Read Yucateco Salmos 25 Bible Online

Salmos 25 - Yucateco bible

Salmos 25

¹Yuumtzil, ti' teech quin payalchi';

²in Junab Ku ti' teech in kubmaj in wóol; ma' a cha'ic in sublactal. ¡Ma' u che'ejtiqueno'ob in aj p'eeco'ob!

³¡Mix bikin ca beeta'ac u sublactal mix jun túul le máaxo'ob u kubmajo'ob u yóolo'ob ti'techo'! ¡Ca beeta'ac u ch'a'ico'ob subtale' le máaxo'ob tu yo'olalchéen mix ba'ale' ma' u káato'ob u yu'ubo'ob a t'aani'!

⁴Yuumtzil, e'es teen a beelo'ob; bisen ti' a t'u'ut'ul bejo'ob;

⁵bisen, beet in xíimbal ti' a jaajil, tumen teech in Junab Kue', ta tocajen. ¡Ti' teech mantadz in kubmaj in wóol!

⁶Yuumtzil, ka'ajac teech le yaacunajo' yéetel le muumunóolal mantadz a we'esmaj to'ono',

⁷ba'ale' ma' u ka'ajal teech in kebano'ob mix le kaas tinbeetaj tin táanquelmilo'. Ka'ajsene', Yuumtzil, tu yo'olal a nojoch yaacunaj yéetel a wutzil.

⁸Le Yuumtzilo' utz yéetel toj; leti'e' cu ye'esic bix unaj u cuxtalo'ob le j kebano'obo',

⁹yéetel cu bisic ti' ma'alob bej le j cabal óolo'obo'; ¡cu nu'uctico'ob u ti'al toj cuxtal!

¹⁰Tuláacal cu beetic ich yaacunaj yéetel jaajil u ti'al le máaxo'ob cu dzo'ocbesico'ob u dzaa t'aane' bey xanu ya'almaj t'aano'ob.

¹¹Yuumtzil, nojoch in kasa'anil; sa'ats teen tu yo'olal u tziiquil a kaaba'.

¹²Ti' le máax tziquic le Yuumtzilo' cu ye'esa'al le bej unaj u bisico';

¹³cu bakpachtic yéetel tuláacal utz yéetel cu dzáic ti' u ch'i'ibalo'obe' ca u ti'alinto'ob le lu'umo'.

¹⁴Le Yuumtzilo' cu ma'alob bisicubáa yéetel le máaxo'ob tziquique', cu dzáic xan u yojéelto'ob u nup t'aan.

¹⁵Mantadz quin líikesic in paacat ti' Yuumtzil, tumen leti' toquiquen ti' tuláacal loobil.

¹⁶Yuumtzil, pacteni' ch'a'a xan óotzilil ti' teen, tumen chéen tin juun yanilen, yaan teen yaj óolal.

¹⁷In pucsi'ikale' cu bin u yantal yaj óolal ti'; toquen ti' in mukyajo'ob.

¹⁸Pact in okom óolo'ob yéetel in meyajo'ob, sa'ates in si'ipilo'ob.

¹⁹Pact buca'aj aj p'eeco'ob yaan ti' teen; yaan tu pucsi'ikalo'ob tin wo'olale' jun p'éel p'ec óolal cu dzíiboltico'ob tac in quíimil.

²⁰¡Cananteni', toc in cuxtal! ¡Ma' a cha'ic in sublactal, tumen ti' teech quin caxtic áantajil!

²¹Ma' u yúuchul teen mix ba'al tu yo'olal u tojil in cuxtal mix tu yo'olal in ma' táacpaja'anil ti' wa ba'ax kaas, tumen ti' teech in dzaamaj in kub óolal.

²²In Junab Ku, toc a caajal Israel ti' tuláacal u yaj óolo'ob.