Read Yucateco Salmos 27 Bible Online

Salmos 27 - Yucateco bible

Salmos 27

¹Yuumtzile' in sáasil, leti' máax toquiquen; ¿máax ti' je'el in ch'a'ic sajaquile'? Yuumtzil canantic in cuxtal; ¿máax je'el u beetic in quiquilaanquile'?

²Cu much'icuba'ob le kaakas máaco'ob in aj p'eeco'obo', u ti'al u pulicuba'ob tin wóokol ca u xu'ulseno'ob; ba'ale' leti'ob cu t'óoch'pajlo'ob cu lúubulo'ob xan.

³Quex jun múuch' ba'atel máaco'ob ca u bakpachteno'obe', in pucsi'ikale' ma' bíin u ch'a'a sajaquili'; quex u líiksuba'ob u ti'al j ba'atel tin wéetele', tene' jejedzqui in wanil.

⁴Chéen jun p'éel ba'al dzo'oc in káatic ti' Yuumtzil, chéen jun p'éel ba'al quin dzíiboltic: ca yanaquen tu kulnaj Yuumtzil tuláacal u kiinil in cuxtal, u ti'al ca in kult tu kulnaje' yéetel ca in pact u qui'ichquelmil.

⁵Le quéen talac le kaakas kiino'obo', Yuumtzile' bíin u dzáaten tu'ux in wantal tu kulnaj; yáanal u bo'oy bíin in kubentinbáa; ¡bíin u dzáen ca'anal, tu yóokol jun p'éel nojoch tuunich!

⁶Beyo' je'el u páajtal in líikesic in pool tu yóokol in aj p'eeco'obe'; yéetel ichil nojoch qui'imac óolal ca in kay kaayo'ob ti' Yuumtzil.

⁷U'uyeni', Yuumtzil, ti' teech quin káat óolal. Ch'a'a teen óotzilil, núuc in t'aani'.

⁸In pucsi'ikale' cu ya'alic teen: Caxant u yantal Yuumtzil ta wéetel. Yuumtzil, tene' táan in caxantic ca yanaquech tin wéetel.

⁹¡Ma' a ta'acbesicabáa ti' teen! ¡Ma' a cúulpachcuntiquen yéetel kuuxilil! Chéen teech in wáantajil. Ma' a p'atiquen chéen tin juun x ma' áantajil, tumen teech in Junab Ku yéetel in tocsajil.

¹⁰Quex in taata yéetel in maama ca u xúump'atteno'obe', Yuumtzile' leti' bíin u táan óolten.

¹¹Yuumtzil, e'es teen a beel; bisen ti' u tojil bej tu yo'olal in aj p'eeco'ob;

¹²ma' a kubiquen ti' u yóolajo'ob, tumen dzo'oc u líikil j tuusil máaco'ob tin wóokol jach sen p'uja'an u yóolo'ob.

¹³Ba'ale' tene' in woojel bíin kuchquen in wil u yutzil Yuumtzil ti' tuláacal u ja'abilo'ob in cuxtal.

¹⁴¡Yanac teech kub óolal ti' Yuumtzil! ¡Yanac teech lik óolal, ma' u lúubul a wóol! ¡Bey, yanac teech kub óolal ti' Yuumtzil!