Read Yucateco Salmos 18 Bible Online

Salmos 18 - Yucateco bible

Salmos 18

¹[1] Yuumtzil, teech in muuk, ¡tene' in yaabiltmajech!

²Teech máax áantiquen, u cúuchil in wutzil antal, in tocsajil, in Junab Ku, teech le nojoch tuunich tu'ux cu páajtal inta'acbesiquinbáa, in chimal, teech le páajtalil cu toquiqueno', in asab ca'anal cúuchil u ti'al in baliquinbáa.

³Teche' Yuumtzil ca najmatic a qui'iqui' t'anta'al: le quéen in t'aneche' ca toquiquen ti' in aj p'eeco'ob.

⁴Le quíimilo' tu ka'akaxajen yéetel u léecho'ob; tin ch'a'aj sajaquil ti' le ya'ab kaas cu taal tin wóokolo';

⁵le quíimilo' tu babal kaxajen ti' u suumil u léech; ¡tin wilajinbáa ichil léecho'ob cu quíimsaj!

⁶Ichil in yaj óolale' tin t'anaj Yuumtzil; tin káataj áantaj ti' in Ku, leti' túune' tu yu'ubajen líikbal tu quili'ich najil; ¡in wawato'obe' j kuch tu xiquino'ob!

⁷Yanji túun jun p'éel ka'amcach quíilbal lu'um: le pu'uco'obo' quíilbanajo'ob tac tu chuuno'ob; tíita'abo'ob tu yo'olal u p'uja'anil Yuumtzil.

⁸Jóok buudz tu ni', tu chi'e' jóok káak cu xu'ulsaj; yéetel u chi' tu túubaj xan t'aba'an chúuco'ob.

⁹Tu je'aj le ca'ano', ca j éemi. ¡Nucuch múuyalo'ob yanchaj tu yáanal u yooco'ob!

¹⁰Culucbal tu yóokol jun túul cuxa'an j xiknale' ca j xiknalnaji', jalkesbil u bin tu yóokol u xiik le iiko'.

¹¹Tu ch'a'aj u ti'al u balicubáa le nojoch éekjoche'enil bakpachtmailo' yéetel le box múuyalo'ob chuuptaco'ob yéetel ja'o'.

¹²Jun p'éel sáasil léenbal jóok tu táan; bat yéetel t'aba'an chúuco'ob jóok ti' le múuyalo'obo'.

¹³Yuumtzil, le u Yuumil ca'ano', tu beetaj u yu'uba'al u t'aan líikbal te j ca'ano' bey u juum cháaque'; bato'ob yéetel t'aba'an chúuco'ob j káaxi.

¹⁴Tu pulaj u julubo'ob bey xan u léenbal cháaco'ob, tu beetaj u yáalcab in aj p'eeco'ob.

¹⁵U taamil le ka'anabo' j p'áat jéechcab, bey xan u chuunpakilo'ob le yóokolcaaba', tu yo'olal u keyaj t'aan le Yuumtzilo', tu yo'olal u ka'amcach ustaj.

¹⁶Kue' tu tich'aj u kab ti' teen líikbal tu ca'anil, yéetel u kab xane' tu jóokesajen ichil ya'abcach ja'ob

¹⁷Tu tocjen ti' in aj p'eeco'ob yaan u páajtalilo'ob, máaxo'ob p'ectmailen, yéetel asab yaan u muuko'ob ti' teno'.

¹⁸Tu yóoltajo'ob u beeto'ob teen kaas le ca'ach yaj inwanile', ba'ale' Yuumtzil tu dzaj ti' teen u yáantaj:

¹⁹tu jóokesajen ti' in kalabil; ¡tu tocajen, tumen u yaabiltmajen!

²⁰Yuumtzile' dzo'oc u dzáic ti' teen u bo'olal cu najmatic u tojil in cuxtal,

²¹tumen tene' láili' táan in xíimbaltic u beel Yuumtzil; ¡mix jun téen in tzelajimbáa ti' in Ku!

²²Kaja'an ti' teen tuláacal u dzaa t'aano'ob; ¡mix jun téen in cúulpacht u ya'almaj t'aano'ob!

²³Cuxlajen tu táan Yuumtzil je'el bix u najmale'; tin náachcuntiquinbáa ti' le kasa'anilo'.

²⁴Yuumtzile' dzo'oc u bo'otiquen, je'el bix cu najmatic in cuxtal tu táane'.

²⁵Yuumtzil, teche' ca ch'a'ic óotzilil ti' le máax cuch'a'ic óotzilile', tojech xan yéetel le máax toje'.

²⁶Jaaj óolech yéetel le máax jaaj u yóole', ba'ale' dzíiquech yéetel le máax keechel yanile'.

