tzol t'aano'ob, yéetel in p'ectmaj tuláacal tuusil cuxtal.

¹²⁹Jak óolalo'ob a wa'almaj t'aano'ob; le o'olale' quin wu'uyaj t'antico'ob.

¹³⁰U tzo'olol a t'aano'obe' cu sáasilcunaj yéetel cu dzáic u na'at le máaxo'ob cabal u na'ato'obo'.

¹³¹Yéetel nojoch yanyamil quin je'ic in chi', tumen quin dzíiboltic a wa'almaj t'aano'ob.

¹³²Pacteni' yéetel ch'a'a teen óotzilil, je'el bix a beetic yéetel máaxo'ob yaacuntmilecho'.

¹³³Beet ca xíimbalnaquen je'ebix u ya'alic a t'aane'; ma' a cha'ic u t'ooquintiquen le kaaso'.

¹³⁴Toquen ti' u loolob jáanpay le wíiniquilo', tumen in káat in dzo'ocbes a wa'almaj t'aano'ob.

¹³⁵pact yéetel ma'alob icho'ob le a paalila', ca'ans teen xan a wa'almaj t'aano'ob.

¹³⁶Táan u chooj u ya'alilo'ob in wich, tumen ma' tu tzi'iquil a ca'ansaj.

¹³⁷Yuumtzil teche' tojech; tojtac xan tuláacal a wa'almaj t'aano'ob.

¹³⁸Tuláacal a tzolbe'en t'aano'obe' tojtaco'ob yéetel jaajtaco'ob.

¹³⁹Táan u xu'upsiquen le kub óolal yaan teen tu yo'olal a t'aano'obo', tumen in aj p'eeco'obe' dzo'oc u tu'ubsico'ob.

¹⁴⁰A dzaa t'aane' dzo'oc u máan ti' talam túuntajo'ob; le o'olale' le a paalila' u yaacuntmaj.

¹⁴¹Cabal in wóol, culpachcunta'anen xan, ba'ale' ma' tin tu'ubsic a wa'almaj t'aano'ob.

¹⁴²Mantadz ma'alob ba'ax ca beetic, a ca'ansaje' u jaajil.

¹⁴³Dzo'oc in wiliquinbáa ichil okom óolal, bey xan ichil talam cuxtalil, ba'ale' a wa'almaj t'aano'obe' tu qui'imaccunsico'ob in wóol.

¹⁴⁴A wa'almaj t'aano'obe' mantadz tojtaco'ob; ¡dzáaten na'at u ti'al ca páatac in cuxtal!

¹⁴⁵Yuumtzil, yéetel tuláacal in pucsi'ikal quin t'aniquech; ¡núuqueni' tumen in káat in dzo'ocbes a wa'almaj t'aano'ob!

¹⁴⁶Ti' teech quin ka'am t'aan, áanteni', u ti'al ca in dzo'ocbes a wa'almaj t'aano'ob.

¹⁴⁷Ma'ili' sáasaque' quin líikil in káat teech áantaj; tumen in dzaamaj in pa'atajil ti' a dzaa t'aan.

¹⁴⁸Ma'ili' áakabchaque', in wicho'obe' táan u p'il icho'ob u ti'al ca tuuculnaquen ti' a dzaa t'aan.

¹⁴⁹Tu yo'olal a yaacunaje', Yuumtzil, u'uy in t'aan; dzáaten cuxtal je'ebix a wojel a beet ba'ax toje'.

¹⁵⁰Naadz yanilo'ob teen in j loolob ch'a'apachtajo'ob, ba'ale' náach yanilo'ob ti' a ca'ansaj.

¹⁵¹Yuumtzil, teche' naadz yanilech, tuláacal a ca'ansajo'obe' jaajtaco'ob.

¹⁵²Tac jach úuche' in kaj óol a wa'almaj t'aano'ob, a dzaamajo'ob u ti'al kiino'ob mina'an u xuul.

¹⁵³Il a wil in yaj óolal, toqueni', tumen ma' in tu'ubes a ca'ansaji'.

