Read Yucateco Salmos 33 Bible Online

Salmos 33 - Yucateco bible

Salmos 33

¹Qui'iqui' t'ante'ex Yuumtzil, utzil máaque'ex; jadzutz le qui'iqui' t'aan cu jóokol tu chi' le utzil máaco'obo'.

²Dza'ex nib óolal ti' Yuumtzil je'el bix u bin u paaxil le arpao'; kaye'ex kaayo'ob ti' yéetel u paaxil lira;

³kaye'ex jun p'éel túumben kaay ti'; ¡ma'alob paaxnene'ex le quéen a qui'iqui' t'ante'exo'!

⁴U t'aan le Yuumtzilo' leti' u jaajil; u meyajo'obe' cu ye'esico'ob u kub óolal.

⁵Le Yuumtzilo' u yaacuntmaj ba'ax tu beel, bey xan ba'ax toj; ¡le lu'uma' chuup yéetel yaacunaj!

⁶Le ca'an yéetel tuláacal ba'ax yane', yéetel u t'aan Yuumtzil tu beetaj, bey xan yéetel u yustajil u chi'.

⁷Leti' much'quintic yéetel cu kalic u ja'ilo'ob le taamcach ka'anabo'.

⁸Tuláacal máaxo'ob yano'ob te j lu'umo' u tzico'ob Yuumtzil, ¡tzi'iquic tumen tuláacal u cajnáalilo'ob yóokolcaab!

⁹Tumen leti'e' j t'aanaje' ca j beetkaj tuláacal ba'al; leti' j túuchi' t'aanaje', tuláacal ba'al j p'áat jeedzel.

¹⁰Yuumtzile' cu beetic u láaj kastal u jokjo'ol le caajo'ob ma' u kaj óolo'ob Kuo',

¹¹ba'ale' le ba'alo'ob cu beetic Yuumtzilo' cu p'áatal jeedzel yanilo'ob ja'abo'ob mina'an u xuul.

¹²Qui' u yóol le caaj Junab ku Yuumtzilo', le caaj tu yéeyaj Yuumtzil u ti'alinto'.

¹³Yuumtzile' cu paacat líikbal te j ca'ano' yéetel cu yilic tuláacal le máaco'obo';

¹⁴líikbal ti' le cúuchil tu'ux caja'ano' cu pactic tuláacal le máaxo'ob caja'ano'ob te j lu'uma';

¹⁵leti'e' leti' máax beet u pucsi'ikalo'ob yéetel leti' ilic tuláacal ba'ax cu beetico'ob.

¹⁶Mix jun túul ajaw cu toquicubae' tu yo'olal sen ya'abil u aj ba'atelo'ob, mix cu toquicuba'ob le j xiibil máaco'ob tu yo'olal u sen mu'ukanilo'ob;

¹⁷le tzíimino'obo' mix ba'al u biilalo'ob u ti'al u toquico'ob mix máac; quex jach yaan u muuko'obe' ma' tu páajtal u tocsajo'ob.

¹⁸Ba'ale' Yuumtzile' mantadz cu canantic le máaxo'ob tziquique' yéetel cu kub óoltico'ob u yaacunaje',

¹⁹u ti'al u toco'ob ti' quíimil yéetel u dzáa cuxtal ti'ob tu kiinilo'ob wi'ijil.

²⁰To'one' c kubmaj c óol ti' Yuumtzil; ¡leti'e' cu yáantico'on yéetel cu canantico'on!

²¹C pucsi'ikale' cu qui'imactal u yóol ti' Yuumtzil; c kubmaj c óol ti' u quili'ich kaaba'.

²²¡Yuumtzil, a yaacunaje', ca yanac t éetel je'el bix cpa'atic ti' techo'!