Read Yucateco Salmos 147 Bible Online

Salmos 147 - Yucateco bible

Salmos 147

¹¡Qui'iqui' t'anta'ac Yuumtzil! ¡Buca'aj ma'alobil u ka'ayal kaayo'ob ti' c Ku! ¡Ti' leti'e' unaj u dza'abal qui'iqui' kaayo'ob!

²Yuumtzile' táan u ca'a líikesic u pakilo'ob Jerusalén, yaan xan u much'quintic le Israelitaob ki'itpaja'ano'obo'.

³Leti' dzaquic máaxo'ob kila'an u pucsi'ikalo'ob cu to'ic xan u yajilo'ob.

⁴Leti' a'alic jay p'éel eeko'ob cu j bin antal, leti' xan dzáic u kaaba'ob tu jujun p'éelil.

⁵Nojoch c Ku nojoch xan u páajtalil; u na'ate' mina'an u xuul.

⁶Yuumtzile' cu líikesic le j cabal óolo'obo', ba'ale' cu cha'ic u lúubul le j ca'anal icho'obo'.

⁷Kaaynene'ex ti' Yuumtzil, dza'ex xan nib óolal ti'; kaye'ex kaayo'ob ti' c Ku, je'ebix u bin u pa'axal le arpao'.

⁸Leti'e' cu pixic ca'an yéetel le múuyalo'obo' leti'e' cu nu'ucbesic u káaxal ja' u ti'al le lu'uma'; leti'e' cu beetic u ch'íijil u yo'och le ba'alche'ob te j pu'uco'obo';

⁹leti' dzáic u janal le ba'alche'obo', beyxan ti' u mejnil le ch'íich'o'ob quéen awatnaco'obo'.

¹⁰Ma' u muuk tzíimino'obi' mix u muuk j xiib, beetic u yutztal yoól Yuumyzili',

¹¹ba'ale' leti'e' qui'imac u yóol yéetel máaxo'ob tziquic, máaxo'ob cu kubic u yóolo'ob ti' u yaacunaj.

¹²Jerusalén, qui'iqui' t'ant Yuumtzili'; Sión, qui'iqui' t'ant a Kui.

¹³Leti' j beet u mu'uka'antal u kalabilo'ob u jool najilo'ob, yéetel tu qui' t'aantaj a paalalo'ob yano'ob ichil le noj caajo'.

¹⁴Leti' taasic jéedzel tac tu xuul a lu'umil, cu na'ajcunsiquech xan yéetel u ma'alobil trigoo'.

¹⁵Leti'e' cu túuxtic u ya'almaj t'aan ti' le lu'uma', u t'aane' séeba'an u yáalcab.

¹⁶Leti' beetic u sactal sa'am ja', je'ebix u tzo'otzel sac tamane', yéetel cu ki'itbesic u p'úuyul hielo' bey u ma'ay lu'ume'.

¹⁷Leti' túuxtic hielo chíica'an ti bat; tu yo'olal le que'el cu túuxtico' le ja'o' cu suut hieloil.

¹⁸Ba'ale' cu túuxtic u t'aane' cu beetic u yíibil; cu beetic u yustaj iike', le ja'o' cu yáalcab.

¹⁹Leti' tu dzaj u yojéelt jacob u t'aan, u ya'almaj t'aano'ob yéetel u dzaa t'aano'obe' ti' Israel.

²⁰lelo', ma' tu beetaj beyo' yéetel u láak múuch' caajo'obi', lelo'oba' mix bikin tu kaj óoltajo'ob u dzaa t'aano'obi'. ¡Qui'iqui' t'anta'ac Yuumtzil!