¹⁵⁴Toquen ti' le ba'ax in wanila', lojeni'; dzáaten cuxtal je'el bix a wa'almailo'.

¹⁵⁵A wáantaje' náach yanil ti' loolob máaco'ob, tumen ma' tu dzo'ocbesico'ob a wa'almaj t'aano'ob.

¹⁵⁶Yuumtzil sen nojoch a muumun yaacunaj; dzáaten cuxtal ichil a wutzili'.

¹⁵⁷Ya'ab in aj p'eeco'ob yéetel in j t'oonquinnajo'ob, ba'ale' ma' tin tzeliquinbáa ti' a wa'almaj t'aano'ob.

¹⁵⁸Cu kuuxiltiqueno'ob le máaxo'ob cu x mucul meentico'ob kaaso', leti'obe' ma' tu yu'ubico'ob a wa'almaj t'aano'ob.

¹⁵⁹Yuumtzil, il a wil bix in yaacuntmail a tzolbe'en t'aano'ob; ¡dzáaten cuxtal tu yo'olal a yaacunaj!

¹⁶⁰Ti' a t'aane' yaan tuláacal jaaj; tuláacal a toj ca'ansaje' mina'an xu'ulul ti'.

¹⁶¹Máaco'ob yaan páajtalil ti'obe' mix ba'al o'olale' táanu ch'a'apachtiqueno'ob, ba'ale' in pucsi'ikale' cu tziquic in t'aano'ob.

¹⁶²Tene' quin wu'uyiquinbáa qui'imac in wóol yéetel a dzaa t'aan, je'ebix wa máax cu nuptáantic jun p'éel nojoch ayikalile.

¹⁶³In p'ectmaj le tuuso', ma' tu páajtal in mukyajtic; ba'ale' in yaacuntmaj a ca'ansaj.

¹⁶⁴Siete u téenel ti' jun p'éel kiine' quin qui'iqui' t'antiquech tu yo'olal u tojil a wa'almaj t'aano'ob.

¹⁶⁵Yaan ya'abcach jéedzel ti' máaxo'ob u yaacuntmajo'ob a ca'ansaj, mix ba'al beetic u lúubulo'ob.

¹⁶⁶Yuumtzil táan in pa'atic a toquiquen; tene' in dzaamajinbáa in dzocbes a wa'almaj t'aano'ob.

¹⁶⁷Tene' quin wu'uyaj t'antic a tzolbe'en t'aano'ob, in yaacuntmajo'ob xan yéetel tuláacal in pucsi'ikal.

¹⁶⁸Tene' quin wu'uyaj t'antic a tzol t'aano'ob. ¡teche' a kaj óol tuláacal in beelo'ob!

¹⁶⁹Kuchuc in awato'ob tu táan, Yuumtzil; ¡dzáaten na'atil je'el bix u ca'ansic a t'aane'!

¹⁷⁰Kuchuc in payalchi' ta táan; ¡toquen je'ebix a wa'almajile'!

¹⁷¹Jóokoc tin chi' qui'iqui' t'aan, tumen teech ta ca'anbesaj teen a wa'almaj t'aano'ob.

¹⁷²Jóokoc tin chi' jun p'éel kaay ti' a dzaa t'aan, tumen tuláacal a wa'almaj t'aano'obe' tojtaco'ob.

¹⁷³A kabe' tu dzaj teen áantajil, tumen ta táanilcunsaj a wa'almaj t'aano'ob.

¹⁷⁴Yuumtzil quin dzíiboltic ca a toquen. ¡Tene' quin wu'uyiquinbáa qui'imac in wóol yéetel a ca'anbesaj!

¹⁷⁵In káat cuxtal u ti'al in qui'iqui' t'antech; a tzol t'aane' ca u yáanten.

¹⁷⁶Saatlen bey jun túul j tamane'; ¡co'oten a caxten tumen ma' in tu'ubes a wa'almaj t'aano'obi'!