Read Yucateco Salmos 47 Bible Online

Salmos 47 - Yucateco bible

Salmos 47

¹¡Caaje'ex, papaxkabnene'ex, tuláacale'ex! ¡Kame'ex Yuum Ku yéetel u yawatilo'ob qui'imac óolal!

²Tumen Yuumtzil le Sen ca'analo', sajbe'entzil. Leti' u nojoch ajawil tuláacal le lu'uma'.

³Tu dzáanche'etaj caajo'ob bey xan múuch' caajo'ob yéetel tu dzajo'ob tu yáanal c páajtalil.

⁴Tu yéeyaj le lu'um bíin c ti'alto', u ca'anal ichil Jacob, le máax tu yaacuntajo'.

⁵¡Junab Ku le Yuumtzilo', dzo'oc u na'acal j cutal tu jalach káanche' ichil u yawatilo'ob qui'imac óolal yéetel u paaxilo'ob trompeta!

⁶¡Kaye'ex, kaye'ex kaayo'ob ti' Junab Ku. Kaye'ex, kaye'ex kaayo'ob ti' c ajaw.

⁷Kaye'ex jun p'éel kaay ti' Yuum Ku, tumen leti' u ajawil tuláacal lu'um!

⁸¡Yuum Kue' leti' u ajawil tuláacal le múuch' caajo'obo'! ¡Yuum Kue' culucbal tu quili'ich káanche'!

⁹Le u nuuquilo'ob le múuch' caajo'obo' cu nupicuba'ob ti' u caajal u Ku Abraham,

¹⁰tumen u ti'al Junab Ku u páajtalilo'ob le yóokolcaaba'. ¡Leti'e' ti' yaan tu yóokol tuláacale'!