Read Yucateco Salmos 50 Bible Online

Salmos 50 - Yucateco bible

Salmos 50

¹Yuumtzil, u Junab Ku beetbil kuob, dzo'oc u t'aan; tu t'anaj u caajilo'ob le lu'uma' j lakin tac j chikin.

²Kue' cu léenbal líikbal Sión, le sen qui'ichquelem caajo'.

³C Kue' táan u taal, ba'ale' ma' ich ch'ench'enquili': tu táan leti'e' yaan jun p'éel káak cu xu'ulsaj; tu paache', jun p'éel ka'amcach chac ikal.

⁴Líikbal ca'anale', Kue' cu t'anic le ca'ano' yéetel le lu'umo' u ti'al u yilo'ob bix cu j bin u p'is óolt u caajal:

⁵Much'quinte'ex le máaxo'ob u kubmaj u yóolo'ob ti' teno', le máaxo'ob u dzaamajo'ob u nup t'aano'ob tin wéetelo', le máaxo'ob u ya'almajo'ob u dzáico'ob teen jun p'éel quíimsbil ti'ibil óol.

⁶Le ca'ano' cu ya'alic: le Kuo' jun túul toj aj p'is óol.

⁷Israel in caajal, ch'enxiquinen; bin in ca'aj in sáasilcunt ta wéetele' tuláacal le ba'alo'oba'. ¡Tene' Junab Kuen! ¡Tene' Kuen!

⁸Ma' tin wa'alic teech mix ba'al tu yo'olal a ti'ibil óolalo'ob, wa tu yo'olal ca kubic teen ba'alche'ob,

⁹Ma' tin káatic teech u mejnilo'ob a wacax mix xiibil yuuco'ob cu taalo'ob ti' a kalabche'ob,

¹⁰tumen in ti'al tuláacal u ba'alche'ilo'ob le káaxo', bey xan u ya'abcach wacaxilo'ob le t'óol jo'ol lu'umo'obo';

¹¹in ti'alo'ob u ch'íich'ilo'ob le pu'uco'obo' yéetel tuláacal ba'al cu péec te j káaxo'.

¹²Wa wi'ijene', ma' bíin in wa'al ti' techi', tumen in ti'al le yóokolcaabo' bey xan je'el ba'alac yanee'.

¹³¿Quin tzéentiquinbáa wa yéetel xiibil wacaxo'ob, wa quin wukic u ki'ikel xiibil j yuuco'ob?

¹⁴¡A nib óolale' leti' ca ti'ibil óolalchajac ti' Yuum Ku; dzo'ocbes a dzaa t'aano'ob ti' le j Sen ca'analo'!

¹⁵Le quéen yanac teech yaj óolale', t'aneni'; tene' quin toquiquech, teche' ca tziquiquen.

¹⁶Ba'ale' ti' le j loolob máaco' cu ya'ala'al ti' tumen Yuum Ku: ¿Ba'ax páajtalil yaan teech u ti'al ca a ch'a'a chi'it in wa'almaj t'aano'ob wa u ti'al a ka'ajsic in nup t'aan,

¹⁷wa ma' utz ta wóol ca in wa'al nu'uc teche' mix ta dzáic yajil in t'aano'obo'?

¹⁸Le j oocolo' ca kamic yéetel qui'imac óolal; ¡ca much'icabáa yéetel máaco'ob cu nup kebano'ob!

¹⁹U ti'al kaas yéetel u ti'al a pate'ex tuuso'ob, cu cha'apajal a waak yéetel a chi'.

²⁰Ca líiksaj t'aan tu yo'olal a láak; ¡tu yóokol a sucu'une', ca kaakas ch'inch'in t'aan!

²¹Tuláacal lela' a beetmaj, ba'ale' tene' in macmaj in chi'; ta tucultaje' tene' queeten ta wéetel. Ba'ale' tene' bin in ca'aj in wa'al tuláacal tu táan a wich, ¡bin in ca'aj in beet a wilic buca'aj a p'aax!

²²Na'ate'ex ma'alob lela', te'ex ca tu'ubsique'ex Yuum Kue', ma' xaan ca cáajac in xe'exe'et'ique'exe' ca mina'anac túun máax toquique'ex;

²³le máax cu dzáic teen nib óolale' cu tziquiquen. ¡Tene' quin toquic le máax cu p'áatal tin wéetel!