Read Yucateco Salmos 21 Bible Online

Salmos 21 - Yucateco bible

Salmos 21

¹Yuumtzil, ajawe' qui'imac u yóol tumen dzo'oc a dzáic umuuk; ¡jach qui'imac u yóol tumen ta beetaj u pa'ic u muuk u aj p'eec!

²Dzo'oc a béeycunsic u dzíibolalo'ob; dzo'oc a wa'alic a dzáic ti' u káat óolalo'ob.

³Ta kamaj yéetel nucuch utzil t'aano'ob ta dzaj xan tu poole' jun p'éel péet jo'ol beeta'an yéetel oro.

⁴Tu káataj ti' teech cuxtale', ta dzaj ti': chowac cuxtal, cuxtal mina'an u xuul.

⁵Chéen tu yo'olal a wáantaje' ya'ab u páajtalil le ajawo', a dzaamaj ti'e' tziiquil yéetel ayikalil.

⁶A qui'iqui' t'aan ti'e' mina'an u xuul; a wanil tu yéetele' ca chupic tu yéetel qui'imac óolal.

⁷Ajaw, teche' mix bikin bíin lúubuquech, tumen a kubmaj a wóol ti' Yuumtzil; ¡a kubmaj a wóol ti' u yaabilaj le Sen ca'analo'!

⁸A páajtalile' yaan u chucpachtic tuláacal a aj p'eeco'ob; a x no'oj kabe' yaan u chucpachtic le máaxo'ob p'ecmailecho'.

⁹Le quéen talaquech u ti'al p'is óole', yaan a dzáico'ob ichil jun p'éel t'aba'an chujcab. Yuumtzil, ichil u p'uja'anile', bíin u xu'ulso'ob yéetel jun p'éel káak cu jabictuláacal.

¹⁰U paalal yéetel u ch'i'ibalo'obe' yaan u xu'ulsico'ob way yóokolcaabe' bey xan ichil le máaco'obo'.

¹¹Quex u káato'ob u beeto'ob ti' teech loobe', mix ba'al je'el u páajtal u beetico'ob ti' teche',

¹²Tumen yaan a beetic u púudzulo'ob le quéen a sut a p'úun che' tu tojilo'ob.

¹³¡Yuumtzil, teche' líiken yéetel a páajtalil! ¡Yaan c kiinbesic a dzáanche'etajilo'ob yéetel kaayo'ob!