Read Yucateco Salmos 34 Bible Online

Salmos 34 - Yucateco bible

Salmos 34

¹Mantadz bíin in qui'iqui' t'ant Yuumtzil; ma' bíin jáawac u qui'iqui' t'anta'al tumen in chi'i'.

²Tene' quin wu'uyquinbáa ca'anal in wich tu yo'olal Yuumtzil; ¡u'uye'ex qui'imacchajac xan a wóole'ex, cabal óol máaque'ex!

³Co'one'ex qui'iqui' t'antic jun múuch' u nojbe'enil ukaaba' Yuumtzil.

⁴Tin nadzajinbáa ti' Yuumtzil, leti' túune' tu núucajen yéetel tu tocajen ti' tuláacal in sajquilo'ob.

⁵Le máaxo'ob pactic Yuumtzile' cu p'áatalo'ob chuupo'ob yéetel qui'imac óolal; mix bikin bíin u p'ato'ob kaasil.

⁶Le óotzila' awatnaje', ca j u'uya'ab tumen Yuumtzil, leti' xan toc ti' tuláacal mukyajo'ob.

⁷U aj túuchi' Yuumtzile' cu canantic yéetel cu toquic le máaxo'ob tziquic Yuumtzil.

⁸Il wile'ex buca'aj utzil le Yuumtzilo'. ¡Utz yanil le máax cu kubic u yóol ti'!

⁹Te'ex a kubmabaex ti' Yuumtzile', tzique'ex, tumen mix ba'al je'el u bineltic ti' le máaxo'ob tziquico'.

¹⁰Le ayikalo'obo' cu yóotziltalo'ob yéetel cu mukyajtico'ob wi'ijil, ba'ale' le máaxo'ob cu caxtico'ob Yuumtzile' mix bikin je'elu bineltic wa ba'ax ti'obe'.

¹¹Co'otene'ex, in paalale'ex, u'uyene'ex xani': bin in ca'aj in ca'anbese'ex a tzique'ex le Yuumtzilo'.

¹²¿A káat wa cuxtal ya'abcach kiin? ¿A káat wa cuxtal yéetel qui'imac óolal?

¹³Canant a waak, ma' u ya'alic ba'al kaas; mix bikin ca jóokoc tuus ta chi'.

¹⁴Náachcuntabáa ti' le kasa'anilo' beet xan utz; canant le jéedzelo' xeen xan tu paach.

¹⁵Yuumtzile' u dzaamaj u paacat yóokol le utzil máaco'obo' yéetel cu ch'en xiquintic u yawato'ob.

¹⁶Yuumtzile' cu suticubáa tu yóokol le j loolob máaco'obo' u ti'al ma' u ka'ajsa'alo'ob tumen mix máac.

¹⁷Yuumtzile' cu táan óoltic u káat óolal le máac utz u tuucolo' cu toquic xan ti' tuláacal u yaj óolalo'ob.

¹⁸Yuumtzile' naadz yaan u ti'al u toc le máaxo'ob kiilil u pucsi'ikalo'obo', le máaxo'ob mina'an u alab óolalo'obo'.

¹⁹Máac toj u cuxtale' cu mukyajtic ya'abcach kaaso'ob, ba'ale' ti' tuláacal ba'al cu to'ocol tumen Yuumtzil.

²⁰Yuumtzil canantic tuláacal u baaquelo'ob, ma' bíin ca'achac mix jun p'éeli'.

²¹Le j loolob máaco'obo', u kasa'anilo'ob quiimsico'ob; le máaxo'ob cu p'ectico'ob máac toj u cuxtale' yaan u ja'adzalo'ob.

²²Ba'ale' Yuumtzile' cu toquic u cuxtal u paalitzilo'ob, ¡ma' bíin ja'adzac le máaxo'ob cu kubic u yóolo'ob ti'leti'e'!