Read Yucateco Salmos 44 Bible Online

Salmos 44 - Yucateco bible

Salmos 44

¹Ku, dzo'oc c u'uyic t xiquinile', tzicbalta'an to'on xan tumen c taataobe' le jak óol meyaj ta beetaj tu kiinilo'ob leti'ob, ti' le ja'abo'ob máanja'ano'obo':

²yéetel a kabe' ta tojolch'intaj le j ma' ocsaj óol wíinico'obo'; ta jadzaj le yaanal caajo'obo' ca ta beetaj u cajtal c taataob te'elo'.

³Tumen ma' u kabo'ob mix u máascabo'ob dzáa ti'ob le dzáanche'etajilo'; ma' leti'ob ch'a'a le lu'umo'. ¡A páajtalil yéetel a muuk j beete! ¡Tumen teche' a yaacuntmajo'ob!

⁴In Ajaw, in Junab Ku, teech ta dzaj dzáanche'etajil ti' a caajal;

⁵ta wo'olale' t t'onquintaj c aj p'eeco'ob; ta kaaba'e' t pech'aj le máaxo'ob cu taalo'ob t óokolo'.

⁶Tumen ma' tin alab óoltic ti' in julub, mix in máascab cu páajtal u dzáic teen dzáanche'etajil;

⁷teech ta beetaj c t'onquintic c aj p'eeco'ob, teech ta paj u subtal le c aj p'eeco'obo'.

⁸Ku, ta wo'olale', cu ca'analtal c ich, mantadz xan yaan c qui'iqui' t'antic a kaaba'.

⁹Ba'ale' bejela'e' ma' a káat a kamo'oni'; dzo'oc a sen beetic c sublactal; bejela'e' ma'atech a jóokol yéetel c aj ba'atelo'ob.

¹⁰Dzo'oc a beetic c áalcab ti' c aj p'eeco'ob, le máaxo'ob u p'ectmajo'ono'obo' cu yoclico'ono'ob, cu bisico'ob xan je'el ba'ax u káato'obe'.

¹¹Dzo'oc a kubico'on; beyo'on j tamano'ob cu bisa'alo'ob tu cúuchil quíimsaje'; dzo'oc a ki'itbesico'on ichil le j ma' ocsaj óolo'obo';

¹²jach mina'an u tojol ta conilac a caajal, beyo' mix ba'al ta náajaltaj úuchic a conic.

¹³Ta beetaj c sen po'och'ol; c éet caajalo'obe' cu ya'alico'ob ba'al ti' to'on yéetel cu che'ejtico'ono'ob.

¹⁴Dzo'oc a beetico'one' u p'a'aso'on le j ma' ocsajóolo'obo'; cu p'a'astico'ono'ob táan u yúuntico'ob u poolo'ob le quéen u pacto'ono'obe'.

¹⁵Mix jun súutuc wa ma' cabalcunsa'an in wóol; cu chiintal in wich tu yo'olal in sublaquil

¹⁶tu yo'olal u si'ipil in aj p'eeque', le máax táan u yilic bix úuchac u loobiltiquene'; táan xan u ya'alic teen ba'al, táan xan u poch'iquen.

¹⁷Le ba'al dzo'oc u yúuchul to'ona' ma' j úuch to'on tumen dzo'oc c tu'ubsiquechi'. Ma' p'áatac ma' c dzo'ocbesic a nup t'aani'.

¹⁸Ma' c tucultmaj c xúump'attiquechi' mix xan c p'at a bejilo'obi'.

¹⁹Ba'ale' quex beyo' teche' dzo'oc a kalico'on ichil u ba'alche'ilo'ob káax. ¡Dzo'oc a pixico'on yéetel nojoch éekjoch'e'enil!

²⁰Wa ca tu'ubsech ca'ache' c Ku, wa xan ca c kult jun túul jela'an ku,

²¹teche' dzo'oc a kuchul a wojéelte', tumen teche' a kaj óol u dzu' c pucsi'ikal.

²²Ba'ale' ta wo'olale' c quíimsa'al mantadz; c bisa'al tu cúuchil quíimsaj beyo'on j tamano'obe'.

²³¿Yuumtzil, ba'axten ca wenel? ¡Aajen, aajen! ¡Ma' a xúump'attico'on jun puli'!

²⁴¿ba'axten ca ta'acbesicabáa? ¿Ba'axten ca tu'ubsico'on wa táan sen c mukyaj?

²⁵Ca'anano'on yéetel luba'an c óol, táan c jíiltic c wíinclil j lu'um.

²⁶¡Líiken, co'oten a wáanto'on, yéetel toco'on tu yo'olal a nojoch yaacunaj!