Read Yucateco Salmos 143 Bible Online

Salmos 143 - Yucateco bible

Salmos 143

¹Yuumtzil u'uy in payalachi'; ch'en xiquint in káat óolal. Núuqueni' tumen teche' tojech yéetel teche' ca dzo'ocbesic ba'ax ca wa'alic.

²Ma' a t'anic a paalil u ti'al u ya'al teech bix yanil, tumen ta táane' mix máac wa ma' yaan u si'ipil.

³In aj p'eeco'obe' táan u ch'a'apachtiqueno'ob; dzo'oc u yach'iqueno'ob ti' le lu'uma'; táan u beetico'ob ca cajlaquen ti' le éekjoch'e'enilo' je'el bix le máaxo'ob úuch quíimico'obo'.

⁴Quin wu'uyic jach u naat'al in tzeem, péecnaja'an yanil u yóol in pucsi'ikal.

⁵Cu ka'ajal teen le kiino'ob úuch máanaco'obo' yéetel quin tuclic tuláacal le ba'ax a beetmajo'.

⁶Ta tojil quin tich'ic in kabo'ob; ukajen ti' teech beyen tiquin lu'ume'.

⁷Yuumtzil, ¡núuquen tu séeblaquil táan u xu'ulul in wóol! Ma' a wa'alic ma' táan a dzáic teen a wáantaj, tumen wa beyo' quin p'áatal beyen le quimeno'obo'.

⁸Dzáa teen in wojéelt a yaacunaj ti' le ja'atzcabkiino'obo', tumen ti' teech in dzaamaj in kub óolal. Beet in wojéeltic bix unaj in cuxtal, tumen ti' teech quin dzáic a wojéelt in dzíibolalo'ob.

⁹Yuumtzil, toquen ti' in aj p'eec tumen ti' teech quin caxtic tu'ux quin balquibáa.

¹⁰Ca'ans ti' teen in beet ba'ax a káati, tumen teech in Ku.

¹¹Yuumtzil, tu yo'olal a kaaba'e', canant in cuxtali', tumen teche' tojech, jóokesen ti' le yaayaj óolala'.

¹²tumen teche' ca dzo'ocbesic ba'ax ca wa'alic, ¡ch'éejbes in aj p'eeco'ob! ¡xu'ulbes tuláacal in aj p'eeco'ob tumen tene' a paalilen!