Read Yucateco Salmos 48 Bible Online

Salmos 48 - Yucateco bible

Salmos 48

¹¡Le Yuumtzilo' nojoch! ¡C Kue' cu najmatic qui'iqui' t'aan te tu caajalo', te tu quili'ich pu'uquilo'!

²¡Buca'aj qui'ichquelmil le u ca'analil pu'uquil Sion te jach tu xuul xamano'! ¡Leti' u qui'imac óolal tuláacal le lu'umo'! Leti' u caajal le nojoch ajawo'.

³Yuum Kue' ti' yaan tu jalach najilo'ob Jerusalene'; Junab Kue' tu dzáajubáa kaj óoltbil bey jun p'éel u cúuchil ma'alob ta'acbesajile'.

⁴Le ajawo'obo' tu much'ajuba'ob, ca láaj bino'ob tu yóokol;

⁵ba'ale' le ca tu yilajo'ob le caajo', ja'ak u yóolo'ob, péecnac yóolo'obe' ca j áalcabnajo'ob.

⁶Tu ch'a'ajo'ob sajaquile' ca jo'op' u ch'o'och'otcuba'ob yéetel ki'inamil bey jun túul co'olel táan u síijsaje';

⁷bey j lakin iik cu xe'exe'et'ic u cheemilo'ob u caajil Tarsise'.

⁸Te tu caajal c Kuo', u Yuumtzilil tuláacal páajtalile', dzo'oc c ilic yéetel c ichil le ba'ax jach je'ebix tzicbalta'anil to'ono'. ¡Kue' yaan u yutzil jedzcuntic Jerusalén u ti'al ja'abo'ob mina'an u xuul!

⁹C Junab Ku, chúumuc ti' a kulnaj c ka'asic a nojoch yaacunaj.

¹⁰C Junab Ku, ti' tuláacal le lu'uma' ca qui'iqui' t'anta'al je'el bix cu najmatic a kaaba'e'; Yéetel a páajtalile' ca beetic p'is óolal je'ebix u najmae'.

¹¹¡Qui'imacchajac u yóol u pu'uquil Sión! ¡Síit'naco'ob yéetel qui'imac óolal u noj caajilo'ob Judá tu yo'olal le ma'alob ba'alo'ob ca beetico'!

¹²Xíimbalnene'ex tu bakpach Sión, xoque'ex jay p'éel u witzil najilo'ob;

¹³ile'ex ma'alob u tuulumilo'ob bey xan u jalach najilo'ob, u ti'al ca páatac a tzicbaltique'ex ti' le ch'i'ilancabilo'ob bíin taalaco'obo'

¹⁴bey c Junab Kuo' u ti'al ja'abo'ob mina'an u xuule'. ¡Leti' c Aj bej, u ti'al ja'abo'ob mina'an u xuul!