Read Yucateco Salmos 31 Bible Online

Salmos 31 - Yucateco bible

Salmos 31

¹Yuumtzil, ti' teech quin caxtic áantajil; ¡ma' a p'atquen kaasil mix bikin! ¡Toqueni' tumen toj ba'ax ca beetic!

²Yuumtzil u'uyeni'; ¡toquen tu séeba'anil! beetabáa u nojoch tuunichil in balquinbáa, ¡beetabáa xan u tuulum najil u ti'al a toquiquen!

³¡Teech in nojoch tuunichil yéetel in tuulum najil! ¡Biseni' yéetel cananteni' u ti'al ca a dzáa tziiquil ti' a kaaba'!

⁴¡Jóokesen ti' le léech jaya'an tin beelo', tumen teech in wáantajil!

⁵Ti' a kabo'ob quin kubentic in pixan; ¡Yuumtzil, u Kuil jaaj, lojeni'!

⁶Jach in p'ectmaj le máaxo'ob cu kultico'ob beetbil kuob mix ba'al u biilalo'obo'; in dzaamaj in kub óolal ti' le Yuumtzilo'.

⁷A yaacunaje' cu taasic teen qui' óolal yéetel qui'imac óolal. Teche' dzo'oc a wilic in okom óolalo'ob, a kaj óol in mukyajo'ob;

⁸ma' ta kubajen tu kab in aj p'eeco'obi'; ¡ta beetaj in dzáic in wooc ti' cóococh cúuchil!

⁹Yuumtzil, ch'a'a teen óotzilil, tumen ti' yanen ichil yaj óolale'; le yajilo' táan u bin u lukesic u sáasilil in wicho'ob, táan u koja'ancunsic in wíinclil yéetel tuláacal incuxtal.

¹⁰¡Le ki'inamil yéetel áacamilo'obo' táan u xu'ulsico'ob u kiinilo'ob in cuxtal! Le okom óolalo', cu xu'ulsic in muuko'ob; ¡in wíinclile' táan u bin u t'ona'antal!

¹¹U aj p'a'asen in aj p'eeco'ob, u p'a'asilen in wéet cajtalilo'ob, u sajaquilen le máaxo'ob u kaj óoleno'obo'. ¡Cu yáalcabo'ob ti' teen le quéen u yileno'ob ti' le bejo'obo'!

¹²Dzo'oc u chuca'an tu'ubsiqueno'ob, bey quimen yanilene', Beyen jun p'éel p'uul xe'exe'et'paja'ane'.

¹³Cu páajtal in wu'uyic le máaco'ob cu mucul t'aano'obo': Ti' tuláacal tu'ux yaan sajaquilil. Beyo'ob jun túulili' máaque', cu tucultico'ob ba'ax bíin u beeto'ob ti' teen ¡cu tucultico'ob u lukesico'ob in cuxtal!

¹⁴Ba'ale' tene', Yuumtzil, in kubmaj in wóol ti' teech; tene' in wa'almaj: Teche' in Junab Kuech.

¹⁵In cuxtale' ti' yaan ta kabo'obe'; ¡toquen ti' in aj p'eeco'ob, máaxo'ob táan u ch'a'apachtiqueno'ob!

¹⁶Pact yéetel utz le a paalila'; toquen xan tu yo'olal a yaacunaj.

¹⁷Ti' teech quin ka'am t'aan Yuumtzil; ¡ma' a kubiquen ti' subtalil! ¡bul ti' subtzilil le máaxo'ob kasa'antaco'obo'; dza'ob tu dzu' le j mucnalo', tu'ux ma' tu yúuchul t'aano'!

¹⁸P'áatac x ma' t'aanil le bóoxel chi'ob cu tuuso'obo', le cu t'aano'ob yéetel p'a'asil bey xan yéetelcúulpachtajil, yéetel cu poch'ico'ob le tojil máaco'.

¹⁹¡Buca'aj nojochil a wutzil u ti'al le máaxo'ob cu tziquiquecho'obo'! Le a wutzila' ca ta'acbesic bey jun p'éel ayikalile', yéetel tu táan yich le máaco'obo', ca t'oxic ti' lemáaxo'ob cu kubic u yóolo'ob ti' techo'.

²⁰Tumen a wantal tu yicnalo'ob ca a toquico'ob ti' u kaakasjok jo'ol le kaakas máaco'; tu yáanal u bo'oy a wotoche' ca canantic ti' u pooch'ilo'ob uaj p'eeco'ob.

²¹Qui'iqui' t'antbil le Yuumtzilo', tumen tu yo'olal u yaacunaje' nucuch ba'alo'ob tu beetaj tin wo'olal, tu súutuquil in mukyaj.

²²Ichil in chi'ichnaquile', j kuchen in tuculte' teche' ta jóoksen ta táan, ba'ale' le ca tin káataj teech áantaje', teche' ta wu'uyaj in awato'ob.

²³Tuláacale'ex máaxe'ex ca wocsaj óoltique'ex le Yuumtzilo' ca a yaabilte'ex; tumen leti' canantic tuláacal le máaxo'ob a'alico'ob ba'al jaajo'; ba'ale' ti' le j ca'anal icho'obo' cu ya'ab dzáic ti'ob ba'axcu najmatico'ob.

²⁴U dza'ob lik óol yéetel x ma' sajaquile' ti' u pucsi'ikalo'ob tuláacal le máaxo'ob u kubmaj u yóolo'ob ti' le Yuumtzilo'.