Read Yucateco Salmos 49 Bible Online

Salmos 49 - Yucateco bible

Salmos 49

¹U'uye'ex ma'alob lela', u cajnáalile'ex tuláacal yóokolcaab,

²le ayikalo'obo' bey xan le óotzilo'obo', le máaxo'ob yaan u páajtalilo'ob bey xan le j cabal óolo'obo'.

³Bin in ca'aj t'aan yéetel na'atil yéetel bin in ca'aj in wa'ale' taamtam tuuculo'ob;

⁴yaan in táan óoltic le quéet t'aano'obo', yaan in wa'alic ba'ax u káat u ya'ale' ca'aliquil táan u juum le arpao'.

⁵¿Ba'axten cu yantal sajaquilil le quéen talac le kaakas kiino'obo', le quéen in wilinbáa bakpachta'anen tumen u kasa'anil in aj p'eeco'ob?

⁶Leti'obe' u kubmaj u yóolo'ob ti' ayikalilo'ob, yéetel cu ca'analtal u yicho'obe' tu yo'olal ya'abcach ba'al yaan ti'ob,

⁷ba'ale' mix máac je'el u páajtal u toquicubáa tu juunal u yóole' mix tu páajtal u bo'otic ti' Yuum Ku u ti'al ca to'ococ u cuxtal.

⁸¡Mina'an taakin u ti'al ca páatac u ma'anal u cuxtal jun túul máac,

⁹u ti'al ca cuxlac mantadz yéetel ca u tocubáa ti' le quíimilo'!

¹⁰Tumen cu yila'ale' tuláacal máac queet u quíimil, je'el bix u quíimil le yaan u na'ato'obo', bey xan u quíimil le j ma' na'ato'obo', u ayikalilo'obe' cu p'áatal ti' yaanal máaco'ob.

¹¹Quex tumen tu dzajo'ob u kaaba'ob ti' u lu'umo'obe', le mucnalo' leti' bíin u yotochto'ob u ti'al kiino'ob mina'an u xuul; ¡te'elo' ti' bíin p'áataco'ob mantadz!

¹²Le máaco' yaan u xuulil u cuxtal quex tumen sen ayikal; cu quíimil je'el bix xan u quíimil le ba'alche'obo'.

¹³Bey u xu'ulul le máaxo'ob cu kubic u yóolo'ob ti' u ayikalilo'obo'; bey u dzo'ocol lemáaxo'ob cu qui'iqui't'aanticuba'obo'.

¹⁴U ti'al le máaco'ob beyo', le quíimilo' bey aj canan tamane' leti' le bisic bey j tamano'ob te j mucnalo'. Le quéen kuchuc ja'atzcab kiine', yaan u dzáanche'eta'alo'ob tumen le utzil máaco'obo'; u muuko'obe' yaan u bin u lúubul; le mucnalo' leti' bíin u yotochto'ob.

¹⁵Ba'ale' Kue' yéetel u páajtalile' yaan u toquiquen ti' le quíimilo', tumen leti' yaan u bisiquen tu yicnal.

¹⁶Ma' a chi'ichnaccunticabáa tu yo'olal wa máax cu ayikalcunticubáa yéetel cu ya'abcuntic u jadzutzil u yotoch,

¹⁷tumen mix ba'al je'el u páajtal u bisic le quéen quíimique', mix le jadzutz ba'alo'ob cu bino'ob tu paach te j mucnalo'.

¹⁸Quex tumen ca u yu'ububáa jach utz yanil ca'aliquil cuxa'ane'. yéetel ca qui'iqui' t'antac tumen máaco'ob tu yo'olal u ayikalile',

¹⁹bíin kuchuc u kiinil u quíimil yéetel ma' bíin u ca'a il sáasilil.

²⁰Le máaco' yaan u xuulil u cuxtal, quex tumen jach ya'ab u ayikalil; cu quíimil je'el bix xan u quíimil le ba'alche'obo'.