Read Yucateco Salmos 43 Bible Online

Salmos 43 - Yucateco bible

Salmos 43

¹Junab Ku beet teen ba'ax tu beel; ¡dzáaba tin wéetel tu yóokol le máaxo'ob cu kultico'ob beetbil kuobo'! ¡Toquen ti' le máac cu tuuso' yéetel ti' le j loolob máaco'!

²tumen teech in Yuumtzil yéetel in Aj canan. ¿Ba'axten dzo'oc a náachcunsiquen ti' teech? ¿Ba'axten yaan in máan okom in wóol yéetel pech'a'anen tumen in aj p'eeco'ob?

³Túuxt a sáasil yéetel a jaaj u ti'al ca u ye'eso'ob teen le bej cu bisic máac tac ti' le quili'ich pu'uco', ti' le cúuchil tu'ux caja'anecho'.

⁴Bíin kuchuquen túun ti' u multuunil a kulta'al Yuumtzil, te túun bíin in qui'iqui' t'antecho' yéetel u paaxil arpa, tumen teche', Yuumtzil ca chupic in cuxtal yéetel qui'imac óolal.

⁵¿Ba'axten cu lúubul in wóol? ¿Ba'axten cun yantal teen chi'ichnaquil? In pa'atajile' in dzaamaj ti' Kue', máax láayli' bíin in qui'iqui' t'ante'. ¡Leti'e' leti' in Ku yéetel in Aj tocsajil!