Read Yucateco Salmos 16 Bible Online

Salmos 16 - Yucateco bible

Salmos 16

¹¡Cananteni' Junab Ku, tumen ti' teech quin caxtic áantaj!

²Ti' teche' in wáalmaj: Teche' in Yuumtzilech in wutzil; mix ba'al je'el u páajtal u que'etel ta wéetele'.

³Le máaxo'ob cu qui'imactal u yóolo'ob yéetel u beetbilkuob le múuch' caajo' cu tucultico'ob yaan páajtalil ti'ob;

⁴le t o'olale' cu ya'abcuntico'ob u yoochelo'ob, cu t'u'ulpachtico'ob xan yéetel nojoch ocsaj óolal. ¡Ba'ale' tene' mix bikin bíin in wocsiquimbáa ti' u wecki'ikil u quíimsbil siibalo'obo'! ¡Mix bikin xan bíin in ch'a'a chi'it u kaaba'obe'!

⁵Yuumtzil, teeche' tuláacal ba'axech ti' teen; teche' ca chupiquen yéetel utzilo'ob; in cuxtale' ta kab yaan.

⁶Tene', táaj utzil cúuchil tin ti'alintaj; ¡jach qui'ichquelem ba'al j dzaab ti' teen!

⁷Yaan in qui'iqui' t'antic Yuumtzil, tumen leti' máaxbisiquen; jach ichil xan u taamil in pucsi'ikale' cu ya'alic ti' teen yéetel áakabo'ob ba'ax unaj in beetic.

⁸Mantadz kaja'an ti' teen Yuumtzil; tu yo'olal ti' yaan tin x no'oj kabe', mix ba'al bíin u beetin lúubul.

⁹Le t o'olale' chuup yanil in pucsi'ikal yéetel qui'imac óolal. Tuláacal ba'axene' bíin cuxlac yéetel ocsaj óolal,

¹⁰tumen ma' bíin a p'aten ichil le mucnalo'; ¡ma' bíin a xúump'at ichil mucsaj, le máax a yaabiltmajo'!

¹¹Yaan a we'esic ti' teen u bejil le cuxtalo'. Yaan nojoch qui'imac óolal ta táan; yaan x ma' xu'ulul utzil cuxtal ta wicnal.