²⁷Teche' ca toquic le j cabal óolo'obo', ba'ale' ca pajic u subtal le máaxo'ob ca'anal u yicho'obo'.

²⁸Yuumtzil, teche' ca dzáic ti' teen sáasilil; in Ku, teche' ca sáasilcuntic in éekjoche'enil.

²⁹Yéetel a wáantaje' bíin in ba'atelt in aj p'eeco'ob, tu yóokol u tuulumilo'ob a caajalo'obe' bíin xíimbalnaquen.

³⁰U beel Junab Kue', nu'uca'an yanil; u séeb chi'e' Yuumtzile' u najmal u ka'amal yéetel ocsaj óolal; ¡Kue' cu yáantic je'enquex u yocsmaj u yóolo'ob ti'e'!

³¹¿Máax Junab Ku, wa ma' Yuumtzil? ¿Yaan wa u láak Ku cu páajtal u canantico'on?

³²Kue' leti' dzáic in muuk, leti' máax beetic ma' u yantal u si'ipil in cuxtal,

³³leti' beetic u péeca'antal in wooc, je'el bix péeca'anilu yooc quéeje'; leti' beetic in ma'alob antal te tu'ux ca'analo'obo',

³⁴le máax cu nu'uctiquen u ti'al le ba'atelo'; leti' máax cu dzáic in muuk u ti'al in t'inic u nu'ucul le julubo'ob bronce u ca'ajo'.

³⁵Teech áantiquen yéetel ca toquiquen, ca lat'ab kabtiquen yéetel a x no'oj kab; a wutzile' dzo'oc u beetic in ma'alob áanta'al.

³⁶Dzo'oc a cóochquintic in beel, le t o'olale' in wooco'obe' ma' jacchajaco'obi'.

³⁷Tin ch'a'apachtaj in aj p'eeco'ob ca tin chucpachtajo'ob; suunajen chéen dzo'oquic in xu'ulsico'ob.

³⁸Ma' líiko'obi', tumen tin xe'exe'et'ajo'ob. ¡Lúubo'ob tu yáanal in wooc!

³⁹Teech máax dzáa ti' teen muuk ichil le ba'atelo'; ta beetaj u chintalo'ob tin táan le ma' u'uyaj t'aano'obo';

⁴⁰ta beetaj u púudzulo'ob tin táan le aj p'eeco'obo'. Beyo' páatchaj in xu'ulsic le máaxo'ob u p'ectmajeno'obo'.

⁴¹Táan u káatico'ob áantaj ca'achi, ba'ale' mix máac áanto'ob; táan u t'anico'ob ca'ach Yuumtzil, ba'ale' leti'e' ma' tu núucaj ti'obi'.

⁴²¡Tin juch'ajo'ob je'el bix ma'ay lu'um cu bisa'al tumen iike'! ¡Tin pepe'echa'atajo'ob je'el bix u luukil le bejo'obo'!

⁴³Ta tocajen ti' jun p'éel j ma' u'uyaj t'aan caaj, ta beetajen u noj poolil múuch' caajo'ob, yéetel cu meyajtiquen wíinico'ob ma' in kaj óolo'obi'.

⁴⁴Le quéen u yu'ubo'ob in t'aane', cu beetico'ob ba'ax quin wa'alic; táanxel lu'umil máaco'obe' cu chíinpoltiqueno'ob;

⁴⁵táanxel lu'umil máaco'obe' cu ch'a'ico'ob sajaquil; cu jóokolo'ob táan u quiquilaanquilo'ob tu'ux u ta'acbesmajuba'ob.

⁴⁶¡Cuxlac Yuumtzil! ¡Qui'iqui' t'anta'ac máax áantiquen! ¡Nojbe'encunsa'ac u kaaba' Junab Ku in aj tocsajil!

⁴⁷Leti' le Ku tu beetaj loob ti' in aj p'eeco'obo'; leti' tu dzaj le caajo'ob yáanal in páajtalilo'.

⁴⁸Leti' toquiquen ti' u p'uja'anil in aj p'eeco'ob, bey xan ti' le ma' u'uyaj t'aano'ob u káato'ob u beeto'obteen loobo'. ¡Teche', Yuumtzil, ca toquiquen ti' le j meyaj loobo'obo'!

⁴⁹Le t o'olale' quin qui'iqui' t'antiquech ichil le múuch' caajo'obo' yéetel quin kayic kaayo'ob ti' a kaaba'.

⁵⁰Ca dzáic nucuch dzáanche'etajilo'ob ti' le ajaw ta yéeyajo'; ma' ta p'atic a yaabiltic David mix xan ta p'atic u ch'i'ibalo'ob.