Read Yucateco Salmos 17 Bible Online

Salmos 17 - Yucateco bible

Salmos 17

¹Yuumtzil, u'uyeni', tumen táan in káatic ti' teech junp'éel ba'al toj; táan óolt in káat óolali', ch'en xiquint in payalchi', tumen ma' táan u jóokol tu chi' jun túul máac cu tuusi'.

²¡Ca talac ti' teech in xot kiin, tumen teche' a wojel ba'ax ti'ibil in ti'al!

³Teche' a wojel tuláacal ba'axo'ob quin tucultic; yéetel áakabe' taalja'anech a wil ba'ax quin beetic; ta máansajen ti' jun p'éel jach nojoch túuntajil, ba'ale' ma' ta wilaj kasa'anil ti' in cuxtali'. Ma' in wa'almaj ba'alo'ob ma' u najmali',

⁴je'el bix u beetic u láak máaco'obo'; dzo'oc in tzeliquinbáe', ti' u beelilo'ob meyaj loob, je'el bix u ya'alic a wa'almaj t'aano'obe'.

⁵Yéetel x ma' lúubulil quin xíimbaltic a beelo'ob; mix ba'al páatchaj u tzeliquen ti' leti'ob.

⁶Ku ti' teech quin payalchi', tumen teche' ca núuquiquen; táan óolteni', u'uy ba'ax quin wa'alic.

⁷Dzáa ti' teen jun p'éel u chíiculal a yaabilaj, teech, máaxech ca toquic ti' u aj p'eeco'ob le máaxo'ob cu caxtico'ob áantajil ti' a páajtalilo'.

⁸Cananten je'el bix a canantic u neek a wicho'obe', balen yéetel u bo'oy a kab

⁹ti' le j loolob máaco'ob cu taalo'ob u beeto'ob ti' teen kaaso', ¡ti' le aj p'eeco'ob cu bakpachtiqueno'obo'!

¹⁰Cu tuculticuba'ob bey mix máac je'el bix leti'obe', cu t'aano'ob yéetel nonojbáil;

¹¹naadz u taalo'ob tin paach, táan u pa'atico'ob u súutuquil u puliqueno'ob j lu'um.

¹²Beyo'ob leóno'obe', beyo'ob dzíidzic leóno'obe', táan u ch'eenebo'ob tu'ux u ta'acbesmuba'ob táan u pa'atico'ob yéetel yamyamil u pulcuba'ob tin wóokol.

¹³Líiken, Yuumtzil, ¡dzáaba tu táano'ob! ¡t'oonquinto'ob! Yéetel a máascabe' toquen ti' le j loolob máaco';

¹⁴Yuumtzil yéetel a páajtalile', toquen ti' leti'ob, ¡tojolch'into'ob ti' le yóokolcaaba', tumen le yóokolcaaba' leti' le ba'ax u ti'alo'ob ti' le cuxtala'! P'at u chupicuba'ob yéetel ayikalil, ca janac u paalalo'ob tac quéen xíiquic u nako'ob, ca yanac xan j p'áatal u ti'al u yáabilo'obi'.

¹⁵Teen túune' jach tu jaajil yaan u qui'imactal in wóoliquil in pactic u qui'ichquelemil ¡yéetel in wiliquinbáa le quéen ajaquene'!