Read Yucateco Salmos 32 Bible Online

Salmos 32 - Yucateco bible

Salmos 32

¹Qui' u yóol le máax sa'atsa'an u si'ipilo'obo'; le máax luksa'an tuláacal u kebano'obo'.

²Qui' u yóol le máax mina'an mix ba'al kaas tu tuucule' mix tu ta'acal u pool tumen Yuumtzil.

³Ca'aliquil ma' in cáant ca'ach in kebane' in wíinclile' táan ca'ach u bin u lúubul u muuk tu yo'olal in áacam okol bul kiin,

⁴tumen yéetel kiin bey xan yéetel áakabe' aal jedzlic a kab tin wóokol. Bey lool tiquin tu yo'olal u yooxow le yáax kiino' bey in wu'uyic u lúubul in wóol.

⁵Ba'ale' tin cáantaj ti' teech tuláacal in keban yéetel in kasa'anil; tin dzaj in wóol in cáant ti' teech in kebano'ob; Yuumtzil, teech túune' ta sa'atsajo'ob teen.

⁶Le o'olale', le quéen talac yaj óolale' le j ocsaj óolo'obo' bíin u ch'a'a chi'ito'ob a kaaba'; quex ca tuulnac le ya'abcach ja'obo', ma' bíin kuchuc tu yicnalo'obi'.

⁷Teech u cúuchil in balquinbáa; ca canatiquen ti' sajbe'entzilil, chéen u kaayilo'ob tocsajil quin wu'uyic tin bakpach.

⁸Yuumtzile' cu ya'alic: In wicho'obe' táan u pactiquecho'ob. Bíin in dzáa teech ca'anbesajilo'ob; bíin in dzáa teech tzol xiquino'ob; bíin in we'es teech le bej unaj a bisico'.

⁹Ma' a béeytal je'el bix le tzíimino' wa je'el bix lemulao'; leti'obe' mina'an u na'ato'ob; le o'olale' yaan u cúumquinsa'alo'ob yéetel jokni'; wa ma' beyo', ma' tu nadzicuba'ob ti' teech.

¹⁰Le j loolob máaco'obo', bíin yanac ya'abcach ki'inamil ti'ob, ba'ale' u yaacunaj Yuumtzil bakpachtic le máaxo'ob yaan u kub óolalo'ob ti' leti'ob.

¹¹Qui'imacchajac a wóole'ex ti' Yuumtzil, te'ex máax utz a pucsi'ikale'ex yéetel toj a tuucule'ex; qui'imacchajac a wóole'ex, kaaynene'ex xan yéetel qui'imac óolal.