Read Yucateco Salmos 2 Bible Online

Salmos 2 - Yucateco bible

Salmos 2

¹¿Ba'axten cu p'u'ujul le j ma' ocsaj óol caajo'obo'? ¿Ba'axten cu tucultico'ob u beetico'ob ba'alo'ob mix ba'al u biilal?

²U ajawilo'ob yéetel u méektáanilo'ob lu'ume', dzo'oc u much'icuba'ob u ba'atelto'ob Yuumtzil, tac xan leajaw u yéeymajo'.

³Cu yawatico'ob: ¡Cone'ex luksic le cadenaob u kaxmilo'one'exa'! ¡cone'ex wach'ic c suumilo'ob!

⁴Chéen cu che'ejtalo'ob tumen Yuumtzil le máax cu ajawil tej ca'ano';

⁵cu dzo'ocole' ichil u sen kuuxchaja'ane' cu ja'asic u yóolo'ob; cu ya'alic ti'ob yéetel tuláacal u p'uja'anil:

⁶Dzo'oc in jun páaycuntic in ajaw tu yóokol Sión inquili'ich pu'uc.

⁷Bin in ca'aj in dzáa ojéeltbil ba'ax cu ya'alic Yuumtzil: leti'e' tu ya'alaj ti' teen: Teche' in paalech; teen tin beetaj a síijil bejela'e' teene' a taataen.

⁸Káat ti' teen ca in dzáa ti' teech le múuch' caajo'ob a ti'alinto', ca in dzáa ti' teech a ti'alint tac u xuul u naklil yóokolcaab.

⁹Yéetel máascab bíin a xe'exe'et' ajawo'ob, ¡bíin a xiicunto'ob je'el bix u cuumilo'ob kate'!

¹⁰Ajawe'ex yéetel u méektáanile'ex lu'um, ¡jach ma'alob u'uye'ex le tzol xiquina'!

¹¹Kulte'ex Yuumtzil tu yéetel qui'imac óolal bey xan tu yéetel tziiquil; chinlaque'ex yéetel quiquilaanquil tu táan, tumen ma' xan ca p'u'ujuque', te'ex túune' ca quíimique'ex te j bejo', tumen séeba'an u léequel u p'u'ujul. ¡Qui' u yóolo'ob máaxo'ob caxantic u yáantaj!