Read Yucateco Salmos 42 Bible Online

Salmos 42 - Yucateco bible

Salmos 42

¹Je'el bix jun túul quéej ukaj, táan u caxtic u sayabil ja'e', bey in caxtiquecho' in Ku.

²Ukajen ti' Yuum Ku, u Junab kuil cuxtal. ¿Ba'ax kiin quéen suunaquen j antal tu táan Ku?

³Bul kiin yéetel bul áakabe', in janale' u ya'alilo'ob in wich, ca'aliquile', láaj súutuc cu káat chi'ita'al teen: ¿Tu'ux yaan a Ku?

⁴Le quéen in tucult le ba'alo'oba', quin wu'uyic buca'aj u yaj óolal in pixan. Cu ka'ajal teen le ca'ach quin bin yéetel le máaco'ob, táan ca'ach in bisico'ob tu najil Yuum Ku ichil u kaayilo'ob qui'imac óolal yéetel nib óolal. Buca'aj nojoch qui'imac óolalil yaan ca'ach ti' le ya'abcach máaco'obo'.

⁵¿Ba'axten cu lúubul in wóol? ¿Ba'axten cu yantal teen chi'ichnaquil? In páajtalile' in dzaamaj ti' Yuum Ku, máax láayli' bíin in qui'iqui' t'ante'. ¡Leti'e' leti' in Ku yéetel in tocsajil!

⁶Quin wu'uyiquinbáa jach lúubul in wóol. Le o'olale' quin sen tucultiquech, líikbal le tu'ux yaan u áalcab ja'il Jordane', líikbal tu pu'uquilo'ob Hermón yéetel Mizar.

⁷Cu yu'uba'al te j taamcach xúuchubo'obo' u ka'amcach éedzbal u lúubul ja'obo'; le sen ya'abcach ja'ob ca túuxtico' dzo'oc u máanelo'ob tin wóokol.

⁸Yéetel kiine' Yuumtzile' cu túuxtic teen u yaacunaj, yéetel áakabe' ma' tu jáawal in kaay mix in payalchi' ti' u Ku in cuxtal.

⁹Quin wa'alic ti' Kue', in Aj tocsaj: ¿Ba'axten dzo'oc a tu'ubsiquen? ¿Ba'axten yaan in máan okom in wóol yéetel pech'a'anen tumen in aj p'eeco'ob?

¹⁰Tac in baaquelo'ob cu ki'inamo'ob tu yo'olal u ya'alaj ba'alo'ob in aj p'eeco'ob, máaxo'ob tuláacal súutuque' cu káat chi'itico'ob ti' teen: ¿tu'ux yaan a Ku?

¹¹¿Ba'axten cu lúubul in wóol? ¿Ba'axten cun yantal teen chi'ichnaquil? In páajtalile' in dzaamaj ti' Yuum Ku, máax láayli' bíinin qui'iqui' t'ante'. ¡Leti'e' leti' in Ku yéetel in Aj tocsajil!