Read Yucateco Salmos 145 Bible Online

Salmos 145 - Yucateco bible

Salmos 145

¹Yaan in t'aan tu yo'olal a nojchil, In Ku, in Ajaw; yaan in qui'iqui' t'antic a kaaba' ti' kiino'ob mina'an uxuul.

²Sáamamal yaan in qui'iqui' t'antiquech; yaan in qui'iqui' t'antic a kaaba' ti' kiino'ob mina'an uxuul.

³Le Yuumtzilo' nojoch yéetel cu najmatic ca sen qui'iqui' t'anta'ac; u nojochile' tíip'máanja'an ti' c na'at.

⁴Ti' tuláacal ch'i'ilancabilo'obe' yaan u qui'iqui't'anta'al u kaaba'; yaan u ka'ayta'al a páajtalil meyajo'ob.

⁵Yaan u yúuchul t'aan tu yo'olal a qui'ichquelem nojbe'enil, tene' yaan in t'aan tu yo'olal a jakbe'enilo'ob.

⁶Yaan u yúuchul t'aan tu yo'olal a nucuch páajtalil meyajo'ob, yéetel tene' yaan in t'aan tu yo'olal a nojochil.

⁷Yaan u yúuchul t'aan tu yo'olal a nojoch utzil, yéetel yaan u ka'am a'ala'aque' teche' tojech.

⁸Le Yuumtzilo' muun yóol yéetel cu ch'a'a óotzilil; ma', tu náacal yóol, leti'e' tuláacal yaacunaj.

⁹Le Yuumtzilo' utz yéetel máac, yéetel muumun yaacunaj cu canantic u meyajo'ob.

¹⁰¡Ca u qui'iqui' t'antecho'ob, Yuumtzil, tuláacal ameyajo'ob! ¡Ca u yutzil t'antecho'ob tuláacal le cu yocsic yóolo'ob ti' teche'!

¹¹¡Ca t'aanaco'ob tu yo'olal u ayikalil a aja'awil! ¡Ca úuchuc t'aan tu yo'olal a páajtalil meyajo'ob!

¹²¡Ca dza'abac u yojéelt le máaco'obo' a páajtalil yéetel u nojoch ayikalil a aja'awil!

¹³A aja'awile' jun p'éel aja'awil mina'an u xuulul ti'; a jalachile' u ti'al tuláacal ch'i'ibalo'ob. jach u kubmaj u yóol Yuumtzil ti' tuláacal u meyajo'ob utz u pucsi'ikal ti' tuláacal le ba'ax beetico'.

¹⁴Le Yuumtzilo' leti' áantic le máaxo'ob cu lúubulo', yéetel cu líikesic le máaxo'ob cu lúubul yóolo'obo'.

¹⁵U yicho'ob tuláacal máaco'obe' cu pa'atjo'ob ti' teech u ti'al ca u dzáa u yo'ocho'obe' tu kiinil.

¹⁶Ca je'ic a kabe', yéetel ma'alob óolale' ca na'ajcunsic tuláacal le cuxa'an ba'alo'obo'.

¹⁷Le Yuumtzilo' toj ti' tuláacal u beelo'ob, utz ti' tuláacal ba'ax cu beetic.

¹⁸Le Yuumtzilo' naadz yanil ti' máaxo'ob t'anic, ti' le máax t'anic le jaaj óolalo'.

¹⁹Leti'e' cu béeycunsic u dzíibolalo'ob le máaxo'ob tziquique'; le quéen u káato'ob áantaj ti'e', cu yu'ubico'ob yéetel cu toquico'ob.

²⁰Yuumtzile' cu canantic le máaxo'ob yaacuntmaile', ba'ale' cu xu'ulsic le kaakas máaco'obo'.

²¹¡In chi'e' ca u qui'iqui' t'ant le Yuumtzilo'! ¡tuláacal máaco'ob ca u yutzil t'anto'ob u quili'ich kaaba', bejela'e' yéetel kiino'ob mina'an u xuul!