Read Yucateco Salmos 20 Bible Online

Salmos 20 - Yucateco bible

Salmos 20

¹Ca u yu'ubech Yuumtzil le quéen yanac ti' teech yaj óolal; u Ku Jacobe' ca u toquech.

²Ca u túuxt ti' teech áantajil líikbal tu quili'ich najil Sión.

³Ca ka'ajac ti' tuláacal a ti'ibil óolalo'ob, ca u kam xan yéetel utzil óolal le ca tóoquic tu yóokol le multuunil kultajo'.

⁴Ca u béeycunt tuláacal a dzíibolalo'ob ca u béeycuns xan tuláacal ba'axo'ob a tucultmaj a beetic.

⁵Cu qui'imacchajal c óol tu yo'olal a dzáanche'etaj, yéetel c líiksic c láacam tu kaaba' c Yuum Ku. ¡Yuumtzile' ca u béeycunt tuláacal a káat óolalo'ob!

⁶Jach in wojel, Yuumtzile' yaan u dzáic dzáanche'etajil ti'le ajaw u yéeymajo'; yaan u núuquic u káat óolal líikbal tu quili'ich ca'anil, yéetel u páajtalil táan u dzáic nucuch dzáanche'etajilti' le ajawo'.

⁷Yaan ichilo'obe', yaan u bolanil ba'atel, u láako'obe' yaan u tziimino'ob; ba'ale' to'one' c xooc yéetel Yuumtzil c Ku.

⁸Leti'obe' cu p'óojol u píixo'obe', cu lúubulo'ob, ba'ale' to'one' láili' utzil wa'alacbalo'one'.

⁹Yuumtzil ¡dzáa le dzáanche'etajil ti' le ajawo'! ¡Núuc ti' to'on le quéen c t'aneche'!