Read Yucateco Salmos 38 Bible Online

Salmos 38 - Yucateco bible

Salmos 38

¹Yuumtzil, ma' a keyiquen ichil a p'uja'anil mix a jadziquen ichil lika'anil a wóol.

²A julubo'obe' dzo'oc u ch'íiquilo'ob ti' teen; ¡dzo'oc a cha'ic u lúubul a kab tin wóokol!

³Tumen kuuxchaja'anilech tu yo'olal in kebano'obe', tuláacal in wíinclile' koja'an; mix jun p'éel in baaquel yaan toj óolal ti'.

⁴In kasa'anilo'obe' u pech'maeno'ob; lela' jun p'éel cuuch in ti'al ma' tu páajtal in mukyajtic.

⁵Tu yo'olal in j ma' na'atile', in yajilo'obe' cu kastalo'ob yéetel cu tu'utalo'ob.

⁶Chinicbal in pool in máan, yéetel luubul in wóol; mina'an u súutuquil wa ma' okom in wóol.

⁷Tu yo'olal chocuile' in paache' táan u yelel; ¡tuláacal in wíinclil koja'an!

⁸Takan yaj in wu'uyic in wíinclil táan in wu'uyic jach mina'an in muuk; ¡in wáacamo'obe' u yáacamo'ob in pucsi'ikal!

⁹Yuumtzil, teche' a kaj óol tuláacal in dzíibolalo'ob; ma' ta'aca'an ti' teech in jajak iiko'obi'.

¹⁰Táan u titip'aanquil in pucsi'ikal, táan xan u xu'upul in muuko'ob; tac u sáasil in wiche' táan u yéekjoch'e'ental.

¹¹In wéet óolalo'ob utz u bisicuba'ob tin wéetel, tac in láaktzilo'obe' u náachcunsmajuba'ob,

¹²Le máaxo'ob u káato'ob u quíimseno'obo' cu dzáico'ob léecho'ob tin beel; le máaxo'ob cu dzíiboltico'ob teen kaase', táan u ya'alico'ob u yóotzilcunsqueno'ob, mantadz táan u tucultico'ob u náaysico'ob in wóol u ti'al u loobiltiqueno'ob.

¹³Ba'ale' tene' quin beetiquinbáa cóoquen, bey ma' tin wu'uyic t'aane'; bey tootene', ma' tin je'ic in chi'.

¹⁴Beyen jun túul máac cóoque' mix xan tu páajtal uya'alic wa ba'ax u ti'al u toquicubae'.

¹⁵Tene' quin pa'ataj ti' teech. Yuumtzil in Ku, teech ca t'aanaquech tin wo'olal.

¹⁶Chéen quin káat óoltic teche' ma' cha'ic u che'ejtiqueno'ob. mix u tuclico'ob wa dzo'oc béeytalo'ob le quéen u yilo'ob dzo'oc in lúubul.

¹⁷Jach tu jaajile', chéen ta'itac in lúubul; in mukyajo'obe' mix jun súutuc cu p'atiqueno'ob.

¹⁸¡Bin in ca'aj in cáant in kebano'ob, tumen cu chupiqueno'ob yéetel péec óolal!

¹⁹In aj p'eeco'obe' dzo'oc u ya'abtalo'ob; ya'ab máaxo'ob u p'ecmajeno'ob chéen tu yo'olal mix ba'al.

²⁰Tu suto'ob teen kaas tu yo'olal utz; cu beetico'ob ba'al kaas tin wo'olal, tumen táan in beeticutz.

²¹Yuumtzil, ¡ma' a p'atiquen tin juunal! in Ku, ¡ma' náachcunticabáa ti' teen!

²²Junab Ku in tocsajil, co'oten tu séeblaquil a wáanten.