Read Yucateco Salmos 19 Bible Online

Salmos 19 - Yucateco bible

Salmos 19

¹Le ca'ano'obo' cu ka'aytico'ob u nojbe'enil Junab Ku; tu yo'olal ba'axo'ob u beetmajo' cu t'aan u nak ca'an.

²Jun p'éel kiine' cu tzicbaltic ti' u láak kiin; jun p'éel áakabe' cu ya'alic xan ti' u láak áakab

³Quex tumen ma' tu yu'uba'al u t'aano'obe', mix xan táan u yu'uba'al u juum t'aane',

⁴le péectzila' táan u bin u yáalcab tu yóokol le lu'uma', tac jach tu xuul u naklil yóokolcaab. Tac tu'ux u dzaamaj cajtal le kiino',

⁵yéetel qui' o'olale' le kiino' cu chúunul u yáalcabt ubeel bey jun túul le máax cu báaxal áalcabe', bey jun túul íichamtzil táan u jóokol tu'ux yaan uyatane'.

⁶Le kiino' cu jóokol ti' jun tzéel le ca'ano' cu súut áalcabtic tac quéen kuchuc tu láak jun tzéel, ba'ale' mix máac cu páajtal u jechic u yooxow.

⁷Jach utzil chuca'an u ca'anbesaj Yuumtzil, tumen cu dzáic túumben cuxtal. U tusbej t'aan Yuumtzile' jach ma'alob, tumen cu beetic u yantal na'at ti' le máax óotzil u na'ate'.

⁸U tzol t'aano'ob Yuumtzil tojtaco'ob. tumen cu taasic qui'imac óolal ti' pucsi'ikal. U ya'almaj t'aan Yuumtzile' jach sáasiltac, le t o'olale' cu dzáic sáasil ti' icho'ob.

⁹U sajbe'en tziiquil Yuumtzile' quili'ich yéetel mix bikin bíin xu'uluc. U tzicbe'en t'aano'ob Yuumtzile' jach jaajtaco'ob, tuláacalo'obe' tojtaco'ob;

¹⁰¡asab co'oj u tojolo'ob ti' le ma'alob oroo'! ¡asab ch'ujuctaco'ob ti' le caab cu jóokol ti' u joboni'!

¹¹Tzol xiquino'ob xan u ti'al a paalila', wa ca dzocbesa'aco'obe' yaan u nojoch bo'olil.

¹²¿Máax cu kuchul u yojéelt le ba'axo'ob kaastac cubeetico'? ¡Yuumtzil, sa'ates ti' teen, le si'ipilo'ob baalal yanilo'obti' teno'!

¹³Lukes le x ca'anal ichil ti' a palitzila'; ma' a cha'ic u t'oonquintiquen. Bey túuno' cu p'áatal mina'an kaas ti' in cuxtal; beyo' ma' táan in lúubul ti' nojoch keban.

¹⁴Ca kambe'enchajac ti' teech in t'aano'ob yéetel in tuuculo'ob, Yuumtzil u cúuchil in ta'acbesiquinbáa, in aj tocsajil xan.