Read Yucateco Salmos 146 Bible Online

Salmos 146 - Yucateco bible

Salmos 146

¹¡Qui'iqui' t'anta'ac Yuumtzil! Yaan in qui'iqui' t'antic Yuumtzil yéetel tuláacal in pixan.

²Yaan in qui'iqui' t'antic Yuumtzil ca'aliquil cuxa'anen; yaan in kayic kaayo'ob ti' in Ku ca'aliquil dzaca'anen.

³Ma' a kubic a wóole'ex ti' jalach máaco'ob, chéen ti' wíinico'ob ma' tu páajtal u tocsajo'ob,

⁴tumen le quéen quíimico'obe' cu suuto'ob j lu'um; láili' ti' le kiino' cu xu'ulul ba'ax u tucultma'ob u beetico'ob.

⁵Qui' u yóol le máax cu kamic áantaj ti' u Ku Jacob, máax cu dzáic u pa'atajil ti' Yuumtzil u Ku.

⁶Leti' tu beetaj ca'an, lu'um, bey xan ka'anab, yéetel xan tuláacal le ba'alo'ob yano'ob ti'e'. Leti'e' ma'atech u xulic u beetic ba'ax cu ya'alic.

⁷Cu beetic ba'ax toj ti' máaxo'ob yedza'ano'obo' yéetel cu dzáic u yo'ocho'ob le máaxo'ob wi'ijo'obo'. Yuumtzile' cu jáalkabtic máaxo'ob kala'ano'ob.

⁸Yuumtzile' cu beetic u suut u sáasil le ch'óopo'obo'; Yuumtzil cu líiksic máaxo'ob luba'ano'ob; Yuumtzil u yaacuntmaj máaxo'ob utz u cuxtalo'ob;

⁹Yuumtzile' cu canantic j táanxel lu'umilo'ob cu yaabiltic le j ma' na'obo' bey xan le x quimeníichamo'obo', ba'ale' cu beetic u sat cu beel máaxo'ob kasa'ano'ob.

¹⁰Sión, Yuumtzile' yaan u ajawil mantadz; A Kue' yaan u ajawil u ti'al ja'abo'ob mina'an u xuul. Qui'iqui' t'anta'ac Yuumtzil.