Read Yucateco Salmos 136 Bible Online

Salmos 136 - Yucateco bible

Salmos 136

¹Dza'ex nib óolal ti' Yuumtzil, tumen leti'e' utz, tumen u yaacunaje' mina'an u xuul.

²Dza'ex nib óolal ti' u Junab Ku le kuobo', tumen u yaacunaje' mina'an u xuul.

³Dza'ex nib óolal ti' u Yuumtzil le yuumtzilo'obo', tumen u yaacunaje' mina'an u xuul.

⁴Ti' le máax chéen leti' beetic nucuch jak óolalo'obo', tumen u yaacunaje' mina'an u xuul.

⁵Ti' le máax beet ca'ano'ob yéetel na'atilo', tumen u yaacunaje' mina'an u xuul.

⁶Ti' le máax tu jayaj le lu'um tu yóokol le ja'obo', tumen u yaacunaje' mina'an u xuul.

⁷Ti' le máax beet le kiin bey xan le ujo', tumen u yaacunaje' mina'an u xuul:

⁸le kiino' u ti'al sáasilcunaj sáamsamal, tumen u yaacunaje' mina'an u xuul;

⁹le uj yéetel le eeko'obo' u ti'al u sáasilcunto'ob áakabo', tumen u yaacunaje' mina'an u xuul.

¹⁰Ti' le máax beet loob ti' u cajnáalilo'ob Egiptoo', tumen u yaacunaje' mina'an u xuul.

¹¹Ti' le máax jóokes Egipto le j israelitaobo', tumen u yaacunaje' mina'an u xuul,

¹²le ca tu tich'aj u kab yéetel nojoch páajtalilo', tumen u yaacunaje' mina'an u xuul.

¹³Ti' le máax buj le chac ka'anabo', tumen u yaacunaje' mina'an u xuul.

¹⁴Ti' le máax beet u máan Israel tu chúumuc le ka'anabo', tumen u yaacunaje' mina'an u xuul.

¹⁵Ti' le máax bul u j ba'atel máaco'ob faraón te j chac ka'anabo', tumen u yaacunaje' mina'an u xuul.

¹⁶Ti' le máax bis u caajal ti' le x tocoy lu'umo', tumen u yaacunaje' mina'an u xuul.

¹⁷Ti' le máax loobilt ti' quíimil le nucuch ajawo'obo', tumen u yaacunaje' mina'an u xuul.

¹⁸Ti' le máax lukes u cuxtal ajawo'ob yaan u páajtalilo'obo', tumen u yaacunaje' mina'an u xuul,

¹⁹tu lukesaj u cuxtal Sehón u ajawil Amorreo, tumen u yaacunaje' mina'an u xuul,

²⁰bey xan Og u ajawil Basán, tumen u yaacunaje' mina'an u xuul.

²¹Ti' le máax t'ox u lu'umo'ob le ajawo'obo', tumen u yaacunaje' mina'an u xuul,

²²ca tu dzaj u ti'alint Israel u palitzil, tumen u yaacunaje' mina'an u xuul.

²³Ti' le máax cu ka'ajsico'on le quéen lúubuc c óole', tumen u yaacunaje' mina'an u xuul.

²⁴Ti' le máax cu toquico'on ti' c aj p'eeco'obo', tumen u yaacunaje' mina'an u xuul.

²⁵Ti' le máax cu dzáic ba'al u jant le máaco'ob, tac le ba'alche'obo', tumen u yaacunaje' mina'an u xuul.

²⁶¡Dza'ex nib óolal ti' u Junab Kuil ca'an, tumen u yaacunaje' mina'an u xuul!