Read Yucateco Salmos 45 Bible Online

Salmos 45 - Yucateco bible

Salmos 45

¹Jadzutz t'aano'ob cu jóokol tin pucsi'ikal, in waake' bey u nu'ucul le j ma'alob dzíibo'. ¡Bin in ca'aj in kayt'aant qui'ichquelem ba'alo'ob tu táan ajaw!

²¡Teech u asab qui'ichquelemil ichil le máaco'obo'! ¡Ta chi'e' cu jóokol jadzutz t'aano'ob! Le o'olale' Kue' tu yutzil t'antech u ti'al minu'un xuul kiino'ob.

³¡Kaxnakt a máascab j xibil máac! ¡Leti' u chíiculal a nojbe'enil!

⁴A tziiquile' a bin táanil ti' dzáanche'etajil, táan a ba'atel tu yo'olal le jaajo' yéetel táan a beetic ma'alob p'is óol ti' le j cabal óolo'obo'.

⁵Ajaw, le caajo'obo', tu lúubulo'ob tu ni' a wooc; a julubo'obe' pupudzquilo'ob yéetel cu ch'íiquilo'ob tu pucsi'ikal a aj p'eeco'ob. ¡A x no'oj kabe' cu beetic nucuch máactzilo'ob!

⁶Ku, a jalach káanchee', mina'an xu'ulul ti'; a jalachile' jun p'éel jalachil toj.

⁷A yaacuntmaj le utzo' ba'ale' a p'ecmaj le kaaso'. Le o'olale' tu yéeyajech Yuum Ku, ca tu chupajech yéetel qui'imac óolal asab ma'alob ti' u qui'imac óolal le láak ajawo'obo'.

⁸Qui'ibocquinta'an a nook yéetel qui'iboc ba'alo'ob; yéetel paaxo'obe' cu qui'imaccuntal a wóol ichil le nucuch najo'ob beeta'ano'ob yéetel marfil.

⁹Ta wicnale' yaan xunáano'ob, u x ch'upul paalal ajawo'ob; tu x no'oj kabil a jalach káanchee' ti' yaan le x ajawo', nu'ucbesa'an u nook yéetel u jach ma'alobil oro.

¹⁰U'uye, in x ch'upul paal; ch'en xiquint ba'ax quin in wa'al techa': Tu'ubes a láaktzilo'ob, tu'ubs xan a caajal,

¹¹tumen le ajawo' cu dzíiboltic a qui'ichpamil; leti'e' a dzuulil, unaj a wu'uyic u t'aan.

¹²U x ch'úupal ajawil Tiroe' cu cu taal u chíin poltech, u asab ayikalilo'ob le caajo' yéetel u siibalo'obe' táan u caxtico'ob bix u p'áatalo'ob ma'alob ta táan.

¹³¡Je'el cu jóokol le x ch'úupal ajawo' yéetel tuláacal u qui'ichpamil! ¡U búuque' chuya'an yéetel oro!

¹⁴Yéetel jadzutz búuc cu bisa'al tu táan ajaw, tu paache' cu bino'ob le xunáano'ob láakintico', u múuch'ul u x yéet óolo'ob.

¹⁵Táan u bino'ob yéetel qui'imac óolal, qui' u yóolo'ob u yoclo'ob tu jalach najil ajaw.

¹⁶Ajaw a paalalo'obe', yaan u cutalo'ob tu jalach káanche' a úuchben ch'i'ibalo'ob, yéetel yaan u méektáantico'ob tuláacal a caajal.

¹⁷Tene' yaan in beetic u ka'ajsa'al a kaaba' ti' u jujun p'éelil túumben ch'i'ibal, yéetel le caajo'ob ca u mantadz qui'iqui' t'antecho'obo'.