Read Yucateco Salmos 141 Bible Online

Salmos 141 - Yucateco bible

Salmos 141

¹Yuumtzil, ti' teech quin káat óolal; ¡co'oten tu séeblaquil! ¡u'uy in t'aan le quéen in t'aneche'!

²In payalchi'e' ca kuchuc ta táan bey u qui'iboquil poome', yéetel in kabo'ob in líikesmajo'ob, bey u siibalil ocnaj kiine'.

³Yuumtzil dzáa jun túul máax canantic in chi' ca u canant ma' u je'epajal in chi'.

⁴Náachcunt in tuucul ti' ba'ax kaasa; ma' a cha'ic in máan in beet kaakas ba'alo'ob ma' in cuxtal u ti'al in jaant u qui'iqui' janal j loolob máac.

⁵Utzil ba'al ca u jadzen máac toj u cuxtal, jun p'éel qui'iboc ja' in ti'al ca u keyen. Le ba'alo'ob beya' mix bikin bíin in cúulpachcunte; quex tumen cu jaadzene' bíin payalchi'inaquen.

⁶U j noojocho'ob le j loolob máaco'obo' bíin túulch'inta'aco'ob ti' quíimil, yaan xan u ya'alico'ob in t'aano'obe' utztaco'ob.

⁷U baaquelo'obe' bíin ki'itbesa'aco'ob tu tzéel mucnal, je'ebix u je'ebel u t'óolilo'ob lu'ume'.

⁸Yuumtzil, Yuumtzil, ti' teech in dzaama in paacat, ti' teech quin caxtic áantajil, ma' a xúump'atquen.

⁹Toquen ti' le léecheb dza'an tin beelo'; toquen ti' u léecheb le j loolob máaco'obo'.

¹⁰Lúubuc le kaakas máaco'ob ti' u léecheo'ob ca'aliquil tene' táan in bin táanil.