Read Yucateco Salmos 28 Bible Online

Salmos 28 - Yucateco bible

Salmos 28

¹Yuumtzil, in tocsajil, teech quin ka'am t'aantic. ¡Bic p'áatac ma' a núuquiquen! Tumen wa ma' ta núuquiquene', je'el u páajtal in xoquiquinbáa ichil le quimeno'obo'.

²U'uy in awato'ob táan in káatic teech áantajil, le quéen in tich' in kabo'ob tu tojil a quili'ich kulnajo'.

³Ma' a jíil bisiquen pa'ate' yéetel le kaakas máaco'obo'; ma' a beetic u yúuchul teen le ba'ax cu yúuchul ti'obo'.

⁴Dzáa ti'ob ba'ax cu najmatico'ob, je'el bix le kaakas ba'alo'ob tu beetajo'obo'. bo'oto'ob láili' yéetel le kaas tu beetajo'obo'.

⁵Bey tumen cu tu'ubsico'ob le ba'alo'ob tu beetaj Yuumtzilo', ¡leti' túune' u xu'ulso'ob ma' xan u ca'a líikesico'ob!

⁶¡Utzil t'antbil Yuumtzil, tumen dzo'oc u yu'ubic in káat óolo'ob!

⁷Yuumtzile' leti' dzáic teen muuk yéetel cu yáantiquen; ti' leti' tin chuca'an kubaj in wóol; leti' túune' ca tu yáantajen. In pucsi'ikale' qui'imac u yóol; yaan in kaay, yaan xan in dzáic nib óolal ti' Yuumtzil.

⁸Le Yuumtzilo' leti' u muuk u caajal, áantaj yéetel chimal u ti'al le ajaw yéeya'ano'.

⁹Toc a caajal, Yuumtzil, qui'iqui' t'ant le máaxo'ob ati'alo'obo'. Cananto'ob, tumen beyech jun túul j canan j tamane'; mantadz biso'ob a méekmajo'ob.