Read Yucateco Salmos 30 Bible Online

Salmos 30 - Yucateco bible

Salmos 30

¹Yuumtzil tene' quin qui'iqui' t'antiquech, tumen teech ta tocajen ti' in aj p'eeco'ob yéetel ma' ta cha'aj u p'a'astiqueno'obi'.

²Yuumtzil in Junab Ku, tin káataj ti' teech áantaje' ca ta dzaj ti' teen tojóolal;

³Yuumtzil, teche', ta tocajen ti' le quíimilo'; ta dzaj ti' teen cuxtal ma' ta cha'aj in quíimili'.

⁴Te'ex a kubmaj a wóole'ex ti' Yuumtzil, ¡kaye'ex kaayo'ob ti'! ¡qui'iqui' t'ante'ex u quili'ich kaaba'!

⁵Tumen u kuuxilile', séeba'an u máan, ba'ale' u yutzil óolale' mina'an xu'ulul ti'. Wa c okole'ex yéetel áakabe', tu ja'atzcab kiine' cu yantal ti' to'on qui'imac óolal.

⁶Tene' tin wu'uyajimbáa jeedzel in wóol, ca túun tin tucultaj: Mix ba'al bíin u beet in lúubul.

⁷Yuumtzil, teche' ichil a wutzile', ta jedzaj jun p'éel cúuchil in ti'alinte. Ba'ale' ta luksaj ti' teen a wáantaj le sajaquil túuno' tu sataj in wóol.

⁸Yuumtzil ti' teech quin ka'am t'aan, ti' teech xan quin káat óol;

⁹¿ba'ax u biilal wa ca quíimiquen, wa xan ca mu'ucuquen? ¡Lu'ume' ma' tu páajtal u qui'iqui' t'antiquech mix tu tzicbaltic a chuca'an óolal!

¹⁰Yuumtzil, u'uyeni' yéetel cha'a teen óotzilil. Yuumtzil, ¡áanteni'!

¹¹Dzo'oc a sutic in wokol t'aan, qui'imac óolalil; dzo'oc a lukesic tin wóokol u box búuquil le quíimilo' ca búucbesen yéetel u búuquil kiinbesaj.

¹²Tu yo'olal lelo', Yuumtzil, in Junab Ku, ma' tu páajtal in p'áatal ma' in t'aan: ¡yaan in kayic ti' teech u kaayilo'ob qui'iqui' t'aan yéetel mantadz quin in dzáa ti' teech nib óolal!