Read Yucateco Salmos 40 Bible Online

Salmos 40 - Yucateco bible

Salmos 40

¹Tin dzaj in pa'atajil ti' Yuumtzil; leti' túune' tu chinjubáa u ti'al u yu'ub in awato'ob;

²tu tocajen ti' le mucnalo', ma' tu cha'aj in búulul ichil le dzop luuko', tu ma'alob jedzcuntaj in wooco'ob tu yóokol jun p'éel nojoch tuunich, yéetel tu dzaj jedzcunajil ti' in xíimbalo'ob.

³Tu beetaj u jóokol tin chi'e' jun p'éel túumben kaay, Jun p'éel u kaayil qui'iqui' t'aan ti' c Yuum Ku. Ya'abo'obe' le ca tu yilajo'ob lela', péecnaj u yóolo'ob, ca tu dzajo'ob u kub óolalo'ob ti' Yuumtzil.

⁴¡Utz yanil le máac u kubmaj u yóol ti' Yuumtzil, le máax ma' tu nupcubáa yéetel le j ca'anal icho'obo' mix yéetel le cu kultico'ob chéen cunel kuobo'!

⁵Yuumtzil in Junab Ku, ya'abcach le jak óol meyajo'ob ta beetaj techo', ya'ab a ch'a'a óotzilil ti' to'on. ¡Mix ba'al cu queticubáa ta wéetel! In káat in ka'ayto'ob, ca t'aanaquen tu yo'olalo'ob, ba'ale' sen ya'ab, mina'an u xooquil.

⁶Teche' ma' tu yustal a wóol le ba'alche'ob cu quíimsa'al a ti'alo' mix u ti'ibil óolalil janalbe'en neeko'ob, Teche' mix a káat ba'alche'ob u ti'al tóocbilo'obi', mix quíimsbil ti'ibil óolalo'ob u ti'al keban. Tumen dzo'oc a je'ic in xiquino'ob.

⁷Le o'olale' dzo'oc in wa'alic: je'elena', je'el bix uya'alic tin wo'olal le dzíibil ju'uno'.

⁸In Junab Ku, tene' utz tin t'aan in beetic le ba'ax a káate'; ¡quin bisic tin pucsi'ikal a ca'anbesaj!

⁹Dzo'oc in dzáic ojéeltbil le ba'ax toj tu táan le anojoch caajalo'. ¡Teche' ma'alob a wojelil, Yuumtzil, mix p'áataquen maacal in chi'i'!

¹⁰Ma' a cha'ic u máacal in chi' tu yo'olal a toj utzil; tin dzaj ojéeltbil a kub óolal yéetel a tocsajil. Mix jun téen tin muclaj a yaacunaj yéetel a jaajil tu táana nojoch caajal.

¹¹Teech túune', Yuumtzil, ¡dzáaten a muumun óolal! ¡Mantadz ca u cananten a yaacunaj yéetel a jaajil!

¹²tumen dzo'oc u taal sen ya'ab kaas tin wóokol, mina'an u xooquil. In kasa'anilo'obe' dzo'oc u léench'intiqueno'ob; ¡dzo'oc tac u bin u sáasilil in wich! Asab ya'abilo'ob ti' tzo'otzel in pool, dzo'oc u lúubul in wóol.

¹³Yuumtzil, beet utz, ¡co'oten a toquen! Yuumtzil, ¡co'oten tu séeblaquil a wáanten!

¹⁴¡Beet u máansico'ob nojoch subtalil le máaxo'ob u káato'ob u lukeso'ob in cuxtalo'! ¡Ca púudzuco'ob ich subtalil le máaxo'ob u káato'ob ubeeto'ob teen kaaso'!

¹⁵Ca púudzuco'ob u ch'a'amajo'ob subtal le máaxo'ob cu p'a'astiqueno'obo'.

¹⁶Ba'ale' tuláacal le máaxo'ob caxtiquecho' ca chu'upuco'ob yéetel qui'imac óolal; le máaxo'ob dzíiboltico'ob a tocsajile' ca u ya'alo'obmantadz: ¡Yuumtzile' nojoch.!

¹⁷Teen, óotzilen yéetel yaj in wóol in wanile', Yuumtzil, ma' a tu'ubsiquen. Teech le máax áantiquen yéetel máax jáalkabtiqueno'; ¡ma' a xáantal, in Junab Ku!