Read Yucateco Salmos 22 Bible Online

Salmos 22 - Yucateco bible

Salmos 22

¹In Ku, in Junab Ku, ¿Ba'ax o'olal ta xúump'attajen? ¿ba'axten ma' ta taal a toquen? ¿ba'axten ma' ta táan óoltic in áacam okol?

²In Ku, bul kiin yéetel bul áakab táan in t'aniquech, ba'ale' teche' ma' táan a núuquic ti' teen; ¡mina'an je'elel in ti'al!

³Ba'ale' teche' quili'ichech; teech ca ajawil, Israele' cu qui'iqui' t'antiquech.

⁴C taataobe' tu kubajo'ob u yóolo'ob ti' tech; tu alab óoltecho'ob, teche' ta tocajo'ob;

⁵tu káatajo'ob áantaj ti' teech, teche' ta dzaj tocsajil ti'ob; tu kubaj u yóolo'ob ti' teech, teche' ma' ta pajaj u subtalo'obi'.

⁶Ba'ale' tene' ma' wíiniqueni', chéen jun túulen x nookol; ¡tene' u j meen che'ejil wíinico'ob!

⁷Máaxo'ob iliquene' cu p'a'astiqueno'ob; cu yéedztiqueno'ob, cu yúuntic u poolo'ob, táan uya'alico'ob:

⁸Le máaca' tu kubaj u yóol ti' Yuumtzil, to'ococ túun tumen Yuumtzil. Bey túun u jach yaabiltmajo', u toquej.

⁹Beyo': teche' ta beetaj u síijsiquen in maama; teech xan ta canantajen le ca'ach táan in chu'uche'.

¹⁰Ma'ili' síijiquene', j dzaaben tu yáanal a canan; ti'ili' yanen tu jobnel in maamae' teche' in Kuech.

¹¹Ma' a náachtal ti' teen, tumen jach naadz yanil ti' teen le yaj óolalo', mix máac cu taal u yáanten.

¹²In aj p'eeco'obe' dzo'oc u kalpachtiqueno'ob bey xiibil wacaxo'obe', bey u dzíidzic wacaxilo'ob u caajil Basane';

¹³cu jéencalo'ob beyo'ob dzíidzic leóno'obe', cu je'ic u chi'obe' cu pulicuba'ob tin wóokol.

¹⁴Beyen ja' weca'ane', in baaquelo'obe' dzo'oc ujúukchajlo'ob. In pucsi'ikale' bey u quibil caabe' táan yíibil ichilen.

¹⁵Tiquin in chi' bey tiquin kate', taakal in waak tin na'aca'an; ¡dzo'oc a jupiquen tac tu ma'ay lu'umil le quíimilo'!

¹⁶jun múuch' loolob máaco'obe', beyo'ob peeko'obe', dzo'oc u bakpachtiqueno'ob; dzo'oc u jolico'ob in kabo'ob bey xan in wooco'ob.

¹⁷¡Je'el u páajtal in xoquic tuláacal in baaquelo'obe'! In aj p'eeco'obe' ma' táan u lukesico'ob u paacato'ob tin wóokol;

¹⁸dzo'oc u t'oxláatico'ob in nook ichilo'ob, tu yo'olalo'obe' j buulnajo'ob.

¹⁹Ba'ale' teche' Yuumtzil, teech in muuke', ¡ma' a náachtal; co'oten séeba'an a wáanten!

²⁰Ma' cha'ic in quíimil tu yej máascab; ma' cha'ic u quíimsiqueno'ob le peeko'obo',

²¹toquen ti' u chi' le leóno'obo', ¡toquen ti' u baaco'ob le j xibil wacaxo'obo'!

²²Yuumtzil, teen bíin in wa'al máaxech, ti' in sucu'uno'ob, bíin xan in qui'iqui' t'antech ichil u múuch'cabilo'ob.

²³Te'ex le máaxe'ex ca tziquique'ex Yuumtzile', qui'iqui' t'ante'ex. ¡Te'ex u ch'i'ibale'ex Jacobe', tuláacale'ex qui'iqui' t'aante'ex! Kulta'ac xan tumen tuláacal u ch'i'ibalo'ob Israel!

²⁴Tumen leti'e' ma' táan u kéex óoltic le óotzilo'obo', ba'ale' cu táan óoltic u mukyajo'ob; mix tu ta'acbesicubáa ti' leti'ob. ¡Le quéen u káato'ob áantaje', leti'e' cu yu'ubic!

²⁵Tu táan u ya'abil le caajo' bíin in qui'iqui' t'ant a chuca'an óolal; tu táan le máaxo'ob tziquiquecho' bíin in beet tuláacal ba'axo'ob in séeb chi'itmaj teech.

²⁶Óotzile'ex, te'exe' jaanene'ex, tac quéen utzil na'ajchajaque'ex; te'ex máaxe'ex caxtic le Yuumtzilo', qui'iqui' t'ante'ex, ca cuxlaque'ex ya'abcach ja'abo'ob.

²⁷Tuláacal ch'i'ibalo'ob yéetel tuláacal le nucuch caajo'obo', u cajnáalile'ex tuláacal u naklil yóokolcaab: ka'ajac ti' te'ex le Yuumtzilo', nadzaba'ex ti'; ¡xolene'ex tu táan!

²⁸Tumen Yuumtzile', leti'e' ajaw; leti' méektáantic tuláacal le nucuch caajo'obo'.

²⁹Tuláacal le máaxo'ob caja'ano'ob ichil ayikalilo', tuláacal le máaxo'ob bíin suunaco'ob tu ma'ay le lu'umo', u chíin polte'ex, u kulto'ob chéen leti', tumen chéen tu juunal u yóolo'obe' mina'an cuxtal ti'ob.

³⁰In ch'i'ibalo'obe' bíin u kulto'ob le Yuumtzilo', yaan u dzáico'ob kaj óoltbil tuláacal u kiinil ucuxtalo'ob;

³¹ti' le máaxo'ob bíin pachal síijico'ob bíin u tzicbalt ti'ob u tojil Yuumtzil yéetel u meyajo'ob.